Read Siyin Chin 1 Samuel 21 Bible Online

1 Samuel 21 - Siyin Chin bible

1 Samuel 21

¹Nob khua ah a om thiampi Ahimelech kungah David pai hi. Ahimelech a liing sa in ama muak tu in pai a, “Nangma nguakin hi sungah banghang hong pai ni ziam?” ci in dongh hi.

²“Kumpipa vai taw kei hi sungah kong pai hi,” ci in David in zo hi. “Ama in ka sep tu te kuama ka heaksak ngawl tu in hong paisak hi. Ka mite ahile mun khat ah kisiktua tu in ka sawl hi.

³Tua hi a, tu in nguai an bang teng nei ni ziam? Anluum nga ahibuale zong a dang na nei khat po hong pia ta'n!” ci hi.

⁴Thiampipa in, “Anluum thawthong nei ngawl khi hi, a kithiansua sa anluum bek nei khi hi; na mite in tu nai sungin numei taw a omkhawm bua na uh le tuate nga thei ni hi,” ci hi.

⁵David in, “Tuabang omkhawm ngawl hi, ka mite sia a kisawl thawthong khat ah seam tu a pai bek zong, a zeksa in amate le amate kithiangsak tawntung hi, tua ahile tu a ko hong kisawl tuamna ah ka pai uh ciang thiang seseam ngawl tu khu ziam?,” ci in zo hi.

⁶Tua ahikom thiampipa in David sia a thiangtho anluumte pia hi, banghang ziam cile anluum a nei sun teng Pathian a kipia hi a, sabuai thiang panin a kisot sa hi a, anluum thak taw a kilaih sa hi.

⁷(Saul ii Edom pan a tuucing ukpa Doeg sia tua ni in tua munah biakna vai sepna khat a khuangkhimsak tu in na om luilam hi.)

⁸David in Ahimelech munah, “Tei ahizong namsau ahizong khat kei nong piak tu na nei ziam? Kumpipa thupiakte in tuabang manlang tatakin hong paisak ahikom ka namsau ahizong ngalhiam dang khat po ahizong laak tu hun ka nei nawn bua hi,” ci hi.

⁹Ahimelech in, “Elah Kuam sungah na thalup Philistine te Goliath ii namsau nei khi hi; tuasia ephod ii nungah puan taw kituun in om hi. Na dei le la in — hi sungah a om ngalhiam sia tuasia bekma hi,” ci in zo hi. David in, “Hong pia ta'n, tuasia sangin a phazaw namsau dang koima ah om ngawl hi!” ci hi.

¹⁰Tuabangin David in Saul kung pan tai in, tua mun zongh nusia in, Gath ah kumpipa Achish kung zuan hi.

¹¹Kumpipa ii uliante in, “Hisia David hi kana ngawl ziam? Ama ii ngam sungah kumpipa hi ngawl ziam? Numeite a lap kawmin la a sak uh, ‘Saul in a tul in that a, David in a tulsawm in that hi’ a ci sia hi ngawl ziam?” ci uh hi.

¹²Amate ii kammalte in David thinsung nasia takin patausak hi, tuaciang ama in Kumpipa Achish sia kiita mama hi.

¹³Tua ahikom amate a kiim le a paam ah hong om uh ciang David sia a thin kiamhsak in, a letcip nop uh ciang, mihing mawmaw te bangin kithoai hi; khuapi kongpite tung ngelh zazaan in, a khamul tungah a cil kaaisak dimdum hi.

¹⁴Tua ahikom Achish in uliante munah, “En vun! Hisia pa mawmaw hi! Banghang kei kungah hong paipui nu ziam?

¹⁵Mihing mawmaw a kicing khomkhat nei zo hi ngawl khi ziam? Hi lai ka bangkua sungah ama ii mawmawt ngamtatna te taw ka thin hong nawngkaisak tu in banghang midang khat hong paipui nu ziam?” ci hi.