Read Siyin Chin 1 Samuel 22 Bible Online

1 Samuel 22 - Siyin Chin bible

1 Samuel 22

¹David sia Gath khuapi panin tai in Adullam khua nai suanghawng khat zuan hi. A suapuipate le a innkuanpui dangte in tua thu a zaak ciang ama pawm uh hi.

²Mihing a kinengniamte, leiba neite ahibuale lungkim ngawlna a nei pawpo in ama kungah zuanin, a vekpi a kingawm in pasal 400 bang pha a, ama sia amate lampui suak hi.

³David in tua mun panin Moab ngam Mizpah ah paitan a, Moab kumpipa munah, “Pathian in kei atu bang hong vawtsak tu ci ka heak dong, ka pa le ka nu sia nang kungah na omsak natu in hesuak kong ngen hi,” ci hi.

⁴Tuabangin David in a pa le a nu sia Moab kumpipa kungah nusia a, David ii suanghawng sung a buk lai teng amate tua munah om uh hi.

⁵Tua ciangin kamsaang Gad sia David kungah pai a, “Hi sungah om heak in; Judah ngam ah tu mama in pai in,” ci hi. Tua ahikom David in tua mun nusia in Hereth duisung zuan hi.

⁶Ni khat ni in Saul sia Gibeah ngamsung mualtung makeang kung khat nuai ah tei toai in om a, a ulian teng ama kiim ah dingin om hi. David le a mite sia kimu zo hi ci in ama tungah thu kiko a,

⁷tuaciang ama in a uliante munah, “Benjamin mite awng, ngai vun! David in note theampo lote le sapithuante hong pia in, ama ngalkaphonpi sungah ngalkap ulian hong pia tu in muangmaw nu ziam?

⁸Tuasia hu in kei suam tu hong sawm na hi uh ziam? Ka tapa tilteal in David taw a kipawl hunlam no sung pan khat zongh in hong son ngawl nu hi. Kuama in kei hong thinnuam maw ngawlin, keima mi khat ahi David in tu hun tatak ma in kei hong thalup natu hunpha khat zon saan a, ka tapa in ama hanthawn ahi hunlam hong son ngawl nu hi,” ci hi.

⁹Doeg sia Saul ii uliante taw tua munah a dinkhop laitak ama in, “Nob khua ah Ahitub ii tapa Ahimelech thiampipa kungah David a pai mu khi hi.

¹⁰David in bang teng vawt kul tu ziam ci in Ahimelech in TOPA dongh a, tua zawkciang David an tawm pia in, Philistine mi Goliath ii namsau sia pia hi,” ci in son hi.

¹¹Kumpipa Saul in thiampi Ahimelech le Nob ah thiampite ma ahi a mealheak teng samsak a, hong pai tek hi.

¹²Saul in Ahimelech munah, “Ahimelech awng, hong ngai ta'n,” ci hi. Ama in, “Nong sawl po seam tu khi hi, topa,” ci in zo hi.

¹³Saul in thu dongh a, “Nang le David in banghangin kei hong thasawm nu ziam? Banghangin ama an tawm le namsau pia in, Pathian munah ama atu thu doksak ni ziam? Tu in ama in kei hong langpan a, hong thalup natu hunpha khat ngakin a om laitak hi!” ci hi.

¹⁴Ahimelech in, “David sia nangma nei a thumaanbel ulian hi! Ama sia na maakpa, nangma hong cingte ii ngalkap mang pa, tuaciang kumpipa inn sungah a om theampo ii a zatak mama pa hi.

¹⁵Hi hi, ama atu Pathian tungah thu dongh peu khi hi, ahizong hisia a masa phitbel hi ngawl hi. Nang hong kithasawm na taw kisai in, kumpipa awng, kei ka hizong, ka innkuan sungah a dang khat pawpo ahizong maw hong suan thei ngawl tu ni hi. Hi thu huvau bangma he ngawl khi hi!” ci in zo hi.

¹⁶Kumpipa in, “Ahimelech awng, nang le na mealheak theampo na thi uh kul hi,” ci hi.

¹⁷Tua zawkciang ama a cing, a kungah a dingte munah, “TOPA ii thiampite that vun! Amate in David taw kikum ku in, ama a taimang zongh he napi hong son ngawl hi,” ci hi. Ahihang amate in TOPA ii thiampite thalup natu a khut tungsak nuam ngawl uh hi.

¹⁸Tua ahikom Saul in Doeg munah, “Amate nangma that in!” ci a — tuasia ciang Doeg in thatlum siat hi. Tua ni in ephod a silh thei sa thiampi 85 that hi.

¹⁹Saul in thiampite khuapi Nob khua sungah a teang dangte theampo zongh thalup natu thupia a: pasal, numei, patang le nausen, khuite, laate le tuute — tuate theampo kithat hi.

²⁰Ahihang Abiathar a kici Ahimelech ii tapa khat suakta a, ama in David zuanin pawm hi.

²¹Saul ii TOPA thiampite a thalupna vai ama in son hi.

²²David in ama tungah, “Tua ni in Doeg tua munah ka mu ciang, ama in Saul tungah a son vangiat tu ka heak ma hi. Tua ahikom, na mealheakte theampo ii thina sia keima hang ahi hi.

²³Keima kungah hong om ta'n a, lau heak in. Saul in nang le kei hong thatlum khawm nuam hi, ahihang nang sia kei taw ngammuangin om tu ni hi,” ci hi.