Read Siyin Chin 1 Samuel 25 Bible Online

1 Samuel 25 - Siyin Chin bible

1 Samuel 25

¹Samuel thi a, Israel mi bup hong pai in, ama nusiat hu in khuangai tek hi. Tua zawkciang ama ii teenna Ramah ah phum uh hi. Tua zawkciang Paran duisung ah David pai hi.

²Tua munah Caleb ii phung sung pan Nabal a ci pasal khat om hi, ama sia Maon khua pan hi a, Carmel khua hui ah leitang nei hi. Ama sia a hau mama pa khat hi a, tuu 3,000 le keal 1,000 nei hi. A zi Abigail sia a mealhoi in pil hi, ahihang a pasal sia a iiciil a thin tom khat hi. Carmel khua ah Nabal in a tuute mul meet in om a,

⁴tuaciang duisung ah a om David in ama ii thu za hi,

⁵tua ahikom ama in tangval sawm paisak a, Carmel ah Nabal zongsak in, nuksetna kam thaak hi.

⁶Ama in Nabal tungah amate pau natu teng hil a: “David in hong nukset hi, ka lawmpa awng, nangma atu, na innkuan bup atu le na neisa theampo atu in, a phabel deisakna hong zasak hi.

⁷Ama in nang sia tuumul meetin om ci hong za a, na tuucingte zongh ko taw omkhawmin, bangma kong law ngawl uh sia na heak tu ka dei hi. Carmel ah a om sung tawntung amate ii neisa na khat zongh kinguksak ngeingawl hi.

⁸Amate dongh lete ahi bangin hong son tu hi. Poai khaam ni in ko hong pai khu hi, David in pha takin zin nong do natu hong ngen hi. Nong hesuakna in nong piak thei po ko, na naseamte le na it na lawmpa David hong pia ta'n,” cisak hi.

⁹David mihingte in hi kam vaithak teng David min suangin Nabal tungah son uh hi. Tua zawkciang amate in tua munah ngak uh a,

¹⁰tuaciang Nabal in a khakbel ciangin, “David sia akua ziam? Za zongh za ngei bong! Ih ngamsung sia sila tai khawng taw tu laitak kidim hi!

¹¹Ka an le ka tui, ka tuumul meette atu ngan ka ngawte ii sa la in hong paina mun zongh ka heak ngawl mite pia ngawl tu khi hi,” ci in zo hi.

¹²David ii mite heak kikin Nabal ii ci teng David tungah son kik uh hi.

¹³David in, “Na namsau uh kua vun!” ci in thupia a, amate in tuabang ma in vawt uh hi. David zongh ama namsau kua in, tuaciang a mite 400 khawng taw kuan in, nungsang ah vanhte taw 200 nusia hi.

¹⁴Nabal ii naseamte khat in Nabal zi Abigail munah, “Na za zo ziam? David in duisung pan kamtaite paisak a, ih topa munah, nuksetna kam puaksak kasap ama in ci zazaan hi.

¹⁵Tuabang hi nave, amate ei tungah hong dik mama uh hi; ko hong nawngkaisak ngeingawl hi, tuaciang lo sungah amate taw ka om sung tawntung, ka neisa uh bangma hong kinguksak ngeingawl hi.

¹⁶Tuu honte cingin ka om uh laitakin amate in sun taw zan taw ko hong hung hi.

¹⁷Nong hesuakna in hi thu a pha tak ngaisun in, na vawt tu sia khensat in. Hi sia in ih topa le a innkuanpuite atu lalna piangsak thei tu hi. Ama sia mawmaw thinpui khat hi a, kuama nadon ngawl hi,” ci hi.

¹⁸Abigail in manlang takin anluum 200, savun tuithawl nii dim sapittui, tuu pum em nga, an puakkan kilogramme 17, sapitko bom zakhat, theiko moh luum 200 khawmtua in laa tungah suanh hi.

¹⁹Tua zawkciang a naseamte munah, “No, mai ah pai vun, kei, nung pan kong zui tu hi,” ci hi. Ahihang a pasal munah bangma son ngawl hi.

²⁰Ama a laa tung to in a pai le muallimvei khat ah thakhatin David le a mite hong pai taw kikealsik uh hi.

²¹David in, “Banghangin hisia pa ii neisate hilai duisung ah hun sasak ka na khi ziam? Ama ii neisa khat zongh kinguksak ngeingawl hi, tu in ka huna sa teng hi bangin hong thukkikna ahi ve!

²²Zingsang khuavak ma in tua pasalte khat zongh kikhe ngawlin ka that siat buale Pathian in keima hong vaat tahen!” ci in ngaisun hi,

²³Abigail in David a mu ciang manlang takin a laa tung pan tuakin,

²⁴David peang kung lei ah kisepin, “Topa awng, nong hesuakna in hong ngai ta'n! Keima a mawpu hi tong.

²⁵Bangma kimanna a nei ngawl Nabal sia awlmaw heak in! Ama sia a min ii khiakna — ‘A Mawmaw’ ci sia ma hi takpi hi! Na naseamte hong thet lai in tua munah keima om ngawl luilam khi hi, topa awng.

²⁶Phulam in na ngalte na thalup ngawl natu pan hong keamcing sia TOPA hi. Tuaciang tu in a nungta TOPA taw ka kiciamna pan, na ngalte le nang hong susia nuamte theampo sia Nabal bangin daan thuak tu hi.

²⁷Nong hesuakna in topa awng, kong paipui hi letsong sia hong saang ta'n, na mite pia in.

²⁸Ka khialna a om le nong hesuakna in hong maisak ta'n. TOPA in nangma le na suan na paalte zongh kumpi hong suaksak tu hi, banghang ziam cile ama ii ngalte nangma in na simsak hi; tuaciang na nuntak sung tawntung na tatkha ngei buatu hi.

²⁹Tuaciang mihing khat po in nang hong simin that tu in hong hanciam le TOPA na Pathian in sumngum manphate a kep bangin nang hong keamcing tu hi. Na ngalte ahile, mihing khat ii saili taw suangtang a kaa bangin ama in lawnthal tu hi.

³⁰Tuaciangin TOPA in nang atu hong kamciamsa napha theampo hong tungsak a, Israel kumpipa hong suasak ciangin,

³¹topa awng a thu om ngawl bulin ngual na thalupna ahibuale nangma thu in, phu na lamnate hu in kisii na, thin nop ngawlna na nei buatu hi. Tuaciang TOPA in thupha hong piak zawkciangin, topa, kei hong mangil heak in,” ci hi.

³²David in ama munah, “Tuni in kei taw kisi tu a nang hong puak Israel te ii Pathian TOPA pok tawng!

³³Na khua ngaisut thiamna, tuaciang mihing thalupna khialna lian ka vawt tu le keima thu in phu ka lam natu pan tuni nong kep natu in, na sep na vawt teng hu in Pathian ka pok hi.

³⁴TOPA in nang kong suksiat ngawl natu in kei hong keam zo hi. Ahihang a nungta Israel te ii Pathian taw kiciam in kong sonna pan, keima taw kisi tu in a manlang tatak hong pai buathong le te tu zingsang in, Nabal ii mite theampo thi siat tu hi,” ci hi.

³⁵Tua zawkciang David in ama kungah hong puak letsong teng saang a, “Va cia kik ta'n a, thinngim heak in. Na dei bangin vawt tu khi hi,” ci hi.

³⁶Abigail sia kumpipa khat atu a kilawm poai khat, a inn ah a khaam Nabal kungah ciakik hi. Zu khamin maimua nuamin om a, tua ahikom a zingsang ciang mateng ama ii munah bangma son ngawl hi.

³⁷A zukham hong thai ciang ama in thu theampo son hi. Thakhatin ama sia pumzaw natna hong nga a, a tung thei nawn bua hi.

³⁸Ni sawm khawng zawkciang TOPA in Nabal sia vaatin thi hi.

³⁹Nabal ii thina David in a zaak ciang, “TOPA pok vun! Nabal tungah ama in kei hong nunau hu in phu hong lamsak a, kei a naseampa ii ka khial ngawl natu hong keamcing hi. TOPA in Nabal sia a khansiat hu in daan tat hi,” ci hi. Tua zawkciang David in kiteen natu mo dokna Abigail tungah thaak hi.

⁴⁰A naseamte Carmel ah pai in, “David in a zi tu, nang hong pui tu in ko hong sawl hi,” ci uh hi.

⁴¹Abigail lei ah kun sukin, hi bangin ci hi, “Keima a naseamnu hi a, a naseamte ii peang a silsak tu naseam ka hi hi.”

⁴²Ama manlang tak tho in a laa tungah to hi. A lalang numei nga teng taw David ii naseamte taw ton in, a zi suak hi.

⁴³David in Jezreel mi Ahinoam teenpui zo a, tu in Abigail zongh a zi hong suak hi.

⁴⁴Tua lanin Saul in David ii zi ahi a tanu Michal sia Gallim khua Laish ii tapa Palti a piaksak hi.