Read Siyin Chin 1 Samuel 26 Bible Online

1 Samuel 26 - Siyin Chin bible

1 Samuel 26

¹Ziph khua panin pasal pawlkhat Saul omna Gibeah ah hong pai in David sia Hachilah Mual Judah ngampa ii mong ah buu hi ci in son uh hi.

²Thakhat ma in Saul in Israel ngalkap phabel 3,000 tonpui in Ziph duisung ah David zong tu in pai a,

³tuaciang Hachilah Mualtung lampi hui ah ngiaphual saat uh hi. David sia duisung ah om lai a, ama zong tu in Saul hong pai ci in a heak ciang,

⁴ngalvilte a paisak le, Saul sia tua munah na om takpi hi.

⁵Ama thakhatin pai a, Saul le Ner ii tapa Abner, Saul ii ngalkap hon ukpipa lupna mun tatak ma mu hi. Saul sia ngiaphual sung sangah lum a, a mite sia ama ii kiim ah ngiaphual saat uh hi.

⁶Tuasia ciang David in Hit mi Ahimelech le Joab ii suapuipa Abishai (A nu uh sia Zeruiah hi), te munah, “No nii akua zaw in Saul ii ngiaphual ah hong zui tu nu ziam?” a ci ciang, Abishai in, “Keima hong zui tong,” ci hi.

⁷Tua zanin, David le Abishai te Saul ii ngiaphual sung sangah tum in, Saul sia ngiaphual laizang ah mutchip in a om mu a, a luthung ah a tei phut hi. Abner le ngalkapte a kiim ah mu uh hi.

⁸Abishai in David munah, “Pathian in na ngalpa na khut sungah tu zanin hong pia hi. Tu in ama ii tei taw ma in keima in ama lei taw cip in hong sunletsak ta'n, khatvei sut taw kiman tu hi — niivei ka sut kul ngawl tu hi!” ci hi.

⁹Ahihang David in, “Ama susia ngawl het tu ni hi! TOPA in ama ii tealsa kumpipa a susia peuma daan pia nanak tu hi,” ci hi.

¹⁰David in a pau zomto lai in, “Thi kum tungin, thi ngei a thi tu ahizong, ngalphual ah thi tu ahizong, TOPA ama mama in Saul sia thatlum tu ci in a nungta TOPA tungtawnin he khi hi.

¹¹TOPA in ama ii koisa kumpipa sia ka suksiat tu oai ngawl hi! A tei le a tuithawl la in, pai ka tawng,” ci hi.

¹²Tuabangin David in Saul ii tei le a tuithawl Saul ii luthung pan la a, ama le Abishai in nusia uh hi. Kuama a mu om ngawl, bang thu piang ci in a he zongh om ngawlin, a khanglo beak zongh a om bua uh hi — amate a vekpi in mutchip dipdeap uh hi, banghang ziam cile TOPA in a mutciiksak hi.

¹³David in a kuam langkhat kaantan in mualdawn, a khuala khopna mun khat panin,

¹⁴Saul ii ngalkapte le Abner ama in oksan a, “Abner awng! Nong za thei ziam?” ci hi. Abner in, “Kumpipa phawng tu in a au sia akua ziam?” ci in dongh hi.

¹⁵David in “Abner, nang sia Israel ngam ah mi lianbel hi ka na ngawl ni ziam? Banghangin na topa kumpipa hung zo ngawl ni ziam? Tu ma hiat in na topa thatlum tu in mihing khat ngiaphual sungah hong tum hi.

¹⁶Na vaipuak lel ni hi, Abner awng! A nungta TOPA taw kiciamin kong cina pan, no theampo a thi tu kilawm nu hi, banghang ziam cile TOPA ii kumpipa a suasak na topa uh hung ngawl nu hi. En in! Kumpipa ii tei koisungah om ziam? A lu hui a tuithawl sia koisung om ziam?” ci in zo hi.

¹⁷Saul in David ii aw tel a, “David ka tapa awng, nangma ni ziam?” ci in dongh hi. “Hi khi hi, kumpipa awng,” ci in David in zo hi.

¹⁸Tuaciang ama in, “Topa awng, kei na naseampa banghangin hong delkot lai ni ziam? Bang vawt na khi ziam? Bang khialna lian vawt khi ziam?

¹⁹Kumpipa awng, kong son tu sia na ngai in. Kei nong langpan natu hong vawt pa sia TOPA ahile ama tung a biakpiakna khat vawt leang a thin khealsak tu hi; ahihang mihingte ii vawt ahile TOPA haamsiatna amate tungah tung tahen. Banghang ziam cile TOPA ii ngam le lei panin ngamdang pathiante bek ka biak thei natu ngam ah kei hong kinotkeak hi.

²⁰TOPA taw a kikhuala ngamdang leitang tungah thalup hong thuaksak heak in. Banghangin Israel ii kumpipa in kei uili khat bang ahi sia that tu in hong pai ziam? Ngam sungah vacimte khat vai bangin ama in banghang hong vai zui hi tu ziam?” ci lai hi.

²¹Saul in, “Keima khial zo khi hi. Hong heak kik ta'n, David ka tapa awng. Bangma hong law kik ngawl tu khi hi, banghang ziam cile tu zanin ka nuntakna hong khoaikhe ni hi. Kei sia mawmaw khi hi! A lipkhaphuai mama na khat vawt zo thong khi hi!” ci in zo hi.

²²David in, “Kumpipa awng, hi sungah na tei om hi. Na mihingte khat hong paisak in hong lasak ta'n.

²³TOPA in a thumaante le a thutangte tel pia hi. Tuni in ama in nang, keima khut sungah hong pia hi, ahihang TOPA ii kumpipa in hong koisa nang sia kong susia bua hi.

²⁴Na nuntakna tuni in kong khoaikhet bangma in, TOPA in kei tungah hong vawt in ngim ngana theampo pan hong suaktasak tahen!” ci in zo kik hi.

²⁵Saul in David munah, “Pathian in thupha hong pia tahen, ka tapa awng! Na sep na vawt theampo zo tu ni hi!” ci hi. Tuabangin David, ama ii pai natu ah pai a, Saul sia inn ah ciakik hi.