Read Siyin Chin 1 Samuel 3 Bible Online

1 Samuel 3 - Siyin Chin bible

1 Samuel 3

¹Tua hun lai, patang Samuel in Eli ii lamlakna bang a TOPA atu a sep lai in, TOPA tung pan thu hong pai sia tawm mama hi, tuaciang mang muna te tam ngawl hi.

²Tu in a mit a taw cip dektak Eli sia, zan khat, ama inndoi sungah mu in om hi;

³Samuel sia Thuciamna Thingkuang thiangtho omna biakpiakna munah mu in om hi. Khuavak ma, meiinn a taan laitak ma in,

⁴TOPA in Samuel sam hi. Ama in “Hi sungah om ing, topa!” ci in zo hi,

⁵tuaciang Eli kungah tai a, “Kei nong sap sia, hi sung ma ah om khi hi,” ci hi. Ahihang Eli in zo a, “Nang hong sam ngawl khi hi; lum kik ta'n,” ci hi. Tua ahikom Samuel sia a lupna zuan kik hi.

⁶TOPA in Samuel sam kik hi. Patangpa in TOPA ahi hunlam a he bua hi, banghang ziam cile tua masia in TOPA in ama a paupui ngei bua hi. Tua ahikom ama tho in Eli kungah pai a, “Nong sap sia hi sungah om khi hi,” ci hi. Ahihang Eli in, “Ka tapa awng, hong sam ngawl khi hi; lum kik ta'n,” ci hi.

⁸TOPA in Samuel sia a thum veina sam hi; ama tho a, Eli kungah pai in, “Nong sap sia, hi sungah om khi hi,” ci hi. Tuasia ciang Eli in patang a sam sia TOPA ahi hunlam phawk hi.

⁹tua ahikom ama munah, “Lupna zuan kik ta'n; tuaciang ama in hong sam kik le hi bangin ci in, ‘TOPA awng pau in, na naseampa in hong ngai khi hi,’ ci ta'n,” ci hi. Tua ahikom Samuel sia lupna zuan kik hi.

¹⁰TOPA hong pai a tua munah dingin, a masa bangma in sam kik a, “Samuel! Samuel!” ci hi. Samuel in zo a, “Hong paupui ta'n; na naseampa in hong ngai khi hi,” ci hi.

¹¹TOPA in ama munah, “Ni khat ni ciang Israel mite tungah a lauhuai mama khat ka vawt tu a, a za peuma lau ngawp tu hi.

¹²Tua ni in Eli innkuante ka tawnna theampo a kipat pan a tawp dong ka tungsak tu hi.

¹³Ama munah a bangkua sia a tawntung daan ka piak tu son zo khi hi, banghang ziam cile a tapate kei hong langpanin kamsia pau uh hi. Eli in hite sia he nginge ahihang tho ngawl hi.

¹⁴Tua ahikom Eli ii bangkua tungah sangaw biakpiakna ahizong, piakkhiatna ahizong bangma in, hi a lipkhaphuai mama mawna taw a kizui a piang tu te pengsak zo ngawl tu hi ci in ciliap huai takin ka taangko hi.

¹⁵Samuel sia zingsang dong lupna tungah om hi; tua zawkciang tho in, TOPA inn kongkha hong hi. A mangmuna huvau Eli tungah a son tu sia lau hi.

¹⁶Eli in, “Samuel, ka patangpa awng!” ci in sam hi. “Om khi hi, topa” ci in Samuel in zo hi.

¹⁷Eli in, “TOPA in bang hong son ziam?” ci in dongh hi. “Kei tungah bangma hong iim heak in. Hong son theampo nong son buale Pathian in nasia takin daan hong pia tu hi,” ci hi.

¹⁸Tua ahikom Samuel in ama tungah na theampo son a, bangma kheet a nei bua hi. Eli in, “Ama sia TOPA hi; phabel a sak bangin ama in seam tu hi,” ci hi.

¹⁹Samuel hong khan ciang TOPA sia ama taw omkhawm a, Samuel ii son teng a vekpi in taangtungsak hi.

²⁰Tua ahikom Israel mi theampo, a ngam mong pan a mong khat dongin, Samuel sia TOPA kamsaang takpi hi ci in he uh hi.

²¹TOPA in ama le ama sia Shiloh ah a kizomin Samuel tungah hong kilaak a, paupui hi. Tuaciang Samuel ii a pau ciang, Israel theampo in ngai uh hi.