Read Siyin Chin 1 Samuel 4 Bible Online

1 Samuel 4 - Siyin Chin bible

1 Samuel 4

¹Tua hun laitakin Philistine te in Israel sim tu in kikaikhawm ahikom Israel te sia amate do tu in kuan uh hi. Israel te in Ebenezer ah, Philistine te in Aphek ah ngiaphual saat uh hi.

²Philistine te in simin, a nasia mama in a kido zawk uh ciang Israel te zo a, ngalphual ah mihing 4,000 bang that uh hi.

³A thimong teng ngiaphual hong thet kik uh ciangin Israel lampuite in, “Banghangin TOPA in tuni in ei hong lelsak ziam? TOPA ei taw tonkhawmin ih ngalte khut pan hong hut natu in Shiloh ah pai in TOPA ii Thuciamna Thingkuang va la tawng,” ci uh hi.

⁴Tua ahikom amate in kamtaite Shiloh ah paisak a, tha nei cherubim te ii tungah kumpi in a maang Vaanglianbelpa TOPA ii Thuciamna Thingkuang sia lasak hi. Tuaciang Eli ii tapate nii Hophni le Phinehas te Thuciamna Thingkuang taw hong ton uh hi.

⁵Thuciamna Thingkuang hong thet ciangin Israel te nasia takin lungdamna taw au ahi uh ciang, lei liing liang hi.

⁶Philistine te in a au uh za in, “Hebrew te ngiaphual ah a auna ngai vun! A khiakna bang ziam?” ci uh hi. TOPA ii Thuciamna Thingkuang sia Hebrew ngiaphual ah a thet a heak uh ciang,

⁷amate lau in, “Pathian khat amate ngiaphual theng hi! Eite mansa hi hing! Tu ma sia in hi bang peuma piang ngeingawl hi!

⁸Tua a vaangnei pathiante tung pan ei akua in hong hun zo tu ziam? Tua pathiante sia sennealngam sungah Egypt te a monte ahi hi!

⁹Hang vun, Philistine te awng! Pasal bangin do vun, tua ahibuale amate eima sila ahi bangma, amate ii sila ih suak tu hi. Tua ahikom pasal bangin do vun!” kici uh hi.

¹⁰Philistine te in nasia takin do in, Israel te zo uh a, amate sia a inn zuanin tai uh hi. Nasia takin kithalupna om a: Israel ngalkapte 30,000 thi uh hi.

¹¹Pathian ii Thuciamna Thingkuang matsak a, Eli tapate Hophni le Phinehas te ngeal thatlum hi.

¹²Benjamin namte pasal khat ngalphual panin Shiloh ah tai vingveng a, hong ni tut hi. A khuangaina lianpi a lak natu in a puansilhte hong eaukeak a, a lu tungah leivui koi hi.

¹³Thuciamna Thingkuang atu a thinngim mama Eli sia lampi hui tokhum tungah to in mun khat salh nginge hi. Pasal pa in khuasung bup ah thu thangsak a, a kuama theampo in lau in au keak uh hi.

¹⁴Eli in ngamlumna aw za in donghsak hi. “Hi ngamlumna aw sia bang thu ziam?” ci hi. Eli kungah a thuson tu in tua pa manlang takin hong pai hi.

¹⁵(Eli sia tu in kum 98 pha in a mittaw cip dek tak zo hi.)

¹⁶Pasal pa in, “Kei ngal kisimna pan suakta in, tuni in hisung dong lam tawntung kong tai hi,” ci hi. Eli in ama dongh a, “Bang thu piang ziam, ka tapa awng?” ci hi.

¹⁷Kamtai pa in, “Israel te sia Philistine te mai pan taikeak hi; ei atu a nasia mama lelna hi! Tua banah na tapate nii Hophni le Phinehas sia hong thalupsak hi, tuaciang Pathian ii Thuciamna Thingkuang hong kimatsak hi!” ci hi.

¹⁸Pasal pa ii Thuciamna Thingkuang thu a son ciang, kongpi hui a tona pan Eli thalpu hi. Ama huai mama a, thau si ahikom a puksukna in a ngawng tal a, thi hi. Ama sia Israel ah kum 40 lampui seam hi.

¹⁹Eli monu, Phinehas ii zi sia naungil om in nausua tu hun theng dektak hi. Pathian ii Thuciamna Thingkuang kiman a, a topasal le a pasal thina thu a zaak ciang thakhat thu in a nau tun in ta nei hi.

²⁰Ama a thi nai tu ciang ama a hu numei sia in, “Na thinliansak in! Tapa khat nei ni hi!” ci hi. Ahihang ama in nangai ngawlin, a zo bua hi.

²¹Ama in a tapa min sia Ichabod phuak hi, a khiakna sia, “Pathian ii vaangletna in Israel nusia zo,” a cina hi, Thuciamna Thingkuang kimatna le a topasal le a pasal thina teng kilhtua in a phua khop ahi hi.

²²Ama in, “Pathian ii vaangletna in Israel nusia zo hi, banghang ziam cile Pathian ii Thuciamna Thingkuang sia hong kimatsak hi,” ci hi.