Read Siyin Chin 1 Samuel 5 Bible Online

1 Samuel 5 - Siyin Chin bible

1 Samuel 5

¹Philistine te in Thuciamna Thingkuang a matsak zawkciang, Ebenezer panin amate khuapi Ashdod ah pua uh a,

²amate ii Dagon pathian biakinn sungah tumpui in, a milim hui ah koi uh hi.

³A zing ciang zingtuungin Ashdod mite ii milim sia Thuciamna Thingkuang mai lei ah lutu in a puk mu uh hi. Tua ahikom amate in phongto in a omna ngei ah koi kik uh hi.

⁴A zing kik ciang zingtuungin amate in a milim sia TOPA Thuciamna Thingkuang mai ah a pukin mu kik uh hi. Tusia ciang a lu le a khutte nii taltan in kongbiang ah liik a; a pumpi bekma kinusia hi.

⁵(Tua hu in tuni dong ma Dagon thiampite le Ashdod a biakpiakna a vawt mite theampo in tua mun sia a pai ngei bangin pai ngawlin kan valian uh hi.)

⁶TOPA in Ashdod mite sia nasia takin daan pia a, lausak ngawp hi. Amate le a kiim a paam a om mite sia TOPA in daan pia a, meima pui veu veisak hi.

⁷Amate in tua thupiangte a mu uh ciang, “Israel ii Pathian in ei le ih Dagon pathian daan hong pia hi. Thuciamna Thingkuang sia hi lai ei kungah ki omsak thei nawn ngawl tu hi,” ci uh hi.

⁸Tua ahikom a kamtai te in Philistine kumpi nga teng samsak a, “Israel ii Pathian ii Thuciamna Thingkuang sia bang law tu hi ziam?” ci in dongh uh hi. Amate in, “Tuasia Gath ah paipui tavun,” ci in zo uh hi; tua ahikom amate in Philistine khuapi dang khat ahi Gath ah paipui uh hi.

⁹Ahihang tuasung a thet ciang TOPA in tua khuapi zongh daan ma pia a, patauna nasia takin om hi. Khuapi sungah mihing theampo, a huai a khang a kibangin meima pui veisak hi.

¹⁰Tua ahikom amate in Thuciamna Thingkuang sia Ekron a kici Philistine te khuapi dang khat ah puak uh hi; ahihang tuasung a thet ciang, mihingte au keak in, “Israel te ii Pathian ii Thuciamna Thingkuang sia amate in ei theampo hong thalup natu in hi sung hong then hi!” ci uh hi.

¹¹Tua ahikom Philistine kumpite theampo sam kikin, “Israel ii Thuciamna Thingkuang sia, ei le ih innkuanpuite hong thalup ngawl natu in, a omna ngei ah puak kik tavun,” ci uh hi. Pathian in amate nasia takin daan pia ahikom khuapi sung bup ah patauna om hi.

¹²A thi ngawlte zongh meimapui vei ahikom mipite in amate ii pathiante munah hu ngenin au uh hi.