Read Siyin Chin 1 Samuel 6 Bible Online

1 Samuel 6 - Siyin Chin bible

1 Samuel 6

¹Philistia ngam ah Thuciamna Thingkuang tha sali a om zawkciang,

²mipite in thiampite le mitbum he te sam in, “TOPA ii Thuciamna Thingkuang sia bang law tu hi ziam? A omna ngei ah puak kik tu ih hile, bang taw tha tu hi ziam?” ci in dongh uh hi.

³Amate in, “Israel te ii Pathian ii Thuciamna Thingkuang na heak kiksak tu uh le na mawphel natu uh in ama atu letsong khat taw na kikopsak uh kul tu hi. Thuciamna Thingkuang sia letsong khat ngawl taw heak kik thei ngawl het tu hi. Tuabang taw in note na dam tu uh a, banghangin ama in no daan hong pia tawntung ziam ci sia na he tu uh hi,” ci uh hi.

⁴“Ama bang letsong pia tu hi ziam?” ci in mite in dongh uh hi. Amate in zo kik a, “Khamh taw a kivawt meimapui lim nga le Philistine kumpi khat sim atu khamh sanchiim lim nga hi tu hi. Ngimna lianpi sia a kibangin no theampo tung le kumpi nga teng tungah hong tung hi.

⁵Na ngam buppi ah ngim hong pia meimapui le sanchiim lim te vawt hamtang in Israel te ii Pathian sia upat vawt nanak tu nu hi. Tua hile ama in noma, na pathian te le na ngam daan hong piakna tawp tha tu hi.

⁶Egypt kumpipa le Egypt mite bangin banghangin na thinpuisak tu nu ziam? Israel mite ii Egypt a nusiat mateng Pathian in Egypt te a mawmaw bangin a vawt sia ciamtee vun.

⁷Tua ahikom leang thak khat vawt vun a, kanhak a kibul ngeingawl khuipui nii la in, leang ah thua vun, a khuinote sia khuibuk sungah beng kik vun.

⁸TOPA ii Thuciamna Thingkuang la in, leang tungah suan vun, tuaciang na mawna phelna in letsong na piak tu uh, khamh lim note sia thingkuang dang khat sungah heangin tuasia kungah koi vun. Khuileang a pai natu lampi ah ama thuthu in a pai natu in kipansak vun.

⁹Tua zawkciang a paina en vun; Beth Shemesh sang a zuan le Israel te ii Pathian in hi a kiitakhuai tuasiatna hong puak hi, a cina hi. Tuabang a zuan buale, ngimnate sia ama ii hong puak hi ngawl a; a luilamna in a piang hi bek hi, ci in ih he tu hi,” ci uh hi.

¹⁰Amate in a kisawl bangin ngamta uh hi: amate in khuipui nii la in leang ah thua uh a, khuinote sia khuibuk sungah khumcip uh hi.

¹¹Amate in Thuciamna Thingkuang sia meimapui le sanchiim limte a kikoina thingkuang taw leang tungah koi khawm uh hi.

¹²Khuikaap in Beth Shemesh paina sang zuan tu in kipan in, tua khua sangah tangtan in pai a, lam a pial bua hi. Tuate sia a pai kawmin haam uh hi. Philistine kumpi nga teng in Beth Shemesh ngamngi dong zui uh hi.

¹³Beth Shemesh khua mite, kuam sungah zungtaang at in a om laitak, thakhat thu in a etto uh le Thuciamna Thingkuang mu uh hi. Amate in a mu ciangin lungdam leilam uh hi.

¹⁴Beth Shemesh khua ah a teang Joshua a kici pasal khat ii lo sungah a leang pai a, suangpi khat ii hui ah tawlnga hi. Mite in leang sia sem tham a, khuipuite ngoin, TOPA tungah meihal sangaw biakpiakna in nei uh hi.

¹⁵Levi te in TOPA ii Thuciamna Thingkuang le khamh limnote a kikoi thingkuang sia laamto in, suangpi lian sia tungah koi uh hi. Tua zawkciang Beth Shemesh khua mite in meihal sangaw biakpiakna le a dang sangaw biakpiakna te TOPA tungah vawt uh hi.

¹⁶Philistine kumpi nga teng in hisia en uh a, tua zawkciang tua ni ma in Ekron ah cia kik uh hi.

¹⁷Philistine mite in a khuapi ngate Ashdod, Gaza, Ashkelon, Gath, le Ekron te atu in khua khat ah khat tek a khamh meima pui nga sia TOPA tungah mawphel natu in pia uh hi.

¹⁸Philistine kumpi ngate ii uk ahi a ki uum khuate hikale, a ki uum ngawl khuanote hikale khuapi sim atu in khamh sanchiim lim khat tek zongh pia si hi. TOPA ii Thuciamna Thingkuang koina Beth Shemesh khua mi Joshua lo sungah a om tua suangpi sia tualai ah a piang thu te ii tetti in tuni dongin om lai hi.

¹⁹Thuciamna Thingkuang sungsang a et hu in Beth Shemesh khua mite 70 TOPA in thatlum hi. Tuaciang TOPA in tuabangin nasia tak thalupna a thuaksak hu in mipite khuangai in tau uh hi.

²⁰Tua ahikom Beth Shemesh mite in, “Hi a thiangtho Pathian, TOPA mai ah akua peuma dingtang zo tu hi ziam? Ei taw a kikhuala thei natu in ama koisungah puak tu hi ziam?” ci uh hi.

²¹Amate in kamtaite paisak a, Kiriath Jearim mite munah, “Philistine te in TOPA Thuciamna Thingkuang hong heaksak kik zo hi. Hong paisuk tavun a, tua vun,” ci uh hi.