Read Siyin Chin 1 Samuel 8 Bible Online

1 Samuel 8 - Siyin Chin bible

1 Samuel 8

¹Samuel a huai ciangin, a tapate Israel thukhenmang seamsak hi.

²A u min sia Joel hi a, a nau zaw sia Abijah hi; amate sia Beersheba ah thukhen hi.

³Ahihang amate in a pa nasep bangin a seam bua uh hi; amate in sum vawt tu bek kin ahikom, sumnguk ne in thumaan thutang taw thu a khen bua uh hi.

⁴Tuasia ciang Israel lampui theampo kikhawmtua in, Ramah ah a om Samuel kungah pai a,

⁵“En in, nang sia haam vaial zo a, tuaciang na tate sia nang sul hong zui ngawl hi. Tuabang ahikom ngamdangte ii nei bangin, ko hong uk tu kumpipa khat hong tealsak ta'n,” ci hi.

⁶Samuel sia amate ii kumpipa khat a ngetna huvau lungkim ngawl hi; tua ahikom ama in TOPA tungah thungen hi,

⁷tuaciang TOPA in, “Mipite ii nang tungah hong son theampo ngai in. Amate ii nial sia nang hi ngawl ni hi; keima sia a kumpipa ka hina hong nial hi.

⁸Egypt panin amate ka pusua pui pan kipan, amate in kei hong nusia in pathian dangte bia uh hi; kei tungah hong vawt tawntung teng tu in nang tungah hong vawt hi.

⁹Tuabang ahikom, amate thu ngai in a, ahizong a kumpipate in amate bangbangin vawt tu ziam ci sia a kidop khol natu a pha tatakin son in,” ci hi.

¹⁰Samuel in kumpipa khat a ngen mipite tungah, TOPA ii ama tungah a ci teng son siat hi.

¹¹Samuel in, “Hisia in na kumpipa ii no hong vawt tu dan ahi hi. Ama in na tapate ngalkap suaksak tu hi; pawlkhat sia a siphu ngalleang te uksak tu hi, a dangte sia siphu ngalkap suaksak tu a, tuaciang pawlkhat sia siphu ngalleangte ii mai ah taisak tu hi.

¹²Ama in pawlkhat te sia mihing tulkhat ukin koi tu a, pawlkhat sia mihing sawmnga uk in koi tu hi. Na tapate in ama lote a thawsak uh kul tu a, a an laaksakin, a ngalhiamte le siphu ngalleang sungah a kizangh vanhte vawtsak tu hi.

¹³Na tanute sia ama ii sathau namtui vawtsak in, a anhuan, a moh emte hisak tu hi.

¹⁴Ama in noma lo phabel te, sapithuante le olive kungte la in a uliante pia tu hi.

¹⁵Noma lo an sawm a khat le na sapit uh sawm a khat la in, a kumpi inn sung uliante le zum naseam dangte hawmsak tu hi.

¹⁶Ama in na naseamte, na khui phabelte le laate la tu a, na seamsak tu hi.

¹⁷Na tuu honte sung pan sawm a khat ama in la tu hi. Tuaciang noma mama zongh ama ii silate na suak tu uh hi.

¹⁸Tua hun hong thet ciang, noma ii tealsa na kumpipa hangin nasia takin na phun na mau tu uh hi, ahihang TOPA in na phun na mauna uhte hong ngai ngawl tu hi,” ci in sonthiang hi.

¹⁹Mipite in Samuel nadon ngawlin, “Phamaw bo!

²⁰Ngamdangte taw ka kiban natu in ko zongh kumpipa khat dei khu hi, ko hong uk tu le ngalmai si in a do tu kumpi tuam dei khu hi,” ci uh hi.

²¹Samuel in amate ii son theampo ngai a, tua zawkciang pai a, TOPA tungah son hi.

²²TOPA in, “Amate dei bangin vawt in a, kumpipa khat amate pia ta'n,” ci in zo hi. Tua zawkciang Samuel in Israel mite theampo a inn uh ah cia kikin sawl hi.