Read Somali Bible, 2008 Sabuurradii 48 Bible Online

Sabuurradii 48 - Somali Bible, 2008 bible

Sabuurradii 48

¹Rabbigu waa weyn yahay, waana in aad loogu ammaanaa Ilaaheenna magaaladiisa, iyo buurtiisa quduuska ah.

²Waxaa dhererka ku quruxsan, oo farxad u ah dunida oo dhan Buur Siyoon oo dhanka woqooyi ah, Meeshaas oo ah magaalada Boqorka weyn.

³Ilaah wuxuu daaraheeda dhaadheer isku muujiyey inuu magangal yahay.

⁴Waayo, bal eeg, boqorradii way iswada urursadeen, Dhammaantood way wada dhaafeen.

⁵Oo kolkay arkeen ayay yaabeen, Oo argaggexeen, markaasay haddiiba carareen.

⁶Iyagii halkaasay ku gariireen, Wayna ku xanuunsadeen sida naag foolanaysa.

⁷Doonniyaha Tarshiish waxaad ku jejebisaa Dabaysha bari.

⁸Annagu sidaan maqalnay, ayaan ku dhex aragnay Magaalada Rabbiga ciidammada, taasoo ah magaalada Ilaaheenna, Ilaah ayaa weligeedba adkayn doona. (Selaah)

⁹Ilaahow, raxmaddaada ayaan ka fikirnay Markaan macbudkaaga ku jirnay.

¹⁰Ilaahow, sida magacaagu yahay Ayaa ammaantaaduna ku tahay dhulka darafyadiisa oo dhan, Gacantaada midigna waxaa ka buuxda xaqnimo.

¹¹Buur Siyoon ha faraxdo, Oo gabdhaha reer Yahuudah ha ku reyreeyeen xukummadaada daraaddood.

¹²Siyoon hareeraheeda socda, oo ku soo wareega, Oo munaaradaheeda tiriya.

¹³Bal aad ugu fiirsada qalcadaheeda, Oo ka fikira daaraheeda dhaadheer, Si aad ugu sheekaysaan farcanka soo socda.Waayo, weligiis iyo weligiisba Ilaahan ayaa Ilaah inoo ah, Oo isagaa hoggaamiye inoo ahaan doona xataa tan iyo dhimashada.

¹⁴Waayo, weligiis iyo weligiisba Ilaahan ayaa Ilaah inoo ah, Oo isagaa hoggaamiye inoo ahaan doona xataa tan iyo dhimashada.