Read Sosoxi Matiyu 4 Bible Online

Matiyu 4 - Sosoxi bible

Matiyu 4

¹Ala Xaxili naxa Isa xun ti gbengberenyi ma alako Ibulisa xa sa kata a xa a ratantan.

²Isa to nu bara sun xi tongo naani, kɔɛ nun yanyi, kaamɛ nu na a ma.

³Maratantanma to maso a ra, a naxa a fala a bɛ, «Xa Ala xa Di nan i ra, yaamari fi yi gɛmɛe xa findi taami ra.»

⁴Isa naxa a yaabi, «A sɛbɛxi Kitaabui kui, ‹Mixi mu baloma taami gbansan xa ra. Ala xa masenyi birin findixi baloe nan na adama bɛ.›»

⁵Ibulisa naxa a xanin Darisalamu, taa sɛniyɛnxi, a a ti Ala xa hɔrɔmɔbanxi fari, yire itexi.

⁶A naxa a fala a bɛ, «Xa Ala xa Di nan lanxi i ma, tugan, barima a sɛbɛxi,‹Ala yaamari fima nɛ a xa malekɛe ma i xa fe ra,›‹e e bɛlɛxɛe rasoma nɛ i bun ma,e i ralaxun alako i sanyi naxa din gɛmɛ ra.›»

⁷Isa naxa a yaabi, «Iyo, kɔnɔ a man sɛbɛxi Kitaabui kui, ‹I naxa i Marigi Ala mato.›»

⁸Ibulisa man naxa a xanin geya itexi fari, a fa duniɲa mangɛya birin masen a bɛ, e nun e xa dariyɛ.

⁹A naxa a fala a bɛ, «N yi birin fima nɛ i ma xa i suyidi n bɛ, i n batu.»

¹⁰Isa naxa a yaabi, «Sentanɛ, keli be! A sɛbɛxi Kitaabui kui, ‹I xa i Marigi Ala gbansan nan batu, i xa suyidi a keren nan bɛ.›»

¹¹Na wɔyɛnyi dangi xanbi, Ibulisa naxa keli a xun. Malekɛe naxa e maso Isa ra, e a sɛnbɛ so. Isa a xa wali fɔlɔfe Galile bɔxi ma

¹²Isa to a mɛ a Yaya bara sa geeli, a naxa gbilen Galile bɔxi ma.

¹³A naxa keli Nasarɛti taa kui, a sa sabati Kapɛrɛnamu, taa nde naxan nu na baa dɛ ra, Sabulon nun Nafatali bɔxi ma.

¹⁴Na naxa raba alako Annabi Esayi xa masenyi xa kamali,

¹⁵«Sabulon nun Nafatali bɔxi,naxee na kira ra sigafe baa dɛ ra Yurudɛn naakiri,wo findixi Galile bɔxi nan na naxan na si gbɛtɛe bɛlɛxɛ.

¹⁶Ɲamanɛ naxan dɔxɔxi dimi kui,e bara naiyalanyi belebele to.Naxee dɔxɔxi faxɛ xa dimi kui,naiyalanyi bara mini e bɛ.»

¹⁷Keli na tɛmui ma, Isa naxa kawandi ti fɔlɔ, a nu a fala, «Wo tuubi, barima Ala xa mangɛya niini bara makɔrɛ.» Isa a fɔxirabirɛ singee xilife

¹⁸Isa to nu ɲɛrɛfe Galile baa dɛ ra, a naxa xɛmɛ firin to e na yɛlɛ wolife. Yɛxɛsuxuie nan nu e ra, Simɔn, naxan xili Piyɛri, a nun a xunya Andire.

¹⁹Isa naxa a fala e bɛ, «Wo bira n fɔxɔ ra. Tɛmui dangixi wo nu yɛxɛ nan suxuma, kɔnɔ yakɔsi n a niyama wo xa nu mixie nan sɔtɔ n bɛ.»

²⁰E naxa e xa yɛlɛe lu na keren na, e bira Isa fɔxɔ ra.

²¹E to siga, e naxa xɛmɛ firin gbɛtɛ to, Sebede xa di Yaki nun a xunya Yaya. E nu na yɛlɛe madɛgɛfe kunkui kui e baba Sebede fɛ ma. Isa naxa e xili,

²²e fan naxa kunkui nun e baba lu na keren na, e bira Isa fɔxɔ ra. Isa mixie kawandife nun furemae rayalanfe

²³Na xanbi Isa naxa Galile bɔxi birin isa fɔlɔ. A nu mixie xaranma e xa salidee kui, a nu e kawandi Ala xa mangɛya niini xa xibaaru fanyi ra, a nu furema mɔɔli birin nayalan ɲama ya ma.

²⁴A xili naxa te Siriya bɔxi birin ma. Mixie naxa fa furema mɔɔli birin na a xɔn ma. E nu fama mixie ra naxee nu na tɔɔrɔfe a ɲaaxi ra, ɲinnɛ nu naxee fɔxɔ ra, bira fure nu na naxee ma, a nun namatɛe. Isa nu e birin nayalanma.

²⁵Ɲama gbegbe naxa bira a fɔxɔ ra kelife Galile bɔxi ma, Taa Fu bɔxi, Darisalamu, Yudaya, nun bɔxi naxan na Yurudɛn naakiri ma.