Read Sosoxi Luki 1 Bible Online

Luki 1 - Sosoxi bible

Luki 1

¹Mixi wuyaxi bara kata e xa dɛntɛgɛ sa fee ma naxee dangixi muxu tagi.

²E a sɛbɛxi nɛ alɔ muxu fan a mɛxi mixie ra ki naxɛ, naxee a birin to kabi a fɔlɛ, e man fa findi xibaaru fanyi xa masenyi kawandilae ra.

³Na kui, n fan to bara na fe birin mato ki fanyi naxee rabaxi kabi a fɔlɛ, n bara a maɲɔxun fe fanyi ra, n xa a birin sɛbɛ i bɛ, n ba Teyofilo.

⁴N yi rabaxi nɛ, alako i xa a kolon, a i xaranxi naxan na, a findixi nɔndi nan yati ra. Malekɛ xa masenyi Annabi Yaya xa fe ra

⁵Yudaya mangɛ Herode xa waxati, sɛrɛxɛdubɛ nde nu na naxan xili Sakari. A nu na Abiya xa sɛrɛxɛdubɛ lanxundɛ nan kui. A xa ginɛ Elisabɛti fan kelixi Haruna bɔnsɔɛ nɛ.

⁶E firin birin nu tinxin Ala ya i. E nu ɲɛrɛma Ala xa sɛriyɛ nun yaamari birin ma sɛniyɛnyi kui.

⁷Di yo mu nu na e yi ra barima Elisabɛti mu nu nɔma di baride, e firin birin man nu bara fori.

⁸Sakari xa lanxundɛ wali tɛmui to a li, a naxa sɛrɛxɛdubɛ walie suxu Ala ya i.

⁹Alɔ sɛrɛxɛdubɛe nu darixi a ra ki naxɛ, Sakari booree nu bara a sugandi Ala xa mali ra, a tan nan xa so hɔrɔmɔbanxi kui surayi gande Ala ya i.

¹⁰Surayi gan tɛmui, ɲama birin nu na salife tande.

¹¹Na tɛmui, Marigi xa malekɛ nde naxa mini Sakari ma surayi sɛrɛxɛbade yirefanyi ma.

¹²Na naxa Sakari tɛrɛnna, a naxa a gaaxu ki fanyi.

¹³Kɔnɔ malekɛ naxa a masen a bɛ, «Sakari, i naxa gaaxu, barima Ala bara i xa duba suxu. I xa ginɛ Elisabɛti fama di xɛmɛ sɔtɔde i bɛ. I xa a xili sa Yaya.

¹⁴Na findima sɛɛwɛ nun ɲɛlɛxinyi nan na i bɛ, mixi gbegbe fan ɲɛlɛxinma nɛ a barife ra,

¹⁵barima a binyɛ sɔtɔma nɛ Ala ya i. A mu wɛni nun sese gbɛtɛ minma naxan mixi siisima. Ala Xaxili Sɛniyɛnxi luma nɛ a ma kabi a na a nga tɛɛgɛ tɛmui naxɛ.

¹⁶A Isirayila di gbegbe ragbilenma nɛ e Marigi Ala ma.

¹⁷Sɛnbɛ nun Ala Xaxili Sɛniyɛnxi fima nɛ a ma alɔ a fi Annabi Eliya ma ki naxɛ. Marigi a xɛɛma nɛ a ya ra, a xa babae bɔɲɛ rafindi e xa die ma, a yunubitɔɛe ya rafindi tinxintɔɛe xa fahaamui ma. A sigama nɛ ɲama xɔn ma Marigi ya ra alako a xa e ya rafindi a ma.»

¹⁸Na kui, Sakari naxa malekɛ maxɔrin, «N yi fe kolonma di? N tan bara fori a nun n ma ginɛ.»

¹⁹Malekɛ naxa a yaabi, «Yibirila nan n tan na, naxan tima Ala ya i a xa yaamari rabafe ra. A n xɛɛxi nɛ yi xibaaru fanyi masende i bɛ.

²⁰Na kui, a mato, i boboma nɛ, i mu nɔ wɔyɛnde han yi fee sa rabama lɔxɔ naxan ma, barima i mu laxi n ma masenyi ra, naxan sa kamalima a waxati.»

²¹Ɲama to nu na Sakari mamɛfe tande, e naxa kɔntɔfili Sakari bufe ma hɔrɔmɔbanxi kui.

²²A to mini a mu nɔ wɔyɛnde e bɛ, e naxa a kolon a a laamatunyi nan toxi hɔrɔmɔbanxi kui. A boboxi ra a nu katafe a xa masenyi ti e bɛ a bɛlɛxɛe ra.

²³Sakari to gɛ a xa sɛrɛxɛdubɛ wali ra, a naxa siga a xɔnyi.

²⁴Na waxati dangi xanbi, Sakari xa ginɛ Elisabɛti naxa tɛɛgɛ. A naxa a ya manɔxun mixie ma kike suuli. A naxa a fala,

²⁵«Marigi yi nan nabaxi n bɛ, a to a ya ragoroxi n ma a xa fonisireya kui! A bara yaagi ba n ma, mixie tagi.» Malekɛ xa masenyi Isa xa fe ra

²⁶Elisabɛti xa tɛɛgɛ to kike senni li, Ala naxa malekɛ Yibirila xɛɛ Galile bɔxi taa nde ma, naxan xili «Nasarɛti».

²⁷A a xɛɛ ginɛdimɛdi nde nan xɔn ma, xɛmɛ nu bara naxan xa kote dɔxɔ. Na xɛmɛ nu fatanxi Dawuda bɔnsɔɛ nɛ, a nu xili Yusufu. Ginɛdimɛdi fan nu xili Mariyama.

²⁸Malekɛ to siga a xɔn, a naxa a masen a bɛ, «I kɛna, i tan Marigi hinnɛxi naxan na. Marigi na i fɛ ma!»

²⁹Mariyama naxa ifu na wɔyɛnyi ma. A mu nu a kolon yi findixi xɛɛbui mɔɔli yo ra.

³⁰Malekɛ naxa a masen a bɛ, «Mariyama, i naxa gaaxu, barima Ala bara hinnɛ i ra.

³¹A mato, i fama tɛɛgɛde di xɛmɛ ma. I na a bari, i xa a xili sa Isa.

³²A binyɛ sɔtɔma, a xili fala Ala Xili Xungbe Kanyi xa Di. Marigi Ala fama nɛ a benba Dawuda xa mangɛya fide a ma.

³³A findima nɛ Yaxuba bɔnsɔɛ xa mangɛ ra abadan, danyi yo mu luma a xa mangɛya ma.»

³⁴Mariyama naxa malekɛ maxɔrin, «Yi fe nɔma rabade di, n to fa findixi ginɛdimɛdi nan na?»

³⁵Malekɛ naxa a yaabi, «Ala Xaxili Sɛniyɛnxi nan fama i ma, Ala Xili Xungbe Kanyi sɛnbɛ fa i xun ma. Na nan a toxi, i fama yi di naxan baride, a findima sɛniyɛntɔɛ ra, a xili fala Ala xa Di.

³⁶A mato, i barenyi Elisabɛti fan bara tɛɛgɛ di xɛmɛ ma a xa foriɲa kui. E nu a xili falama dibaritare, kɔnɔ a furi kike senni nan a ra yi ki.

³⁷Sese mu na Ala mu nɔma naxan nabade.»

³⁸Mariyama naxa a yaabi, «Marigi xa konyi nan n na. A xa raba n bɛ alɔ i a falaxi ki naxɛ.» Na xanbi, malekɛ naxa keli a xun ma. Mariyama sigafe Elisabɛti xɔnyi, nun Mariyama xa masenyi

³⁹Na tɛmui Mariyama naxa siga mafuren taa nde Yudaya geya yire.

⁴⁰A to so Sakari xɔnyi, a naxa Elisabɛti xɛɛbu.

⁴¹Elisabɛti to Mariyama xa xɛɛbui mɛ, diyɔrɛ naxa a ramaxa a tɛɛgɛ, Ala Xaxili Sɛniyɛnxi fa goro Elisabɛti ma.

⁴²A naxa a fala a xui itexi ra, «Ala bara baraka sa i ma dangi ginɛ birin na, a bara baraka sa i xa di ma naxan na i tɛɛgɛ.

⁴³N tan yi hɛɛri sɔtɔxi di, n Marigi nga xa fa n xɔnyi?

⁴⁴A mato, n to i xa xɛɛbui mɛ, n ma diyɔrɛ bara a ramaxa n tɛɛgɛ sɛɛwɛ ra.

⁴⁵Sɛɛwɛ na i bɛ, i tan naxan laxi a ra a Marigi xa masenyi kamalima nɛ, a naxan masen i bɛ.»

⁴⁶Mariyama naxa fa a masen,«N nii birin Marigi matɔxɔma!

⁴⁷N xaxili bara sɛɛwa Ala n Nakisima ra,

⁴⁸a to a ya ragoroxi a xa konyi magoroxi ma.Keli yi waxati ma han waxati naxan birin sa fama,mixie n xili falama nɛ ‹sɛɛwatɔɛ›,

⁴⁹barima Sɛnbɛ Kanyi bara fe xungbee raba n bɛ.A xili sɛniyɛn.

⁵⁰A kinikinima waxati birin mixie ma,naxee gaaxuma a ya ra.

⁵¹A xa walie bara a sɛnbɛ masen.A bara yɛtɛ igboe rayensen.

⁵²A bara mangɛe ba e xa kibanyie kui,a mixi magoroxie xa fe ite.

⁵³A bara kaamɛtɔɛe rawasa se fanyi ra,a bannamixie rasiga e yi igeli ra.

⁵⁴A bara a xa konyi Isirayila mali,a mu nɛɛmuxi kinikinide a ma.

⁵⁵A kinikinima nɛ Iburahima nun a xa die ma abadan,alɔ a a fala won benbae bɛ ki naxɛ.»

⁵⁶Mariyama naxa lu Elisabɛti yire kike saxan ɲɔndɔn, a fa gbilen a xɔnyi. Yaya bari ki

⁵⁷Elisabɛti xa di bari tɛmui to a li, a naxa di xɛmɛ sɔtɔ.

⁵⁸A dɔxɔbooree nun a barenyie to a mɛ a Marigi bara kinikini a ma ki fanyi, e nun Elisabɛti naxa sɛɛwa.

⁵⁹A xi solomasaxan lɔxɔɛ, mixie naxa fa diyɔrɛ sunnade. E nu waxi di xili safe a baba Sakari xun ma,

⁶⁰kɔnɔ a nga naxa a fala, «Ade, a xili sama nɛ Yaya.»

⁶¹E naxa wɔyɛn a bɛ, «Mixi yo mu na i xa mixie ya ma yi xili na naxan xun ma.»

⁶²E naxa tɔnxuma raba di baba bɛ e xa a kolon a wama a xili xa sa ki naxɛ.

⁶³Sakari to walaxɛ maxɔrin, a naxa a sɛbɛ, «A xili Yaya.» E birin naxa kaaba.

⁶⁴Keren na, Sakari nɛnyi naxa keli, a wɔyɛn, a so Ala tantufe.

⁶⁵E dɔxɔboore birin naxa gaaxu na fe ma. Yudaya geya bɔxi birin ma, mixie nu na fee nan ifalama.

⁶⁶E to a mɛ, birin nu e ɲɔxɔ saxi yi fee xɔn ma, e nu a fala, «Yi di findima nde ra?» E a kolon Marigi bɛlɛxɛ nu na a xun ma. Sakari xa masenyi

⁶⁷Ala Xaxili Sɛniyɛnxi naxa goro a baba Sakari ma, a naxa yi masenyi ti Ala xili ra,

⁶⁸«Tantui na Ala bɛ, Isirayila Marigi Ala!A bara fa a xa mixie xunmatode, a e xunsara.

⁶⁹A bara Marakisima Sɛnbɛma rakelia xa konyi Dawuda bɔnsɔɛ ya ma,

⁷⁰alɔ a nu a masenxi ki naxɛ tɛmui dangixi,a xa namiɲɔnmɛ sɛniyɛntɔɛe saabui ra.

⁷¹A a masen nɛ, a a won nakisima won yaxuie yi ra,a won ba won xɔnmae birin bɛlɛxɛ.

⁷²A bara kinikini won benbae ma,a bara ratu a xa saatɛ sɛniyɛnxi ma.

⁷³A laayidi nan tongo won benba Iburahima bɛ,

⁷⁴a a won bama won yaxuie bɛlɛxɛ,alako won xa nɔ a batude bɔɲɛsa kui,

⁷⁵won xa nɔ ɲɛrɛde sɛniyɛnyi nun tinxinyi kui,won ɲɛrɛ a ya i won ma simaya lɔxɔɛ birin.

⁷⁶I tan, n ma di,i xili falama nɛ Ala Xili Xungbe Kanyi xa Namiɲɔnmɛ,barima i sigama nɛ Marigi ya ra kirae yailande a bɛ,

⁷⁷alako Marigi xa mixie xa kisi kolon,e naxan sɔtɔma e xa yunubie na xafari.

⁷⁸Na kisi kelima won Marigi Ala xa kinikini xungbe nan ma.A naiyalanyi xɛɛma won ma keli ariyanna,

⁷⁹alako a xa yanba mixie bɛ naxee na dimi kui,naxee dɔxɔxi faxɛ xa dimi kui,alako a xa won naɲɛrɛ bɔɲɛsa kira xɔn.»

⁸⁰Na kui, di naxa mɔ, a nu sɛnbɛ nun xaxili sɔtɔ. A naxa sabati wula i han a a yɛtɛ masen Isirayila bɛ lɔxɔ naxɛ.