Read Sosoxi Taruxui 2 Bible Online

Taruxui 2 - Sosoxi bible

Taruxui 2

¹Xɛ Xabɛ Sali to a li, Isa fɔxirabirɛe birin nu malanxi yire keren.

²Xui nde naxa mini koore ma keren na alɔ foye xungbe xui. A naxa banxi kui birin nafe e nu dɔxɔxi dɛnnaxɛ.

³E naxa se ndee to naxee maniya nɛnyie ra, tɛ na e ma. Na see naxa itaxun, keren keren naxa dɔxɔ kankan xunyi ma.

⁴Ala Xaxili Sɛniyɛnxi naxa goro fɔxirabirɛe birin ma, e naxa so xui gbɛtɛe falafe Ala Xaxili Sɛniyɛnxi saabui ra.

⁵Yuwifi diinɛlae kelife ɲamanɛ birin ma, e nu malanxi Darisalamu na saxanyi.

⁶Ɲama to yi xui mɛ, e naxa fa e gi ra. E naxa kaaba barima kankan nu Isa fɔxirabirɛe xui mɛma e bari xui yati nan na.

⁷E dɛ naxa ixara, e fa a fala, «Pe, yi mixie naxee wɔyɛnma yi ki, Galilekae xa mu e birin na?

⁸Won fa won bari xui mɛfe e ra di?

⁹Paratokae, Medekae, Elamakae, naxee sabatixi Mesopotamiya, Yudaya, Kapadose, Pontu, Asi,

¹⁰Firigiya, Panfiliya, Misira, Libiya, Sireni bɔxi fɛ ma, a nun naxee keli Rɔma, Yuwifie a nun mixi naxee soxi e xa diinɛ ya ma, Kirɛtikae a nun Arabue,

¹¹won birin na e xui mɛfe won bari xui yati nan na. E na Ala xa kaabanako fee falafe won ma xuie. Na rabaxi di?»

¹²E birin dɛ naxa ixara, e naxa ifu. E nu a fala e bore bɛ, «Munfe yi ki?»

¹³Kɔnɔ ndee naxa e mayele, e nu fa a fala, «E siisixi nɛ yi ki.» Piyɛri xa kawandi

¹⁴Na xanbi Piyɛri nun yi xɛɛra fu nun kerenyie naxa keli. Piyɛri naxa a masen ɲama bɛ a xui itexi ra, «Yuwifie, a nun wo tan naxan birin na Darisalamu, wo xa wo tuli mati n na. Wo xa a kolon,

¹⁵yi mixie mu siisixi xɛ de alɔ wo a maɲɔxunxi ki naxɛ, barima gɛɛsɛgɛ na a ra yi ki.»

¹⁶«Annabi Yoweli yi masenyi nan ti.

¹⁷‹Ala naxɛ,n fama n Xaxili taxunde mixi birin na lɔxɔɛ dɔnxɔɛe.Wo xa di xɛmɛe nun wo xa di ginɛewɔyɛnma nɛ n tan Ala xili ra.Wo xa sɛgɛtalae to tima nɛ fee ra,wo xa forie fan xiyee sa.

¹⁸Na waxati,n fama n Xaxili ragorode n ma konyi xɛmɛenun n ma konyi ginɛe ma.E wɔyɛnma nɛ n tan Ala xili ra.

¹⁹N kaabanakoee rabama nɛ koore ma,n tɔnxumae masenma nɛ bɔxi fari,naxee findima wuli, tɛ, nun tuuri ra.

²⁰Soge dimima nɛ,kike gbeelima nɛ alɔ wulibeenun Marigi xa lɔxɔɛ xa a li,na dariyɛ lɔxɔɛ xungbe.

²¹Mixi yo naxan Marigi xili maxandima,na kanyi kisima nɛ.›»

²²«Isirayilakae, wo wo tuli mati yi masenyi ra. Isa Nasarɛtika Ala xa Mixi Sugandixi nan nu a ra. Ala naxa na masen kaabanakoee, fe magaaxuxie, nun tɔnxumae ra, Isa naxan nabaxi wo tagi. Wo birin na fee kolon.

²³Ala bara a ragiri kaafirie xa kafu wo ma, alako wo xa yi xɛmɛ faxa, wo a banban wuri magalanbuxi ma, alɔ Ala nu a ɲanigexi ki naxɛ.

²⁴Kɔnɔ na xanbi, Ala bara a rakeli, a faxɛ luuti ba a ma, barima faxɛ mu nu nɔma kankande a ma.»

²⁵«Dawuda nu Isa xa fe nan falafe yi masenyi ra.‹N Marigi toma tɛmui birin n ya i.A to na n sɛɛti ma, n mu nɔma birade.

²⁶Na nan a toxi n bɔɲɛ na sɛɛwɛ kui,n dɛ fan a xa fe masenma ɲɛlɛxinyi ra.N fate fan malabuma nɛ bɔɲɛsa kui,

²⁷barima i mu n nii bɛɲinma aligiyama,i mu i xa sɛniyɛntɔɛ luma gaburi kui, a xa bɔrɔ.

²⁸I bara a niya n xa kisi kira kolon.I sɛɛwɛ fima nɛ n ma i yire.›»

²⁹Piyɛri man naxa a fala, «N ngaxakerenyie, wo a lu n xa won benba Dawuda xa fe fala wo bɛ. A faxa nɛ, a naxa ragata, a xa gaburi man na won tagi be han to.

³⁰Namiɲɔnmɛ to nu a ra, a nu a kolon Ala bara laayidi tongo a bɛ. Ala naxa a kali a Dawuda xa mamadi nde dɔxɔma nɛ a xa mangɛ kibanyi.

³¹Na kui, Dawuda nu a kolon Ala xa Mixi Sugandixi fama nɛ kelide faxɛ ma. Ala mu nɛɛmuma a ma aligiyama, a fate mu bɔrɔma gaburi kui.

³²Ala nan Isa rakelixi faxɛ ma. Won birin findixi seede ra na fe ma.

³³A to rate Ala yirefanyi ma, a naxa Ala Xaxili Sɛniyɛnxi sɔtɔ Baba Ala ra, alɔ Ala laayidi tongoxi ki naxɛ. A man bara Ala Xaxili Sɛniyɛnxi ragoro won ma. Wo na nan tofe, wo na nan mɛfe yi ki.»

³⁴«Dawuda mu texi koore ma, kɔnɔ a tan nan a fala,‹Marigi naxa a fala n Marigi bɛ,Dɔxɔ n yirefanyi ma,

³⁵han n xa i sanyi ti i yaxuie fari.›»

³⁶«Na kui, Isirayilaka birin xa la a ra, Ala bara Isa findi Marigi ra, nun a xa Mixi Sugandixi ra. Kɔnɔ wo bara a banban wuri magalanbuxi ma.»

³⁷Yi masenyi naxa ɲama bɔɲɛ tɔɔrɔ ki fanyi ra. E naxa a fala Piyɛri nun xɛɛra booree bɛ, «N ngaxakerenyie, a lanma muxu xa munse raba fa?»

³⁸Piyɛri naxa a fala e bɛ, «Wo xa tuubi, wo birin xa wo xunxa ye xɔɔra Isa xili ra, Ala xa Mixi Sugandixi, alako wo xa yunubie xa xafari, wo man xa Ala Xaxili Sɛniyɛnxi sɔtɔ.

³⁹Ala bara yi laayidi tongo wo bɛ, wo xa die bɛ, nun mixi birin bɛ a naxee xilima, hali naxee na yire makuye.»

⁴⁰Piyɛri man naxa e rasi, a naxa e ralimaniya masenyi wuyaxi ra. A naxa e maxandi, «Wo wo mɛɛni yi waxati mixi tinxintaree ma.»

⁴¹Naxee tin a xa masenyi ra, e naxa e xunxa ye xɔɔra. Na lɔxɔɛ mixi wulu saxan ɲɔndɔn naxa sa Isa fɔxirabirɛe xun ma.

⁴²E nu e tunnabɛxima xɛɛrae xa xaranyi ma. E naxa lu ngaxakerenya kui. E man naxa e tunnabɛxi taami itaxunfe nun Ala maxandife ma.

⁴³Gaaxui naxa e birin suxu. Xɛɛrae naxa kaabanako nun tɔnxuma gbegbe raba.

⁴⁴Danxaniyatɔɛe birin nu malanxi yire keren. Xa mixi keren se sɔtɔ, na bara findi e birin gbe ra.

⁴⁵E e xa see matima, e nu e harige itaxun e bore ma, kankan nu a hayi fan na kui.

⁴⁶Lɔxɔ yo lɔxɔ e nu e malanma hɔrɔmɔbanxi kui, e nu donse don e xɔnyi sɛɛwɛ nun bɔɲɛsa kui.

⁴⁷E nu Ala matɔxɔma. E naxa rafan birin ma. Lɔxɔ yo lɔxɔ Marigi nu nde sama danxaniyatɔɛ ɲama kɔnti xun ma.