Read Sosoxi Rɔma 10 Bible Online

Rɔma 10 - Sosoxi bible

Rɔma 10

¹N ngaxakerenyie, n bɔɲɛ waxɔnfe birin na naxan na, Yuwifie xa kisi sɔtɔ. N ma Ala maxandi nan na ki e bɛ.

²N na e seede ra, a e sɛnbɛ saxi Ala xa fee kui, kɔnɔ na mu kelixi lɔnni xa ma.

³E to mu a kolon Ala mixi matinxinma a ya i ki naxɛ, e naxa kata e xa e yɛtɛ kan matinxin. Na kui, e mu e yɛtɛ magoro Ala bɛ a tan xa tinxinyi fi e ma.

⁴Ala xa Mixi Sugandixi bara gɛ Munsa xa sɛriyɛ rakamalide, alako naxan yo na danxaniya a ma, na kanyi xa tinxinyi sɔtɔ.

⁵Annabi Munsa to nu tinxinyi xa fe masenfe naxan sɔtɔma sɛriyɛ rabatufe ma, a yi nan sɛbɛ Kitaabui kui, «Mixi naxan yi sɛriyɛ rabatuma a simaya sɔtɔma nɛ a saabui ra.»

⁶Kɔnɔ a to nu tinxinyi xa fe masenfe naxan sɔtɔma danxaniya saabui ra, a yi nan sɛbɛ,«I naxa i yɛtɛ maxɔrin,‹Nde tema koore?›»Ala xa Mixi Sugandixi mu goroxi xɛ keli koore ma?

⁷«Xa na mu a ra i i yɛtɛ maxɔrin,‹Nde goroma bɔxi bun?›»Ala xa Mixi Sugandixi mu kelixi faxamixie xa tagi?

⁸Kitaabui munse masenxi?«Ala xa masenyi makɔrɛ i ra.A na i dɛ kiri ma,a na i bɔɲɛ fan ma.» Na masenyi findixi danxaniya masenyi nan na muxu naxan kawandife:

⁹A i na a fala i dɛ ra a Marigi nan na Isa ra, i man naxa la a ra i bɔɲɛ kui a Ala bara a rakeli faxamixie tagi, i kisima nɛ.

¹⁰Mixi danxaniyama yi masenyi ma a bɔɲɛ nan kui, a tinxinyi sɔtɔ Ala ya i. A na la a ra, a a falama a dɛ nan na, a kisi sɔtɔ.

¹¹Kitaabui a masenxi, «Mixi yo danxaniya a ma, a kanyi mu yaagima.»

¹²Tagi rasa yo mu na Yuwifie nun si gbɛtɛe tagi. Marigi keren nan na e birin bɛ, a man mixi birin kima ki fanyi ra naxee na a xili.

¹³Alɔ Kitaabui a masenxi ki naxɛ, «Naxan yo na Alatala xili, na kanyi kisima nɛ.»

¹⁴Kɔnɔ na kui, e nɔma a xilide di xa e mu danxaniyaxi a ma? E fa danxaniyama a ma di xa e mu nu a xa fe mɛ? E fa a xa fe mɛma di xa mixi yo mu e kawandima?

¹⁵Na kawandi fan tima e bɛ di xa mixie mu xɛɛxi na fe ma? A sɛbɛxi, «Xɛɛrae, naxee fama xibaaru fanyi ra, e fafe fan ki fanyi!»

¹⁶Kɔnɔ birin xa mu yi xibaaru fanyi suxuxi, barima Annabi Esayi a masen nɛ, «Marigi, nde laxi muxu xa masenyi ra?»

¹⁷Na kui, mixie danxaniyama nɛ e to bara Ala xa masenyi ramɛ. E Ala xa masenyi ramɛma a xa Mixi Sugandixi xa masenyi nan saabui ra.

¹⁸Kɔnɔ n xa maxɔrinyi ti, e mu yi masenyi ramɛxi xɛ? Iyo xɛ, barima Kitaabui naxɛ,«E xui bara mini duniɲa birin ma,e xa masenyi bara siga han duniɲa dande.»

¹⁹N man xa maxɔrinyi ti, Isirayila ɲama mu masenyi fahaamuxi xɛ? Yaabi fɔlɛ ra, Ala yi nan masen Annabi Munsa saabui ra,«N a niyama nɛ wo mixie tɔɔnɛnaxee ɲan mu findixi si yati ra.N a niyama nɛ wo bɔɲɛ xa te si fahaamutare ma.»

²⁰Annabi Esayi fan naxa xɛɛra iba limaniya ra Ala to yi masenyi fi a ma,«Mixie bara n to naxee mu nu n fenma.N bara n yɛtɛ masen mixie bɛ naxee mu nu n maxɔrinma sese ma.»

²¹Kɔnɔ Isirayila xa fe ra, a naxɛ,«Keli sogetede ma han sogegorode,n bɛlɛxɛe italaxi yi ɲama bɛ,naxan n xui matandima,naxan tondima n bɛ.»