Read Sosoxi Filipi 2 Bible Online

Filipi 2 - Sosoxi bible

Filipi 2

¹Ala xa Mixi Sugandixi to madundui nde fima wo ma, a xa xanunteya to limaniya nde fima wo ma, lanyi to na wo nun Ala Xaxili Sɛniyɛnxi tagi, xanunteya nun kinikini nde to na wo yi ra,

²wo xa n ma ɲɛlɛxinyi rakamali. Wo lu lanyi kui. Xaxili keren, xanunteya keren, nun ɲɛrɛ ki keren nan xa lu wo tagi.

³Wo naxa fefe raba tɔɔnɛ kui. Wo naxa wo yɛtɛ rafisa wo booree bɛ. Wo nde ba wo xa fe ra, wo a sa wo boore gbe xun yɛtɛ magore kui.

⁴Wo naxa wo yɛtɛ xa munafanyi fen. Wo wo booree nan ma munafanyi fen.

⁵Wo yuge xa lu alɔ Ala xa Mixi Sugandixi Isa.

⁶Kabi abadan, a nu na Ala kɛɲa nɛ,kɔnɔ a mu tin a xa a yɛtɛ tide sa Ala ilanyi.

⁷A naxa diɲɛ a yɛtɛ birin ma,a tin lude konyi kɛɲa ma,a bari duniɲa ma alɔ adamadi,mixie fan naxa a kolon adamadi ra.

⁸A naxa a yɛtɛ magoro,a xa Ala sago raba,han a naxa tin faxɛ ra wuri magalanbuxi ma.

⁹Na nan a toxi Ala naxa a binya,a a xili gbo dangi xili birin na,

¹⁰alako naxee na koore,naxee na bɔxi,naxee na bɔxi bun ma,e na Isa xili mɛ tɛmui naxɛ,e birin xa e xinbi sin a bun,

¹¹e xa a fala,«Ala xa Mixi Sugandixi Isa nan na Marigi ra.»Na xa findi matɔxɔɛ ra Baba Ala bɛ.

¹²N xanuntenyie, wo bara n xui suxu n nu na wo tagi tɛmui naxɛ. Yakɔsi fan, wo xa Ala xa yaamarie rabatu n xanbi dangife a singe ra. Wo xa gaaxu Ala ya ra, wo xa wakili wo xa kisi xa fe ra.

¹³Ala nan fe ragirima wo ma alako wo ɲanige xa lan a gbe ma, wo xa a waxɔnfe raba.

¹⁴Wo nɛ fefe rabama wo naxa wo yaxaseri masa, wo naxa sɔnxɔ,

¹⁵alako nɔndi nun sɛniyɛnyi xa lu wo bɛ, wo tan Ala xa die naxee yanbama alɔ tɛ dɛxɛ yi duniɲa mixi ɲaaxi tinxintaree ya ma,

¹⁶wo nɛ kisi masenyi tima tɛmui naxɛ. Na kui, n matɔxɔɛ sɔtɔma Ala xa Mixi Sugandixi fa lɔxɔɛ, barima n mu duniɲa igirixi tɔɔrɛ kui fufafu ra.

¹⁷Hali n faxa wo bɛ, n ma duniɲɛigiri fama findide wo bɛ sɛrɛxɛ nan na naxan sama wo xa danxaniya sɛrɛxɛ xun ma. Na n nasɛɛwama nɛ.

¹⁸Wo fan xa sɛɛwa, won birin xa sɛɛwa. Timote nun Epaforodite

¹⁹N bara n xaxili ti Marigi Isa ra a xa n mali alako n xa Timote xɛɛ wo ma, alako a xa n nalimaniya wo xa xibaaru ra.

²⁰Mixi yo mu na n yi ra, wo xa fe rafan naxan ma alɔ a tan.

²¹Birin wama e yɛtɛ kan xa geeni nan xɔn ma, e mu na Ala xa Mixi Sugandixi Isa xa geeni xa fenfe.

²²Wo a kolon Timote bara a tunnabɛxi tɔɔrɛ kui Ala xa Xibaaru Fanyi xa fe ra. Kabi a naxa wali fɔlɔ n sɛɛti ma tɛmui naxɛ, a bara lu alɔ di naxan birama a baba fɔxɔ ra.

²³Na kui, a xɔli n ma n xa a xɛɛ wo yire, n ma fe makɛnɛnma tɛmui naxɛ.

²⁴N a kolon a gbe mu luxi, Ala xa a ragiri n xa fa wo yire.

²⁵Kɔnɔ n ma maɲɔxunyi ma, fo n xa n ngaxakerenyi Epaforodite xɛɛ wo yire. A bara n mali ki fanyi ra Ala xa fe geremaso kui, alɔ wo a xɛɛxi n ma fe naxan ma.

²⁶Wo to xɔli bara a suxu ki fanyi. A bara kɔntɔfili barima wo bara a xa fure fe mɛ.

²⁷A fura nɛ a ɲaaxi ra. A gbe mu nu luxi a xa faxa, kɔnɔ Ala naxa kinikini a ma. Ala naxa kinikini n fan ma, alako na sunnunyi naxa sa n ma tɔɔrɛ xun.

²⁸Na na a ra n bara gbata a xɛɛfe ra wo ma alako wo xa ɲɛlɛxin a tofe ra, n fan bɔɲɛ ndedi xa sa.

²⁹Wo xa a rasɛnɛ Marigi xili ra sɛɛwɛ kui. Wo xa yi mixi mɔɔli binya,

³⁰barima a mu tondi fefe yo ra Ala xa Mixi Sugandixi xa wali kui, hali a findi a bɛ faxɛ ra. A bara n mali wo tan mu nu nɔma n malide naxee ra.