Read Sosoxi Tɛsaloniki I 5 Bible Online

Tɛsaloniki I 5 - Sosoxi bible

Tɛsaloniki I 5

¹N ngaxakerenyie, hali n mu sese fala wo bɛ waxati nun lɔxɔɛe xa fe ra yi fee sa rabama tɛmui naxɛ.

²Wo fan yati a kolon a fanyi ra, a Marigi xa lɔxɔɛ fama nɛ alɔ muɲɛti fama kɔɛ ra ki naxɛ.

³Mixie nɛ lanyi nun bɔɲɛsa xa fe falama tɛmui naxɛ, gbaloe dusuma e xun ma na tɛmui nɛ, alɔ furuginɛ difuri na keli a ra. E mu tangama a ma muku.

⁴Kɔnɔ wo tan, ngaxakerenyie, wo mu na dimi xa kui. Na lɔxɔɛ mu lanma a xa wo tɛrɛnna alɔ muɲɛti.

⁵Wo birin findixi naiyalanyi nun yanyi die nan na. Kɔɛ nun dimi die xa mu won na.

⁶Na kui, won naxa xi alɔ booree. Won xa fee rasaxa a fanyi ra, won naxa yanfa.

⁷Naxee xima, e xima kɔɛ nan na. Naxee siisima, e siisima kɔɛ nan na.

⁸Won tan naxee findixi yanyi mixie ra, won xa mɛɛni won yɛtɛ ma. Won xa danxaniya nun xanunteya rasabati, won xa won xaxili ti kisi ra. Nee tide luma nɛ won bɛ alɔ kanke makantase nun xun makantase tide luma geresoe bɛ ki naxɛ.

⁹Ala mu a ragirixi won ma, a xa xɔnɛ xa won li. A a ragirixi nɛ won tan xa kisi nan sɔtɔ Marigi Isa saabui ra, Ala xa Mixi Sugandixi

¹⁰naxan faxa won ma fe ra. Na nan a toxi, xa muxu ɲiɲɛ nan a ra, xa muxu faxaxi nan a ra, muxu fama nɛ sabatide a i.

¹¹Na kui, wo xa wo bore ralimaniya, wo xa wo bore sɛnbɛ so alɔ wo darixi a raba ra ki naxɛ. Marasi nun xɛɛbui dɔnxɔɛ

¹²N ngaxakerenyie, muxu bara wo mayandi wo xa mixie binya naxee na walife wo tagi, wo rasife nun wo raɲɛrɛfe ra Marigi xa fe kui.

¹³Wo xa e binya a fanyi ra xanunteya kui e xa wali xa fe ra. Lanyi nan xa lu wo xa danxaniyatɔɛ ɲama tagi.

¹⁴N ngaxakerenyie, muxu man bara wo maxandi, wo xa tunnaxɔnɛe rasi, wo xa limaniyataree ralimaniya, wo xa sɛnbɛtaree mali, wo diɲɛ mixi birin bɛ.

¹⁵Wo xa a mato a fanyi ra mixi yo naxa fe kobi ɲɔxɔ fe kobi ra. Wo xa nu fe fanyi nan tun naba wo bore bɛ, a nun mixi birin bɛ.

¹⁶Wo xa sɛɛwa tɛmui birin.

¹⁷Wo xa Ala maxandi waxati birin.

¹⁸Wo xa Ala tantu fe birin kui. Na findixi Ala sago nan na wo bɛ, wo tan naxee danxaniyaxi a xa Mixi Sugandixi Isa ma.

¹⁹Wo naxa Ala Xaxili Sɛniyɛnxi xɔlɔn nagoro.

²⁰Wo naxa wo tuli xɔrɔxɔ namiɲɔnmɛe xa masenyie ma,

²¹kɔnɔ wo xa fe birin mato a fanyi ra.Xa fefe fan, wo xa na suxu gben.

²²Xa fefe kobi, wo xa wo makuya na ra pon!

²³Ala xa wo rasɛniyɛn a ki nun a kɛɲa ma, a tan Ala naxan bɔɲɛsa fima. Ala xa wo xaxili nun wo nii nun wo fate ratanga, marakɔrɔsi yo naxa lu wo ma won Marigi Isa fa tɛmui.

²⁴Naxan wo xilixi, a na a xui xanbi ra, a fama nɛ a rabade.

²⁵N ngaxakerenyie, wo Ala maxandi muxu bɛ.

²⁶Wo xa ngaxakerenyie birin xɛɛbu sunbui sɛniyɛnxi ra.

²⁷N bara wo yamari Marigi xili ra wo xa yi bataaxɛ xaran ngaxakerenyie birin bɛ.

²⁸Ala xa hinnɛ fi wo ma won Marigi Isa saabui ra, a xa Mixi Sugandixi.