Read Sosoxi Eburu 10 Bible Online

Eburu 10 - Sosoxi bible

Eburu 10

¹Annabi Munsa xa sɛriyɛ misaalixi fe fanyi nan na naxan fama fade. A findixi misaali gbansan nan na. Na nan a toxi a Annabi Munsa xa sɛriyɛ mu nɔma Ala batulae rasɛniyɛnde kerenyi ra, na sɛrɛxɛe saabui ra naxee bama ɲɛ yo ɲɛ.

²Xa a sa li a nu nɔma e rasɛniyɛnde nu, mixie mu nu luma sɛrɛxɛe ba ra tɛmui birin, barima sɛrɛxɛ keren gbansan nu nɔma e xa yunubi birin xafaride kerenyi ra, na yunubi xa fe maɲɔxunyi yati mu luma e xunyi.

³Kɔnɔ ɲɛ yo ɲɛ na sɛrɛxɛe findima maratuse nan na mixie bɛ a yunubie na e ma.

⁴Tura nun si kontonyi wuli mu nɔma yunubie bade.

⁵Na nan a toxi, Ala xa Mixi Sugandixi to so duniɲa, a naxa a masen Ala bɛ,«I mu wama sɛrɛxɛ xɔn.I mu wama hadiya xɔn.I bara fate yailan n bɛ.

⁶I mu wama sɛrɛxɛ gan daaxi xɔn ma,i mu wama sɛrɛxɛ yunubi xafari daaxi fan xɔn ma.

⁷N naxa a masen, ‹N bara fa.A sɛbɛxi n ma fe ra Kitaabui kui,Ala, n na fafe i sago rabade.›»

⁸Singe a naxa a masen,«I mu wama sɛrɛxɛ yo xɔn ma.E mu rafan i ma.I mu wama hadiya yo xɔn ma.I mu wama sɛrɛxɛ gan daaxi xɔn ma,i mu wama sɛrɛxɛ yunubi xafari daaxi fan xɔn ma.» A nu bara na fala hali na yaamari to nu toma a xa sɛriyɛ kui.

⁹Na dangi xanbi, a bara a masen,«Ala, n na be. N bara fa i sago rabade.» Na kui, a naxa fe singe ba na, alako fe firin nde xa ti.

¹⁰Na ɲanige nan a niyaxi won nasɛniyɛnxi Ala xa Mixi Sugandixi Isa fate saabui ra, naxan baxi sɛrɛxɛ ra kerenyi ra.

¹¹Sɛrɛxɛdubɛ birin e xa wali rabama lɔxɔ yo lɔxɔ. E luma sɛrɛxɛe ba ra naxee mu nɔma yunubie xafaride.

¹²Kɔnɔ Isa tan, a to gɛ sɛrɛxɛ keren bade yunubie xa fe ra, a naxa a magoro Ala yirefanyi ma, a luma dɛnnaxɛ abadan.

¹³A na a mamɛfe a xa ti a yaxuie ma,

¹⁴barima a bara mixie rakamali kerenyi ra, a naxee rasɛniyɛnxi a xa sɛrɛxɛ kerenyi saabui ra.

¹⁵Ala Xaxili Sɛniyɛnxi na tagi rabama won bɛ yi masenyi ra. A singe, a naxa a masen,

¹⁶«Saatɛ nan ya n naxan tongoma Isirayila bɔnsɔɛ bɛ:Na waxati na dangi,n nan n ma sɛriyɛ luma nɛ e bɔɲɛ ma,n na sɛbɛma nɛ e sondonyi ma.»

¹⁷A man naxa a masen,«N mu ratuma e xa yunubienun e xa wali kobie ma sɔnɔn.»

¹⁸Yunubi na gɛ xafaride tɛmui naxɛ, sɛrɛxɛ mu bama na yunubi xa fe ra sɔnɔn.

¹⁹N ngaxakerenyie, na kui won bara limaniya sɔtɔ sofe ra na yire sɛniyɛnxi fisamante kui Isa wuli saabui ra.

²⁰Isa bara na kisi kira nɛɛnɛ rabi won bɛ, alako won xa dangi na dugi ra naxan gbakuxi hɔrɔmɔlingira kui a fate saabui ra.

²¹Won ma sɛrɛxɛdubɛ kuntigi to tixi Ala xa banxi xunyi ra,

²²won xa won makɔrɛ Ala ra bɔɲɛ fiixɛ nun danxaniya ra. Na danxaniya won nalimaniyama nɛ, barima won bɔɲɛ rasɛniyɛnxi won ma yunubie ma, won fate fan maxaxi ye tinse ra.

²³Won xa won xaxili ti Ala ra tunnabɛxi kui, barima naxan laayidi tongoxi won bɛ, a mu nɔma na kanade.

²⁴Won xa mɛɛni won bore ma, alako won xa won bore ralimaniya won xa lu xanunteya nun wali fanyi kui.

²⁵Won naxa won ma malanyie rabolo de, alɔ ndee na a rabafe ki naxɛ. A lanma won xa won bore ralimaniya. Won to a kolon Ala xa lɔxɔɛ na fafe, won naxa tagan na ma.

²⁶Xa a sa li, won Ala xa nɔndi kolon, kɔnɔ won man nu fa lu yunubi raba ra won ɲanige ra, sɛrɛxɛ gbɛtɛ mu na sɔnɔn naxan nɔma won ma yunubie xafaride,

²⁷fo gaaxui xungbe Ala xa kiiti ya ra, naxan findima tɛ mankanɛ ra a matandilae bɛ.

²⁸Xa mixi nde Annabi Munsa xa sɛriyɛ matandi, e a faxama nɛ kinikinitareɲa kui, seede firin xa na mu a ra saxan xa seedeɲɔxɔya saabui ra.

²⁹Kɔnɔ ɲaxankatɛ dangima na tan na mixie bɛ, naxee Ala xa Di maboronma e sanyi ra, e a xa saatɛ wuli rasɔtɔ naxan e rasɛniyɛnxi, e Ala Xaxili rasɔtɔma naxan hinnɛxi e ra.

³⁰Won yi masenyi kanyi kolon,«N tan nan mixi gbeɲɔxɔma,n tan nan e sare fima e ma.» A man sɛbɛxi, «Marigi fama nɛ a xa ɲama makiitide.»

³¹Ala Ɲiɲɛ xa ɲaxankatɛ magaaxu.

³²Wo xa ratu na lɔxɔɛ singee ma. Wo to naiyalanyi to, wo naxa wo tunnabɛxi gere xɔrɔxɔɛ kui naxan findixi tɔɔrɛ ra wo bɛ.

³³E naxa wo konbi, e naxa wo ɲaxankata ɲama ya xɔri. Wo fan naxa lu mixie sɛɛti ma, naxee bara na tɔɔrɛ mɔɔli sɔtɔ.

³⁴Wo naxa kinikini geelimanie ma, wo naxa tin a ra sɛɛwɛ kui e xa wo harige ba wo yi ra, barima wo a kolon harige nde na wo bɛ naxan dangi na boore ra pon, a bu abadan.

³⁵Wo naxa fe rabolo, wo xaxili tixi naxan na, barima na sare gbo.

³⁶Wo hayi na tunnabɛxi ma, alako wo xa Ala sago rakamali, wo fa fe sɔtɔ a naxan laayidixi wo bɛ.

³⁷A sɛbɛxi,«A gbe mu luxi sɔnɔn.Naxan lanma a xa fa, a fama nɛ,a mu dugundima.

³⁸N ma tinxintɔɛ kisima nɛ danxaniya saabui ra.Kɔnɔ xa a sa li a man naxa gbilen xanbi,n mu ɲɛlɛxinma a xa fe ra.»

³⁹Won mu findixi fe rabɛɲinyie xa ra, naxee xa fe xun nakanama. Won tan findixi danxaniyatɔɛe nan na, naxee kisima.