Read Sosoxi Eburu 8 Bible Online

Eburu 8 - Sosoxi bible

Eburu 8

¹Masenyi xunyi nan ya: Won ma sɛrɛxɛdubɛ kuntigi magoroxi Ala Xili Xungbe Kanyi xa kibanyi yirefanyi ma ariyanna kui.

²A walima Ala xa hɔrɔmɔlingira yati yati nan kui, Marigi naxan tixi, adamadie bɛlɛxɛ fɔxi mu naxan na.

³Sɛrɛxɛdubɛ kuntigi birin lanma a xa sɛrɛxɛ mɔɔli birin ba Ala bɛ. Na kui a nu lanma se nde xa lu yi sɛrɛxɛdubɛ fan yi ra a naxan bama sɛrɛxɛ ra.

⁴Xa won ma sɛrɛxɛdubɛ kuntigi nu na duniɲa nu, a mu nu findima sɛrɛxɛdubɛ ra nu, barima Ala xa yaamari ɲan bara mixi gbɛtɛe ti na sɛrɛxɛ wali ra.

⁵Na mixie Ala batuma hɔrɔmɔlingira nan kui, naxan misaalixi hɔrɔmɔlingira ra naxan na ariyanna. Na nan a toxi Ala naxa Annabi Munsa yamari hɔrɔmɔlingira tife ra, a falafe ra,«A mato a fanyi ra,i xa hɔrɔmɔlingira tialɔ a masenxi i bɛ geya fari ki naxɛ.»

⁶Kɔnɔ yakɔsi Ala xa Mixi Sugandixi bara wali sɔtɔ naxan tide gbo boore sɛrɛxɛdubɛe xa wali bɛ tife ra Ala nun adamadie tagi. A tide gbo barima a faxi saatɛ naxan na, na fan saatɛ fori bɛ. A xa saatɛ mabanbanxi laayidie nan na, naxee fan dangi laayidi forie ra.

⁷Xa na saatɛ singe nu nɔma a xa wali rabade nu, Ala mu fama a firin nde ra nu.

⁸Ala naxa yi marakɔrɔsi raba ɲama ra,«Marigi xa masenyi nan ya:Waxati na fafe,n saatɛ nɛɛnɛ tongoma Isirayila nun Yudaya ɲama bɛ tɛmui naxɛ.

⁹Na mu luma alɔ na saatɛ singen naxan tongo e benbae bɛ,n e ramini Misira bɔxi ra tɛmui naxɛ.E to n ma saatɛ bɛɲin,n fan naxa e bɛɲin.Marigi xa masenyi nan na ki.

¹⁰Saatɛ nan ya n naxan tongoma Isirayila ɲama bɛ,na waxati dangi xanbi.Marigi xa masenyi nan ya:N nan n ma sɛriyɛ rasoma nɛ e xaxili kui,n a sɛbɛ e sondonyi ma.N findima e Marigi Ala nan na,e fan findi n ma ɲama ra.

¹¹Mixi yo mu a boore matinkanma,mixi yo mu a falama a ngaxakerenyi bɛ,‹I xa Ala kolon,›barima na waxati e birin n kolonma nɛ,kelife mixi xuri ma han mixi xungbe.

¹²N diɲɛma nɛ e xa tinxintareya ma,n e xa yunubie xafarima nɛ.»

¹³A to yi saatɛ xili fala saatɛ nɛɛnɛ, a bara boore findi saatɛ fori ra. Saatɛ fori tan lanma a xa ba na, a tide mu na sɔnɔn.