Read South Giziga GEN 12 Bible Online

GEN 12 - South Giziga bible

GEN 12

¹Akẽh na, Bumbulvuŋ a ɓa Abrama: «Bi, pula hirwuy ɗik, muy ɗikey ati hay ngi bunuko. Aru nga hirwuy, ya masa buguw di.

²I sa tiri tika dideˀ ngi sukwi madiɗaŋ, i sa ɗuwuluw mi, yo i sa ga ɓa slimiɗ ɗik a zil haɗa. Mizli a sa lumam ɗuwula tisi ka.

³I sa ɗuwula mi da mizli maɗuwulukuw mi. Amma i sa nisa mizli masa nisukuw. Sukwi ngi mizli ngisi ruwuyoy gar, a sa lumam ɗuwula mi tisi ka.»

⁴Abram a cuh ka Bumbulvuŋ miɓaŋ di tuwa, Lot aru aseˀe. Abram mupula Haraŋ na, naɓa naŋ ti vi kukur tarnaˀ nga zlum.

⁵A zuɓa ngwas naŋ Saray waɗ jamba naŋ Lot. A ram ti zlili taŋhay gar waɗ mizli taŋ mihiɗikaka taŋ a Haraŋ. A bam, a ram kini nga Kanaˀan. A ra ndilam a Kanaˀan,

⁶Abram a tuwuɗa hirwuyo gar, hã sesẽŋ ar li mazilaka Sikem, avu kuli widis ngi hirwuy Mamre. Naɓa Kanaˀanay a pam le a diga.

⁷Bumbulvuŋ a bugo vu da Abrama, a ɓaŋ: «I sa vula hirwuy hana da dideˀ ɗikey.» Abram a ɗiyi li gi mikuli da Buymisemuŋ mubugaŋ vu tuwa.

⁸A cuh ti kẽh, aru kini nga sarmuwã tisi pas ngi miprik ngi walahay Betel. A ɗiya guɗuk naŋ a diga, ar wala ngi Betel tisi pas ngi pastaˀ waɗ Aya tisi pas ngi miprik. A ɗiyi li gi mikuli da Bumbulvuŋ a diga ma, a tumbuloŋ, a zilaŋ ti slimiɗ naŋ Bumbulvuŋ.

⁹Dar Abram a kiraha guɗuko nga mbuŋ nga mbuŋ, aru kini nga Negev.

¹⁰Ti di nah na, may a gi angi hirwuy nah, Abram a ru, nga Ezipte, ɓa a zuko neˀ a diga, asi may a bul vu le asi ruwuyo.

¹¹Ti taŋ migweˀ ngi ndila Ezipte na, a ɓa ngwas naŋ Saraya: «Cin ɗi, i si na le ki ngwas mukuyu gwatta.»

¹²Da Eziptehey a sa purukuw le na, a sa ɓam: «Ki ngwas ɗu, a sa kiɗikiy ya vagay, a sa pulukuw ka ti siifa.

¹³Ambuh, ɓi na: ki sukum ɗu, ɓa a gikiy mezleŋ asi ka, yo ɓa i ndir ti siifa mbele ka.»

¹⁴Ti Abram mindil a Ezipte na, Eziptehey a puraka na, ngwasa naŋ kuyu gwatta.

¹⁵Mizli madiɗa ngi buy madiɗa ngi Eziptehey, mupuraka na, ara duduɓaka ɓi nah avu buy madiɗa ngi Ezipte, a zuɓakaŋ ngwasa ngi hay naŋ.

¹⁶A gaka mezle da Abram asi ngwas a vulakaŋ tumuŋhoy, ˀaway waɗ slahay, zungu mizile ati mongosohoy, beke mizile ati mongosohoy waɗ zlogomohoy.

¹⁷Amma Bumbulvuŋ a kuta buy madiɗa ngi Ezipte ati hay naŋ ti bonoy madiɗa wal wal, asi Saray ngwas ngi Abrama.

¹⁸Buy madiɗa ngi Ezipte a zila Abrama, a ɓaŋ: «Ki gi i gwat mi hana ka? I ngwas ɗik ngbaŋ na, ki ɓiy di ta vur mike?

¹⁹Ki ɓiy i sukum ɗik, i zuɓa ngi ngwas na, vur mike? Wurenna, ngwas ɗike n'ani, tiɓaŋ, cuhu!»

²⁰Buy madiɗa ngi Ezipte a ɓa mizli naŋhaya ɗaˀ, ɓa a ɓulakaŋ ati ngwas naŋ waɗ gwat naŋhay gar.