Read South Giziga GEN 13 Bible Online

GEN 13 - South Giziga bible

GEN 13

¹Dar Abram a mo ti Ezipte nga ruwuy Kanaˀan vay ruwuy ati ngwas naŋ waɗ gwat naŋhay gar. Taŋ bummoˀ ati Loto.

²Abram i mbur misi zlili haɗa teˀe, naŋ ti gezleŋ ngi ginewey haɗa, ti dala waɗ ɓiri tapals tapasl.

³A slikiɗ nga mbuŋ neˀneˀ, hã sesẽŋ a Betel, ar li naŋ micifi dumbuŋ, ar wala ngi Betel ati Ay tuwa.

⁴Ar li naŋ miɗiya li gi mikuli ara zleˀe tuwa, Abram a tumbulo Bumbulvuŋ a diga, a zila Buymisemuŋ ti slimiɗ naŋ Bumbulvuŋ.

⁵Lot mubummoˀ ati Abram tuwa kwana, naŋ da ti gezleŋ ngi tumuŋhoy, ˀaway, slahay waɗ guɗukoy ma.

⁶Li a ndila taŋ ɓa a cifam cuwa arleˀe gu ta. Asi zlili taŋhay a gam le haɗi kuyta wãˀ, hã a cifam jom arleˀe gu ta.

⁷Tiri a slikiɗ ar wala ngi mijigin ngi Abramay ati ngi Lotoyo. Ti nah na, i Kanaˀanay ati Perizihey misi asi hirwuyo.

⁸Joˀ Abram a ɓa Loto na: «Anja tiri a slikiɗ ar wala ndra ati ka ta, malla ar wala ngi mijigin ɗuwoy ati ngi ɗikey ta, asi ndr'i ngi wazlaray purla.

⁹Hirwuyo n'ani a mbuŋ ɗike takwa? Hunukukum so: da ki ru tir vay muŋ na, yi ru tir vay ruwuy. Da ki ru tir vay ruwuy na, naɓa yi ru tir vay muŋ.»

¹⁰Lot, a pura hirwuy ngi mi mizaw Zurdeŋ keɗ keɗ na, li ara hir haɗa. Dumbuŋ ti Bumbulvuŋ mususuyumo Sodom ati Gomoro t'aruŋ na, zle a diga hã a Suwara, naŋ kaɓa guva ngi Bumbulvuŋ a Eden, kaɓa Sozo ngi ruwuy Ezipte.

¹¹Lot a zuɓ nga naŋ, i hirwuy ngi mimizaw Zurden gar, a slikiɗ kini ng'asi pas ngi miprik. A wunkam ar wala taŋ kahana.

¹²Abram a cifi a ruwuy Kanaˀan, yo Loto kwana a cifi a ruwuy ngi mi mizaw Zurdeŋ, ara ɗiya guɗuk naŋhay sesẽŋ a Sodom.

¹³Na mizli ngi Sodomoy vuna i misi moˀorehey haɗi, i migi mungrahay kuyta wãˀ a mbuŋ Bumbulvuŋ.

¹⁴A dirba Lot muguh na, Bumbulvuŋ a ɓa Abrama: «Zuɓa hiri, pura li bal bal gar, tir vay muŋ, tir vay ruwuy, tir vay si pas ngi miprik waɗ tir vay sipas ngi pastaˀ.

¹⁵Haˀaw, hirwuy ka mapura hana gar na, i sa vuluw di da ka ati dideˀ ɗikey hã ngi sete.

¹⁶I sa ga ɓa dideˀ ɗikey a sikam haɗi kaɓa murɓuk ngi ruwuy. Da mbur a slufa murɓuk ngi ruwuyo gu na, naɓa a sa slufa dideˀ ɗikeye gu ya.

¹⁷Slikiɗ, bula hirwuyo bal bal gar. Vur i sa vuluw di da ka.»

¹⁸Abram a kiroho guɗuk naŋhaya, a so cifi asi widis madiɗa a Mamre, gweˀ avu Hebroŋ. A ɗiyi li gi mikuli da Bumbulvuŋ a diga.