Read South Giziga GEN 15 Bible Online

GEN 15 - South Giziga bible

GEN 15

¹A dirba gwat tayna migam na, Bumbulvuŋ a biga vu da Abram ar musuwun, a ɓaŋ na: «Ki zluwun ta Abram, yi mbaray ɗiki, i sa vuluw migir ɗike haɗi.»

²Abram a mbiɗaŋ di: «Bumbulvuŋ Buymisemuŋ ɗu, kisa vuliy mike? Vi ɗu ara cuh, ki vuliy yi ta, yo masa zuma hay ɗu i gawla ɗu Eliyezer ngi Damas.»

³A ɓi ma: «Ani ki vuliy yi ta, i mbur ngi wuzla mizli ngi hay ɗuwoy masa zuma hay ɗu.»

⁴Dar Bumbulvuŋ a ɓaŋ so na: «Masa zuma hay ɗik i Eliyezer ta, amma i mbur masa bo ti kwacay ɗik masa zuma hay ɗike.»

⁵A bo ti Abrama ng'avra, a ɓaŋ: «Singila muŋ, slufa wurzlaŋhay na, da ki slufa taŋ gu kwani.» Dar a ɓaŋ ma: «Dideˀ ɗikey a sa jam haɗi kahana ya.»

⁶Abram a tiɓa Bumbulvuŋ le, vurˀe, Bumbulvuŋ a puraŋ i mbur mijeŋŋe a mbuŋ naŋ.

⁷Buymisemuŋ a ɓa Abrama na: «I ya Bumbulvuŋ mubo ti ka ti Ur, hirwuy Babiloŋ, ɓa i vuluw hirwuy hana, a ndir da ka.»

⁸Abram a mbiɗaŋ di: «Bumbulvuŋ Buymisemuŋ, i sa si na a vi mi, a sa ndir da ya vuna ka?»

⁹Bumbulvuŋ a ɓaŋ: «Siy ti sla bulkoŋ ngi vi makir, ˀaw ngi vi makir, zlengerek ngi vi makir, gonok waɗ zuŋ ɗiyuw dirgwaɗ.»

¹⁰Abram a saŋ taŋ gar, a wursla taŋ a wuzla cuw cuw, a pa taŋ kuɓ kuɓ, pulaˀ ng'ar cala, pulaˀ ng'ar cala, wala taŋ faw faw, a wursla ɗiyuwoyo ta ɓula.

¹¹Mogodokoy a ndilam vu ar maarahay tuwa, amma Abrama a ɓula taŋ.

¹²Hirak ti pas madiɗ na, hinje bebezem a zlumbura Abrama wuɗ wuɗ, a zla a zluwun haɗi, yo luvuŋ mititim titim magi zluwun, a sirtaŋ ngbulum.

¹³Buymisemuŋ a ɓa Abrama: «Sina kuy kuy, dideˀ ɗikey a sa cifam a ruwuy mulak, a sa tiram taŋ beke a diga, a sa guzuvuraka taŋ hã vi skat skat mufaɗa.

¹⁴Amma sukwi nah, mitiri beke ti dideˀ ɗikey vuna, ya misa kutaŋ le ti bonoy na, a dirba nah a sa bam, a cohom ti zlili haɗa.

¹⁵Amma ka, a dirba ka muzum ɗaf le zuy zuy na, kisa muc ti jam, ki ra luuma dideˀ ɗikeye.

¹⁶Dideˀ ɗikey a sa moko ng'aka sey dideˀ mukutur ti kutur mufaɗ. Asi moˀore mukuyta wãˀ ngi Amoriheye, a ndila ɓa hã i ɓula taŋ avra t'aruŋ.»

¹⁷A dirba pas midiɗ na, luvuŋ a gi titimtitim. Neˀ na, magayak misi irne vu njilim njilim waɗ cunju, a cuh ti wuzla useˀ muwursluka tuwa.

¹⁸Tapas nah na, Bumbulvuuŋ a jumˀay ati Abrama: «Hirwuy misenna zle a mizaw Ezipte hã sesẽŋ a mizaw madiɗa mazilaka Efrat na, yi sa vula da dideˀ ɗikey.

¹⁹I hirwuy ngi Kenihey, ngi Kenizihey, ngi Katmonihey,

²⁰Hitihey, Perizihey, Refayihey,

²¹Amorihey, Kanaˀanay, Girgasihey waɗ Zebusihey.»