Read South Giziga GEN 17 Bible Online

GEN 17 - South Giziga bible

GEN 17

¹Bumbulvuŋ mibiga vu da Abrama, naɓa naŋ ti vi kukur ngoltir ngaŋ ngoltir, a ɓaŋ: «Buymisemuŋ misi gidaŋ wãˀ i ya. A rudigi a mbuŋ ɗu, cifi kaslsla.

²I sa jumˀay ati ka, i sa ga ɓa dideˀ ɗikey a sikam haɗi.»

³Abram a huruk huruk a ruwuy, Buymisemuŋ a ɓaŋ ma:

⁴«Jumoˀay ɗu ati ka ani: Ki sa tiri dideˀ ngi sukwi ngi mizli haɗi.

⁵Anta a sa zilukuw Abram mata, amma Abraham, asi i sa ga ɓa ki tiri dideˀ ngi sukwi ngi mizli haɗi,

⁶yo i sa ga ɓa ki yi haɗi wãˀ, i sa ga ɓa ki yi sukwi ngi mizli, buy madiɗahay a sa boko tivi dideˀ ɗikeye.

⁷I sa ndir ti jumoˀay ɗu misi ati ka na, yo a dirba ɗike, i sa jumˀay ati dideˀ ɗikeye, hã avu dideˀ mukutur ti kutur, mukutur ti kutur hã ngi sete, ɓa i sa tiri Buymisemuŋ ɗik ati ngi dideˀ ɗikey a dirba ɗike.

⁸Hirwuy mulak ka misi anga wurenna na, i sa vuluw di, a ndir da ka ati dideˀ ɗikey a dirba ɗike. Hirwuy Kanaˀan gar a sa ndir da taŋ ngi set, joˀ yi sa tiri Buymisemuŋ taŋ.»

⁹Buymisemuŋ a ɓa Abrahama ma: «Ka, kisa ja jumoˀay ɗu a hirnga, a dirba ɗike kwana, i dideˀ ɗikey, hã avu dideˀ mukutur ti kutur nga mbuŋ nga mbuŋ.

¹⁰Jumoˀay ɗu ati kum, ɓa ki jaka a hirnga, ka ati dideˀ ɗikey a dirba ɗike na, anihĩ: ziri mizile kumoy gar na, a sa caka taŋ a mizaw.

¹¹I ci mizaw masa biga jumoˀay, ya ɓi micica ar wala ɗu ati kum.

¹²Ziri mizilehey, kum miyaka taŋ le gar, hã avu dideˀ mukutur ti kutur nga mbuŋ, da a ndilaka le hin dangafaɗ na, a caka taŋ a mizaw, rak rak ati bekehey miyaka taŋ a hay ɗik, malla ka mihiɗika taŋ ti hiɗik, ko misi i dideˀ ɗikey ta gar.

¹³Beke miyaka cak a hay ɗik ati mihiɗika ti hiɗik gar na, a caka taŋ a mizaw, ɓa jumoˀay ɗu a bigi avu dumvu kumo ngi sete.

¹⁴Amma mbur mizile mici a mizaw ta na, a sa gwahaka ti wuzla mizli avra, asi a ngila ɓi ngi jumoˀay ɗu le.»

¹⁵A dirba nah Buymisemuŋ a ɓa Abrahama: «Ki zila ngwas ɗike Saray mata, amma zle dana, a sa zilaka Sara.

¹⁶I sa ɗuwulaŋ mi, yo ma na, i sa ga ɓa a yuw mangal mizile.» I sa ɗuwulaŋ mi, a sa tiri dideˀ ngi sukwi ngi mizli haɗi. Buy madiɗa ngi sukwi ngi mizli wal wal a sa boko ti vaŋ.

¹⁷Abraham a huruk huruk a ruwuy, dar a singir, a ɓi ti kwacay naŋ: «Na, mbur ngi vi skata, a yi mbri maka gawlay! Yo Sara, ngwas ngi vi kukur ngoltire, ɓa hã a yi maso!»

¹⁸A ɓa Buymisemuŋ so na: «Da Ismayele naŋ da, yo ki ra ki slimiɗ a ng'asi na, tewle si, y'anta cufuɗ gwat mifineˀ hana mata.»

¹⁹Buymisemuŋ a ɓaŋ: «Anta kanah ta wãˀ! Ngwas ɗik Sara a sa yuw mangal mizile, kisa caŋ slimiɗe Izak, i sa jumˀay ati naŋ, waɗ ati dideˀ naŋhay a dirba naŋ hã ngi sete.

²⁰Yo ka mucufuɗiy vur Ismayel na kwana, i tiɓa le. Ani i ra ɗuwulaŋ mi, i ra ga ɓa a sa yi haɗi, a sa yi buyoy kuruˀ nga cuw, yo i sa bo ti sukwi madiɗa ti vaŋ.

²¹Amma i sa jumoˀay ati Izak, Sara masa yuw di didirba li kahana na.»

²²A dirba Buymisemuŋ mitika mingiɓi naŋ ati Abraham na, a cuh kileŋ ava.

²³Akẽh na, Abram a zuɓa mangal naŋ Ismayel ati beke miyaka taŋ a hay naŋ cek, waɗ mihiɗika ti hiɗikey, mizli mizile ngi hay naŋhay gar, a ca taŋ a mizawa kalla tapas Buymisemuŋ miɓaŋ di vuna si.

²⁴Abraham mici a mizawa, naɓa naŋ ti vi kukur ngoltir nga ngoltir,

²⁵yo naɓa Ismayele kwana naŋ ti vi kuruˀ nga makir.

²⁶Abraham ati mangal naŋ Ismayele, a cam mizawa pas purla.

²⁷Mizli mizile ngi hay naŋhay gar, beke miyaka taŋ a hay malla mihiɗika ti hiɗik avu mulakay kwana, a cam mizaw gar ati naŋ.