Read South Giziga GEN 18 Bible Online

GEN 18 - South Giziga bible

GEN 18

¹Bumbulvuŋ a biga vu da Abrahama gweˀ avu widis madiɗa a Mamre. Hirak ngi pas mazlum cãˀcãˀ na, Abram aro a mi guɗuk naŋ.

²Keɗ na, mizli makir deŋ deŋ zar neˀ acikeˀe. Naŋ mupura taŋ na, a kil baɗ ti mi guɗuko nga ji taŋ hirngaŋ, a huruk huruk a ruwuy.

³Dar a ɓi: «Aw Buymisemuŋ ɗu, ambuh, ki cuh deŋŋe avu hay ngi gawla ɗike ta.

⁴Anja a sukum ti yam neˀ ɓa ki bunaka Saraya, yo ɓa ki musukom vu asi widis hana.

⁵I sa gukum gwat ngi zum neˀ, ɓa a vulukum gidaŋ, a dirba nah, kisa zuɓaka jiviɗ kumo, a tiɓaŋ ɓa ki cohom a ciki gawla kumo kine ta.» Taŋ a mbiɗakaŋ di: «Kuy! Ga kaɓa ka miɓa.»

⁶Akẽh na, Abraham a wus vu kutum ng'ar guɗuko, a ɓa Sara na: «Kutum! Hiric hapa mimezle kurkwasl makir, fukuɗaŋ, do di helelem mikefer kefer.»

⁷Joˀ a kil ng'avi ginewey, a jo zuŋ sla mezle ngi sli. A vula da gawla naŋ, ɓa a wus vu ti slra naŋ kutum.

⁸Slra ngi useˀ mikiɗ mi na, Abraham a wuɗ ɗuwa mikiɗa naŋ waɗ mawayaŋ, aru taŋ taˀtaˀ a mbuŋ mulakay tuwa, naŋ a cici zlumbaˀ asi widis gweˀ avu taŋ, taŋ ara zumam.

⁹A ɓaka Abraham tuwa: «ngwas ɗik Sara naŋ amaka?» A mbiɗa taŋ di: «N'ada ar guɗuku.»

¹⁰Mbur pal a wuzla mulakay tuwa, a ɓaŋ: «I sa mo didirba li kana ngi hay ɗike na, naɓa ngwas ɗik Sara naŋ ti zuŋ a duba. Dambalaka Sara ara cine zlumbaˀ avu miviŋ ngi guɗuk ti dirba Abrahama.»

¹¹Abraham ati Sara a gam gal le haɗa, yo Sara naŋ anta juw mata.

¹²Sara a zla singir tehhe ar vu naŋ a muŋ, a ɓi: «Ya mikircak hana vuna, ɓi ngi zil ada avu ya aruŋ ma kwa? Yo zil ɗu a gi gal le kucup wãˀa!»

¹³Dar Bumbulvuŋ a ɓa Abrahama: «Sara a singir vur mike? A ɓi: i gi gal le, yo i yi gu ta vur mike?

¹⁴Gwat mafucuka Bumbulvuŋ ada kwa? Ya masa mo didirba li kahana ngi hay ɗik na, naɓa Sara naŋ ti mangal a duba.»

¹⁵Sara a zluwun, a ji mi, a ɓi: «Yi singir ta.» Naŋ a mbiɗaŋ di: «Ĩˀĩ! Ki singir le kuy kuyoy ɗi.»

¹⁶Mizli tuwa, a slikiɗam ti kẽh, a ram jik dibiɗ nga Sodom. Abraham a kisa taŋ, a mbiɗa taŋ mi.

¹⁷Bumbulvuŋ a ɓi ti kwacay naŋ: «Gwat ya maga na, i ɗumo avu Abrahama ma kwa?

¹⁸Anja sey Abraham a ɗuv sukwi madiɗa taˀa, sukwi migidaŋ. Sukwi ngi mizli ngisi ruwuyoy gar a sa lumam ɗuwula mi ti seˀeŋ.

¹⁹Ya muwunaŋ na, ɓa a ɓa ziri naŋhay ati dideˀ naŋhaya, ɓa a jaka ɓimuɗuva ɗu kuy kuy a hirngaŋ, ɓa a gam gwat mijeŋŋe, yo mi kaslsla. Vurˀe, i sa gaŋ gwat ya miɓaŋ di ɗaˀ le tuwa.»

²⁰Akẽh na, Bumbulvuŋ a ɓa Abrahama na: «Mizli matuwam ti Gomor ati Sodom na, a fini gidaŋ le, mungra taŋ a gi le haɗi teˀe.

²¹Vurˀe, sey i po sar nga puraŋ, tuwuy ngi mizli mundulo sesẽŋ avu ya na, da a gam le gisiŋ kanah kwana. Da i gisiŋ, i gisiŋ ta ma, i sa sinaŋ.»

²²Mizli cuw mekelemey a ram nga Sodom. Amma Bumbulvuŋ a ndir deŋ avu Abrahama.

²³Abraham a kirih ng'ava, a ɓaŋ: «Bumbulvuŋ, ani kisa ziza mizli mijeŋŋeheye jom ati migi mungraˀahaya gisiŋ kwa?

²⁴Asinta, kisa lum mizli mijeŋŋehey kukur zlum a Sodomo kwani! Ki sa ziza walahaya gbaˀ na si kwa? Ki sa pula ɓi nah teˀ asi mizli mijeŋŋehey mizli ngir zlum na ta kwa?

²⁵Kay, ɓa ki ga kanah na, naŋ kuy ta! Ɓa ki kiɗa mbur mijeŋŋe jom ati migi mungra sukwa? Naɓa mbur mijeŋŋe a tiri le rak rak ati migi mungra. Kay naŋ kuyta wãˀ! Migi kiita da duniya keɗeɗe, ɓa a ga kiita kaslsla ta na, a gi ta.»

²⁶Bumbulvuŋ a mbiɗaŋ di: «Da yi lum mizli mijeŋŋehey le a Sodomo kukur zlum na, naɓa i sa pula mizli ngir walahaya gar asi taŋ.»

²⁷Abraham a ɓaŋ ma: «Ya matum vu ngi ɓuw ɓi na, wereke Bumbulvuŋ ɗu. Yi murɓuku, yi fucu ngataraŋ.

²⁸Asinta, a sa kic mizli zlum ngi gi kukur zlumo kwani! Ki sa ziza walahaya gar, asi mizli mikicam zlum na kwa?» Buymisemuŋ a ɓaŋ: «Da i lum mizli mijeŋŋeheye le kukur mufaɗ nga zlum a diga na, y'anta sa ziza walahaya ta.»

²⁹Abraham a hurdum hirdam, a ɓaŋ: «Asinta, da taŋ a diga kukur mufaɗ si na mbrike?» Buymisemuŋ a ɓaŋ: «Da i lum le kukur mufaɗ na, y'anta sa ziza ta.»

³⁰Abraham a ɓaŋ ma: «Aw Bumbulvuŋ ɗu, da i ra ɓuw ava na, ki ji mevel ta. Asinta, da i mizli kukur makir a diga tewle na mbrike?» A ɓaŋ: «Da i lum le kukur makir a diga na, y'anta sa ziza ta.»

³¹Abraham a ɓi ma: «Wereke Bumbulvuŋ, i ra tum vu ngi ɓuw ava. Asinta, da taŋ a diga kukur cuw tewle na mbrike?» Buymisemuŋ a mbiɗaŋ di: «Da i lum le kukur cuw a diga na, y'anta sa ziza ta.»

³²Dar Abraham a ɓi ma: «Aw Bumbulvuŋ, ki ji mevel ta, yi wuɗ i ɓuw ngi kiɗa mi naŋ wãˀ. Asinta, da taŋ a diga kuruˀ tewle na mbrike?» Buymisemuŋ a ɓaŋ: «Asi mizli mukuruˀ tayna, y'anta sa ziza walahaya ta.»

³³A dirba Buymisemuŋ mitika mingiɓi naŋ ati Abram na, a cuhu, joˀ Abram kwana a mi ngi hay naŋ.