Read South Giziga GEN 19 Bible Online

GEN 19 - South Giziga bible

GEN 19

¹Ng'avi hiikuɗ na, modro ngi Buymisemuŋhoy mucuw tuwa, a ndilam le a Sodomo. Naɓa Lot aro joˀ zleˀe a mizlingre ngi ci ng'ar walahay Sodomo. Naŋ mupura taŋ keɗ na, a slikiɗ nga ji taŋ hirngaŋ, a huruk huruk a ruwuy.

²A ɓa taŋ: «Ambuh kum buy ɗuwoy, inga a ram bal ti hay gawla kumo, hinam wãˀ araŋ, bunaka sar kumoyo, yo timiprik na, kisa zuɓaka jiviɗ kumo.» Amma taŋ a mbiɗakaŋ di: «Ĩˀĩ, mbak ndr'i hinam avra si.»

³Amma Lot a hurdum hirdam kuy kuy, hã a ram, ara pam sar a hay naŋ. A da ka taŋ ɗafa waɗ ɗaf manja ˀis ara, joˀ taŋ a zumakaŋ.

⁴A ɓam ɓi ngi hin t'aruŋ si na, mizli ngir walahaya, a ndahaka haya gun, gawla ati midigila ngi Sodomoyo gar, mizli fec fec, ko mbur a ndir ta.

⁵A zilaka Loto, a ɓakaŋ: «Mizli musoko ngi hiikuɗ hana ngi hay ɗik na, taŋ amaka? Bo taŋ ng'avi ndra aka, i hinam taŋ.»

⁶Lot a bo deŋ avu miviŋ, a guco di zlindim ti dirba,

⁷a ɓa taŋ: «Ambuh kum sukum ɗuwoy, ki gaka malambaˀ hana ta.

⁸Y'ada ti ziri diilihey cuw, a sinam ziley ɗaˀ t'aruŋ, y'ani sukum taŋ, kisa gam taŋ gwat kum mawuɗama. Amma anja ki wusaka mizli tayna neˀ ta, asi a soko a hay ɗu.»

⁹Taŋ a mbiɗakaŋ di: «Kirih nga kẽh!» Joˀ a ɓam ma: «Mbur hana a slikiɗo ti slikiɗ ma na, a wuɗ a biga ndra ɓi kwa? Da kine na, i ra gakaŋ malambaˀ fineˀ ngi mulakay vuna jaka.» A paka haŋ sek da Loto, a kiraham ng'avi miviŋ ɓa a ngilakaŋ.

¹⁰Amma mizli mucuwoy tuwa, a tilaka haŋ, a jaka Loto ng'avi taŋ a hay a muŋ, a gicaka miviŋ zlindim.

¹¹A hulufoko mizli migweˀgweˀhey a ciki miviŋ na, zle avi ziri, hã avu mizli madiɗahay, ko a lumaka mizlingre ti ka ta.

¹²Mizli mucuwoy tuwa, a ɓaka Loto: «Mbur ɗik mekelem adaka aruŋ kwa? Ko jomo ɗik, ziri mizilehey, ziri mongosohoy. Gwat ɗik misi ar walahay gar na, bi taŋ tir walahay hana avra.

¹³Naŋ kine, i sa zizaka walahaya, asi tuwuy ti gwat ngi gi naŋ na, a gi le haɗi a mbuŋ Bumbulvuŋ. Vurˀe, a slino ndra ɓa i zizakaŋ.»

¹⁴Lot a bi, aru ng'avi jomo naŋhay mawuɗ a zuɓaka ziri naŋhaya, a ɓa taŋ: «Slikiɗam, bam tir walahay hana, asi Bumbulvuŋ a wuɗ a ziza walahaya.» Amma jomo naŋhay a puraka kaɓa a ɓi di i ɓi ngi singir.

¹⁵Ti li mawun wehweh na, modro ngi Buymisemuŋhoy tuwa, a hurdumom ti Loto, ɓa a wus vu, a ɓakaŋ: «Slikiɗi! Zuɓa ngwas ɗik ati ziri mongoso ɗikey mucuw misi akaka na, cuh vur ka mazizi asi malambaˀ ngi walahay hana.»

¹⁶A puraka na, Lot ara zum vu aruŋ, modro mucuwoy tuwa, a ɗiɗaka kaw avu haŋ waɗ ngwas naŋ ati ziri mongoso naŋhay mucuw tuwa, asi Bumbulvuŋ a puraŋ ircece le, a bo di tir walahay ng'avra.

¹⁷Ti taŋ mubam di nga duba gala na, pal a wuzla modrohoy tuwa, a ɓa Loto: «Kil ɓa ki laha hutuŋ ɗike. Ki puro hiri murdirba ta, ko ki cici asi ruwuy hana ta. Da ki wuɗ laha hutuŋ ɗike le na, kil nga muwã.»

¹⁸Lot a ɓa taŋ: «Ĩˀĩ, Buymisemuŋ, a gi ta!

¹⁹Ani, ki puriy ircece le, yo ki giy mezle le haɗa ti ka milihiy hutuŋ na so. Amma ɓa yi kil sesẽŋ a muwã, manja mendere hana a jiy is, i muc a jiviɗe ta na, i kil gu ta.

²⁰Pura walahay ngi diga na, naŋ gweˀ neˀe, yo naŋ meciɗeke, zuwen i ra ɗum araŋ, ɓa ngi laha hutuŋ ɗu na, naŋ preˀ kwa?»

²¹Modro a mbiɗaŋ di: «Naŋ kuy! I tiɓa le, y'anta sa wusa walahay ka maɓiy di hana ta.

²²Wus vu, ara ɗum a diga kutum, asi y'anta sa gi gwat neˀ ta, sey da ka mindil le a diga far.» Vurˀe, a zilaka walahay nah Soˀar.

²³Lot mindil a Soˀar na, naɓa pas ara bawa.

²⁴Dar Bumbulvuŋ a po vu ngi barudu matiɓi njilim njilim ng'ar walahay Sodom ati Gomoro kaɓa vuŋ magi.

²⁵Walahay tayna, hirwuy ati mizli ngi raˀahaya waɗ gwat mupusa ngi raˀahay gar na, a mbiɗa taŋ, a wurataŋ cek.

²⁶Ngwas ngi Lot a pur hiri murdirba, a tiri mandaŋ sirlim, kaɓa gwat mindira ti ndir.

²⁷Cẽẽt ngi miprik na, Abraham aru ng'ar li naŋ micici a mbuŋ Bumbulvuŋ tuwa.

²⁸A pur hiri kini nga Sodom, Gomor ati hirwuy ngi ciki taŋhay gar na, a pur cunju tirslik, ara ngis zle a ruwuy nga muŋ ka hay mawur.

²⁹Dambalaka, ti Buymisemuŋ maziza walahay ngir li tayna, misi Lot ara na, ara wulka Abrahama keŋŋe, a ɗiɗo Loto ti wuzla bonoyo ng'avra.

³⁰Akẽh na, Loto a zluwun ngi cifi a Soˀara. Vurˀe, a pula walahaya, ara cifi a muwã. Ziri naŋ mongosohoy mucuwo, a ram aseˀeŋ. A cifam ati ziri naŋhay ar butum.

³¹Ngi pas mekeleme, zuŋ madiɗa a ɓa meciɗeke: «Cine ndra a gi gal le, ani mbur zil anta asi ruwuyo, ɓa a so gi ti ndra ngwas ka mizli gar magam na ta.

³²Akum! I ra vulaka mbaazla da cine ndra, ɓa a wi, a sa hin ti ndra, i yakaŋ dideˀhey.»

³³Ngi duvuɗ nah na, a vulaka mbaazla da cine taŋ, a wi, joˀ zuŋ madiɗa a ci, a hinam ati cine. Taŋ mihinam, yo zuŋ misa slikiɗ gar na, ko cine a si na neˀ ta wãˀ.

³⁴Li naŋ muwun ma na, zuŋ madiɗa tuwa, a ɓa sukum naŋ meceɗeke: «Pura ɗi, i hinam le ati baha. I vulakaŋ mbaazla duvuɗ dana ma, ɓa ki ra hinam cuwa aya. Ɓa i yakaŋ dideˀhey.»

³⁵Ngi duvuɗ nah na, a vulaka mbaazla da cine taŋ ma. Zuŋ meciɗek a ru, ara hinam ati cine, taŋ mihinam, yo zuŋ misa slikiɗ gar na, ko cine a si na neˀ ta.

³⁶Ziri mongosohoy mucuw tuwa, a gam hur le ti cine taŋ Loto.

³⁷Zuŋ madiɗa a yi mangal mizile, a zila Moˀap, naŋ i dideˀ ngi Moˀapay hã danaŋ.

³⁸Zuŋ meciɗeke kwana, a yi mizile vuna ma, a zila Ben-Ami, naŋ i dideˀ ngi Amoŋhoy hã dana.