Read South Giziga GEN 20 Bible Online

GEN 20 - South Giziga bible

GEN 20

¹Akẽh na, Abraham a slikiɗ, aru kini ng'ar li mazilaka Negev, ara cifi ar wala ngi Kades ati Sur, a dirba nah, a sa zik neˀ a Gerar.

²Abraham a ɓa mizli vur ngwas naŋ Sara na, i sukum naŋ. Joˀ Abimelek, buy madiɗa ngi Gerar, a slin ɓa a zuɓakaŋ Sara.

³Amma ngi duvuɗ nah na, Buymisemuŋ a biga vu da Abimeleke angi musuwun, a ɓaŋ: «Ani kisa mucu, asi ka muzuɓa ngwas hana na, naŋ ti zil.»

⁴Abimeleke, a gumbuˀ ng'ava zleˀe t'aruŋ, a ɓa Buymisemuŋ: «Bumbulvuŋ ɗu, ko da walahaya gar naŋ jeŋŋe kwana, ki zizaŋ cummo kwa?»

⁵Abraham ti hirnga naŋ a ɓiy le: «I sukum ɗu kini ta kwa?» Ngwasa kwana, a ɓi le njah: «I sukum ɗu.» Yi ga ti mevel mezleŋ, ko i gi malamba neˀ ta.

⁶Angi musuwun vuna ma na, Buymisemuŋ a mbiɗaŋ di: «Ya vuna kwana, i si na le, ki ga ti mevel mezleŋ, yo mutukuw ɓa ki gi mungra avu ya ta na, i ya vuna ma, ya mupuluw ɓa ki wusa ta na, vurˀe.

⁷Wurenna, mi ti ngwas hana da zil naŋ a muŋ, asi zil naŋ i mijiviɗi, a sa dir dibiɗ ar deɗe ɗike, ɓa ngi laha siifa ɗike. Amma da ki maŋ di ta na, si na sin le, kisa muc gisiŋ gisiŋ, ka ati mizli ɗikey gar.»

⁸Ngi miprik prik na, Abimelek a slikiɗ, a zilo gawla naŋhay gar, a slufa taŋ mingiɓi hana gar. A zluwunam haɗi teˀe.

⁹Dar Abimelek a zila Abrahama, a cufuɗaŋ: «Ki ga ndra hana i mike? Yi guw malambaˀ mi, ɓa hã ki ciy ng'ar mungra madiɗa jom ati zumabuy ɗu ka? Ki giy hana i gwat ngi gi da mbur ta.»

¹⁰Abimelek a ɓi ma: «Ki wuluk zleˀe mbri ɓa ki ga kahana ka?»

¹¹Abraham a mbiɗaŋ di: «I ɓi ti kwacay ɗu zleˀe na: zluwun ti Buymisemuŋ anta neˀ asi ruwuy hana ta, ani a sa kiɗikiy asi ngwas ɗu kwani.

¹²Na zle i sukum ɗu gisiŋ, cine ndra jom, amma mumuŋ naŋ pal ɓula, naŋ mitiri ngwas ɗu na vurˀe.

¹³Ti Buymisemuŋ mubo ti ya wuk avu hay ngi baha na, i ɓa ngwas ɗu Sara: ‹Ar li ndra masa ram ara gar na, giy mezle, ɓi: Ki i sukum ɗu.›»

¹⁴Abimelek a ngic tumuŋhoy, ˀaway, slahay waɗ beke, mizile ati mongosohoy, a vula taŋ da Abrahama, a maŋ ti ngwas naŋ Sara a muŋ,

¹⁵a ɓaŋ: «Hirwuy ɗu n'ani a mbuŋ ɗike, ka cifi ar li mucuruw hiri le gar.»

¹⁶A ɓa Sara tuwa ya: «Pura, y'ani vula suloy gabal da sukum ɗike. I gwat masa biga da mizli kum mubummoˀhoy, ɓi hana a cuw ka ta.»

¹⁷Abraham a tumbulo Buymisemuŋ a mbulo Abimelek ati ngwas naŋ waɗ beke naŋ mongosohoyo, a yam a muŋ.

¹⁸Asi mike na, ngwas ngi hay Abimelekey gar na, Buymisemuŋ a cica taŋ le zleˀe, a yam ma ta, asi Sara ngwas ngi Abrahama.