Read South Giziga GEN 21 Bible Online

GEN 21 - South Giziga bible

GEN 21

¹Bumbulvuŋ a jina Sara, kaɓa naŋ miɓaŋ di zleˀe tuwa.

²Sara a gi hur, a ya mangal mizile da Abrahama, kasl ar hin naŋ mislaŋ di tuwa, naɓa Abraham i midigila si.

³Abraham a ca slimiɗ da mangal Sara miyaŋ di tuwa Izak.

⁴Izak mindila hin dangafaɗ na, Abraham a caŋ a mizaw kaɓa Buymisemuŋ miɓaŋ di ɗaˀ zleˀe tuwa.

⁵Taŋ miyaka Izak na, naɓa Abrahama naŋ ti vi skata.

⁶Dar Sara a ɓi: «Buymisemuŋ a giy gwat le ɓa i singir murmur. Mizli gar masa cinaka i yi mangal le ar madangwas ɗu na, a sa singiram murmur ati ya.»

⁷Joˀ a ɓi ma: «Ko mbur ɓa a ɓi gu da Abrahama, Sara a sa vul ɗuwa da mangal na anta. Dambalaka, ani ko ti Abraham migi gal na kwana, a yaŋ mangal mizile le!»

⁸Mangal a gil, a pula ɗuwa. Tapas nah na, Abraham a gi muguzlum madiɗaŋ.

⁹Ngi pas mekelem ada na, Ismayel mangal ngi Agar, zuŋ Ezipte miya da Abrahama, Sara a pura ar li gi dungur,

¹⁰a ɓa Abrahama: «Ɓula ngwas beke hana ati mangal naŋ avra. Y'anta wuɗ mangal ngi ngwas beke hana, a zumaka hay ati mangal ɗu Izaka ta.»

¹¹Mingiɓi hana, a ja mevel haɗi teˀ da Abrahama, asi Ismayel kwana, i mangal naŋ ya.

¹²Amma Buymisemuŋ a ɓaŋ: «Anja ki ji mevel vur ɓi ngi mangal ati ngwas beke ɗik na ta. Ɓi Sara maɓuw di gar na, tiɓaŋ, asi a sa zilam dideˀ ɗikey na, tisi Izaka.

¹³Amma mangal ngi ngwas beke na kwana, i sa ɗuf di sukwi taˀa, asi i mangal ɗiki.»

¹⁴Abraham a slikiɗ cẽẽt, a hil ɗaf waɗ yam zlor zlor ar kwenekwene, a vula taŋ da Agara, a lupaŋ mangala lup nga duba, a ɓulaŋ. Agar a ru, ara liˀi kiŋkiŋ a wuzlaɓuh mikirɗak kirɗak ngi Berseba.

¹⁵Ti yam mitiki ar kwenekwene na, a pula mangala fuk asi virzi ngi kalaf,

¹⁶ara cifi zar ava, a gi luvut fuk gu. A ɓi zleˀe ti kwacay naŋ na: «Anja i pura mangal ɗu ma muco ta!» A cifi zar, a zla tuwuy kaɗam kaɗam.

¹⁷Buymisemuŋ a cine widi ngi mangala le, joˀ modro ngi Buymisemuŋ a zilo Agara baɗ ti muŋ. A ɓaŋ: «I mi mulumuw ka Agar? Ki zluwun ta, asi Buymisemuŋ a cine mangal mawidi a diga na le.

¹⁸Slikiɗi, slikiɗa mangala, jaŋ kaw avu haŋ, asi i sa ɗuf di sukwi madiɗa taˀa.»

¹⁹Buymisemuŋ a wunaŋ hiri kweleŋ, keɗ na vigiɗ misi yam angaŋ. Aru, a noho kwenekwene mbaf, dar a vula mangal naŋ, a si.

²⁰Buymisemuŋ naŋ da ati mangala, a gil, a cifi a wuzlaɓuh mikirɗak kirɗak, a tiri gaw.

²¹A cifi a wuzlaɓuh ngi Paraŋ, mumuŋ naŋ a zuɓaŋ ngwasa i zuŋ Ezipte.

²²Hirak ti nah na, Abimelek a soko ati Pikol buy ngi soje naŋhay, a ɓaka Abrahama na: «Angi gwat ka maga gar na, Buymisemuŋ naŋ da ati ka.

²³Hudum ti Buymisemuŋ a mbuŋ ɗu aka wurenna, ka k'anta sa puliy ta, ko ziri ɗuwoy malla ko dideˀ ɗuwoy. Giy mezle da ya, waɗ da hirwuy hana ka micifi anga na, kaɓa ya muguw di na ya.»

²⁴Abraham a ɓaŋ: «I hudum le.»

²⁵Abraham a tuwa ɓi ngi vigiɗ ngi yam avu Abimelek, gawla ngi Abimelekey mitiɓaka ava.

²⁶Abimelek a mbiɗaŋ di: «Yi si na mbur miga gwat hana vuna ta, ka ki ɓiy di ta, yo ya kwana, i cine ɓi naŋ ɗaˀ ta, sey dana hana.»

²⁷Abraham a ngic tumuŋhoy, ˀaway waɗ slahay, a vula taŋ da Abimeleke, dar a jumomˀay cuw taŋ.

²⁸Abraham a hil jagara tumuŋhoy tarnaˀ ar gezleŋ, a pa taŋ sek pal.

²⁹Abimelek a cufuɗaŋ: «Ki ngica jagara tumuŋ hanayna ngac pal vur mike?»

³⁰Abraham a mbiɗaŋ di: «Jagara tumuŋ mitarnaˀ hanayna, tiɓa taŋ, ɓa ngi gi sedewo, i ya mila vigiɗ ngi yam hana.»

³¹Vurˀe, a zilaka li misenna Berseba. Asi taŋ cuw taŋ a hudumom le a diga.

³²A jumomˀay a Berseba. A dirba nah, Abimelek a zuɓam jiviɗ ati Pikol buy ngi soje naŋhaya, akẽh, a mam nga hirwuy Filisti.

³³Abraham a hirvi mbulam a Berseba, dar a tumbulo Buymisemuŋ ngi sete a diga, a zilaŋ Bumbulvuŋ.

³⁴Abraham a cifi, a zik haɗi angi hirwuy Filistiheye.