Read South Giziga GEN 23 Bible Online

GEN 23 - South Giziga bible

GEN 23

¹Sara a gi vi skat ti kukur cuw nga tarnaˀa,

²Sara a muc a Kiriyat-Arba, a mbiɗeˀvra Hebroŋ, ar hirwuy Kanaˀan. Abraham a so dika ngwas naŋ Sara.

³A tuwaŋ, a dirba nah, aru kileŋ avu vagay ngi ngwas naŋ, ng'avi dideˀ ngi Hetey, a ɓa taŋ:

⁴«Ani ya a wuzla kumo, yi mulak, yi moholoy. Vulikiy li ngi dika vu, i hiɗikaŋ, a ndir wãˀ da ya, ɓa i dika ngwas ɗu angaŋ.»

⁵Dideˀ ngi Hetey a mbiɗaka da Abrahama na:

⁶«Buy ɗu, cine ndra di ɗi: Buymisemuŋ a gi ti ka le, kaɓa buy a wuzla ndra, dika vagay ngi ngwas ɗike ar vigiɗ mezleŋ ngi wuzla vigiɗ ndraˀahaya. Mbur masa ngum ti vigiɗ naŋ ta, ngi dika ngwas ɗike na, anta asi ndra ta.»

⁷Abraham a slikiɗ, a huruk huruk a mbuŋ dideˀ ngi Hetey misi angi hirwuy nah.

⁸A ɓa taŋ: «Da ki ngumam le gisiŋ ɓa yi dika vagay ngi ngwas ɗu akaka na, ambuh, inga a ram ar deɗe ɗu, ara tumbuloko Efroŋ, mangal ngi Soˀara takwa!

⁹Ɓa a vuliy butum nga naŋ misi a Makpela, a mivay ngi guva naŋ na, i hiɗika ti cikili naŋ kaslsla a mihiri kumo, ɓa a ndir da ya wãˀ, ngi dika vu a wuzla kumo.»

¹⁰Naɓa Efroŋ vuna naŋ da a wuzla dideˀ ngi Heteye, Efroŋ mbur Hiti a mbiɗa da Abrahama a mihiri ngi dideˀ ngi Heteye, ɓa mizli masoko nga mizlingre ngi walahay gar a cinam. Joˀ a ɓi:

¹¹«Buy ɗu, kanah ta, ciniy di ɗi: yi vuluw guva ati butum ngi raˀa vuna si. Yi vuluw di ngataraŋ a mbuŋ muy ɗuwoy gar, dika ngwas ɗike angaŋ.»

¹²Abraham a huruk huruk a mbuŋ mizli ngi hirwuy nah vuna ma,

¹³a ɓa Efroŋ a mbuŋ mizli ngi hirwuy nah gar: «Ciniy di ɗi! i sa vuluw dala ngi guva! Tuɓaŋ, ɓa i sa dika ngwas ɗu angaŋ.»

¹⁴Efroŋ a mbiɗa da Abrahama:

¹⁵«Buy ɗu, inga ciniy di ɗi: li ngi suloy skat mufaɗ na, a gi mi geˀ ar wala ndra mizli madiɗahaya ka? Dika ngwas ɗike.»

¹⁶Abraham a tiɓa mi Efroŋ miɓa na le, a slufaŋ suloyo kaslsla kaɓa naŋ miɓa mur ziri ngi Hetey micinaka na, suloy skat mufaɗ, kaɓa cikili ngir luuma.

¹⁷Zle ti nah na, guva ngi Efroŋ misi a Makpela tisi pas ngi miprik ngi Mamre, guva ati butumo jom, waɗ widisey cek misi a hur guva, maakwaya rek rek, a ndiram

¹⁸da Abraham wãˀ, a mihiri ngi dideˀ ngi Hetey, a mihiri ngi mizli gar masoko nga mizlingreŋ ngi walahaya.

¹⁹A dirba nah so na, Abraham a dika ngwas naŋ Sara, angi butum misi ar guva a Makpela tuwa, gweˀ avu Mamre, a mbiɗeˀvra Hebroŋ angi hirwuy Kanaˀan.

²⁰Guva waɗ butum ngi raˀa gar na, dideˀ ngi Hetey, a vulaka, a ndir wãˀ da Abraham ngi dika vu.