Read South Giziga GEN 24 Bible Online

GEN 24 - South Giziga bible

GEN 24

¹Abraham a gi gal le kucup wãˀ, vi naŋ haɗi. Bumbulvuŋ a ɗuwulaŋ mi le ar gwat naŋ maga gar.

²Ngi pas mekeleme ada na, Abraham a ɓa mbur mizik le haɗi ngi si gawla naŋhay, majigina zlili naŋ gar: «Ca haŋ ɗik asi tuwal ɗu, [2].

³yo hudum a mbuŋ ɗu ti slimiɗ ngi Bumbulvuŋ Buymisemuŋ miga muŋ ati hirwuyo, ɓi: ziri diili ngi Kanaˀanay, ya micifi a wuzla taŋ na, k'anta sa zuɓ ngwas da mangal ɗu a wuzla taŋ ta.

⁴Amma kisa ru nga hirwuy ɗu, a wuzla muy ɗuwoy, ki ra zuɓa ngwas da mangal ɗu Izak a diga.»

⁵Gawla naŋ a mbiɗaŋ di: «Asinta, da ngwas vuna, anta sa ngum ngi supo ya nga hirwuy hana ta na, zuwen ɓa i sa ru ti mangal ɗik vuna a haŋ nga hirwuy, ka mubo ti raˀa vuna kwa mbrike?»

⁶Abraham a ɓaŋ: «Ĩˀĩ, ji lesl, ki miy ti mangala nga diga ta.

⁷Bumbulvuŋ, Buymisemuŋ a zuɓo ya baɗ a hay baha, baɗ angi hirwuy ngi muy ɗuwoyo, a ɓiy le, yo a hudum le, a ɓi: I sa vula hirwuy hana da dideˀ ɗikey, yo i naŋ masa slina modro naŋ a mbuŋ ɗike, kisa zuɓo ngwas da mangal ɗu a diga.

⁸Da ngwasa a ngum ngi supo ka ta na, naɓa hudum ɗik a juw ta. Amma ki miy ti mangala nga diga ta.»

⁹Akẽh na, gawla naŋ tuwa, a ca haŋ asi tuwal ngi buy naŋ Abrahama, dar a hudum ɓa a sa ga gwat naŋ miɓaŋ di na.

¹⁰Gawla naŋ tuwa, a hil zlogomohoy kuruˀ a wuzla zlogomo ngi buy naŋhaya, gwat mezle mezle ngi buy naŋhaya gar aru taŋ a haŋ. A zuɓ jiviɗ kini ngir ti ruwuy Nahor ng'ar vay ngi muŋ ngi Mezopotami.

¹¹Ngi pastaˀ, hirak ti pas ngwasay maboko nga nuwa yam na, a hina zlogomohoyo tup tup gweˀ a mi vigiɗ ngi yam misi a duba gala.

¹²A dir dibiɗ, a ɓi: «Aw Bumbulvuŋ, Buymisemuŋ ngi buy ɗu Abraham, ga ɓa yi ji hirnga ti gwat maciriy hiri, yo ga mezle ɗik da buy ɗu Abrahama.

¹³Y'ani deŋ a mi vigiɗ ngi yam ani, ziri diili ngi mizli ngir walahaya, ara boko nga nuwa yam.

¹⁴Na so na! Zuŋ diili ya masa ɓaŋ: ‹Inga hinjika kukulum ɗike, ɓa i si yam› takwa, yo da naŋ a ɓiy le: ‹Si, ɓa i sa vula zlogomo ɗikey, a sama ya› na, naɓa i sa sina, ka miwi di vu da gawla ɗik Izak na, i naŋ, kahana, i sa si na ki ga mezle le da buy ɗu Abrahama.›»

¹⁵A tika mingiɓi naŋ t'aruŋ sina, Rebeka zuŋ ngi Betuwel, ara ndilawa ti kukulum naŋ taˀ a gagalaˀay. Betuwel vuna i mangal ngi Milka, ngwas ngi Nahor, sukum ngi Abraham.

¹⁶Zuŋ diili tuwa, hiri a ɗuv ava ta, i zuŋ mungbuˀo kine, a sin zil ɗaˀ t'aruŋ. A pi sar nga mi yama, a naha kukulumo, joˀ a jiɗawa a muŋ.

¹⁷Gawla ngi Abraham tuwa, a kil, ara ji di hirngaŋ, a ɓaŋ: «Ambuh, vuliy yam ngir kukulum ɗik na, ɓa i si neˀ ta kwa!»

¹⁸A mbiɗaŋ di: «Si buy ɗu», a po sar ti kukulum tuwa kutum paˀ a haŋ, ɓa a si.

¹⁹Naŋ muvulaŋ yam a kiɗ mi le muduba na, zuŋ a ɓaŋ: «Yi ra nuwo di da zlogomo ɗikeye, ɓa a sam, a mbam aya.»

²⁰A wus vu, a pa yam ngir kukulum tuwa ng'ar suwã, a kil nga nuwo mekelem ar vigiɗe ma, a vula da zlogomohoyo gar.

²¹Mbur tuwa, ara pura zlerre ti mi teˀ teˀe, ɓa a si na da Bumbulvuŋ a kiɗaŋ may ngi mulak naŋ na le kwa, malla da a kiɗaŋ di ta kwana.

²²Zlogomohoy a sam yama, a kiɗ mi le muduba so. Mbur tuwa, a zuɓa dangwa mududok, mimezleŋ waɗ ɓalaŋ nga haŋhay cuw mimezlehey, mududok dudokoy, i muvuɗa taŋ cek ti ɓiri tapasl tapasl.

²³Joˀ a ɓaŋ: «Ki zuŋ ngi waka? Ambuh, inga ɓiy di takwa. Zliv li ada a hay bunuko, i hinam ati mizli ngisi yahaya kwa?»

²⁴Zuŋ a mbiɗaŋ di: «Yi zuŋ ngi Betuwel, mangal ngi Milka miya ti zil naŋ Nahor.»

²⁵A ɓaŋ ma: «Murbuc ati kalaf ada haɗa a hay ndra, yo li ngi hin kwana ada ma.»

²⁶Mbur tuwa, a huruk huruk a mbuŋ Bumbulvuŋ,

²⁷a ɓi: «Sise Bumbulvuŋ Buymisemuŋ ngi buy ɗu Abraham, ki biga gi mezle ɗik minjah naŋ le wãˀ da buy ɗu. Ar mulak ya muzuɓo di hana na, Bumbulvuŋ a so ti ya le deŋŋe kasl a hay muy ngi buy ɗuwoyo.»

²⁸Akẽh na, zuŋ diili tuwa, a kil, ara ɓa ɓi ngi gwat migi hana a hay mumuŋ.

²⁹Sukum ngi Rebeka ada, i mizile, a zilaka Labaŋ. Labaŋ a bi, a kil ng'avu mbur tuwa, a mi yama.

³⁰Naŋ mupura dangwa ati ɓalaŋhay a hirbazla sukumuŋ, yo naɓa a cine Rebeka a slufaŋ ɓi ngi gwat mucuh na le gar si, aru ng'avu mbur mideŋ ti zlogomo naŋhaya gweˀ a mi yam tuwa.

³¹Labaŋ a ɓaŋ: «Sawa, ka mbur Bumbulvuŋ muɗuwuluw mi le. Ki cici deŋ avra vur mike? Yi ɗiya li hine le a viŋ waɗ li da zlogomohoyo.»

³²Dar gawla ngi Abraham tuwa, a ci ngi hay Labaŋ so. A pam sar ti gwat ngi duba zlogomohoyo, a vulaka taŋ murbuc ati Kalafay. A soko ti yam da gawla ngi Abraham ati mizli naŋhaya, ɓa a bunaka saraya.

³³Asakaŋ ti gwat ngi zum, amma naŋ a ɓi: «y'anta zum gwat t'aruŋ, sey da ya miɓa ɓi ɗu le.» Labaŋ a ɓaŋ: «Ka ɓaŋ.»

³⁴A ɓi ma: «Yi gawla ngi Abraham.

³⁵Bumbulvuŋ a ɗuwula mi le haɗi da buy ɗu Abrahama, hã a tiri zloh. A vulaŋ tumuŋhoy, ˀaway waɗ slahay, dala waɗ ɓiri tapasl tapasl, beke mizile ati mongosohoy, zlogomohoy waɗ zunguhoy.

³⁶Ngwas naŋ Sara, ko ti gal naŋ tekeɗe kwana, a yaŋ mangal mizile le. Buy ɗu Abraham, a vulaŋ zlili naŋhaya le gar,

³⁷yo a hudumiy le, a ɓiy: «Ki ra zuɓiy ngwas da mangal ɗu a wuzla diili Kanaˀanay, ya macifi a hay taŋ na ta. A ɓiy:

³⁸Hudum, ɓa ki ra zuɓiy ngwas da mangal ɗu a hay baha, a wuzla muy ɗuwoy.

³⁹Yi ɓa buy ɗu so na: «Asinta, ngwas vuna, anta sa ngum ngi supo ya ta kwani?»

⁴⁰A mbiɗiy di: «Bumbulvuŋ, ya misi ndrehhe a mbuŋ naŋ na, a sa slina modro naŋ asi ka, yo masa ga ɓa zuɓa mulak ɗik a kiɗuw may na i nah: kisa zuɓiy ngwas da mangal ɗu, a wuzla muy ɗuwoy, a hay baha.

⁴¹Da ka misa ndil le a wuzla muy ɗuwoyo, ko da a vulukuw ngwasa ta tekeɗe kwana, naɓa hudum ɗik a juw mata.»

⁴²Ya mindilo ngadana a mi vigiɗ ngi yam na, yi dir dibiɗ, i ɓi: «Bumbulvuŋ Buymisemuŋ ngi buy ɗu Abraham, da ki ngum le gisiŋ, ɓa ki kiɗiy may ngi mulak ɗu, ya muzuɓo di hana na,

⁴³y'ani gweˀ ami vigiɗ ngi yam aka, yawwa! Zuŋ diili masa bo nga nuwa yama, yo da ya miɓaŋ le: «Inga vuliy yam ngir kukulum ɗik na, ɓa i si neˀ takwa» na,

⁴⁴da naŋ mimbiɗiy di le: «Ka vuna si, yo i sa nuwo di da zlogomo ɗ ikeye ma na, naɓa i ngwas Bumbulvuŋ miwi di vu da mangal ngi buy ɗu.»

⁴⁵Ti ya mi tika mingiɓi a kwacay ɗu t'aruŋ sina, Rebeka a ra ndilawa, taˀ ti kukulum a gagalaˀay, a pi sar nga nuwa yam ar vigiɗe. Yi ɓaŋ: «Ambuh takwa, vuliy yam ngi si.»

⁴⁶A hinjiko kukulum tuwa kutum, a ɓi: «Si, i sa vula zlogomo ɗikey a sama ya.» Yi si, dar a vula zlogomo ɗuwoyo, a sam.

⁴⁷Yi cufuɗaŋ: «Ki zuŋ ngi waka?» A mbiɗiy di: «Yi zuŋ ngi Betuwel, mangal ngi Milka miya ti zil naŋ Nahor. Yi caŋ gwat ngi hutuŋ so, waɗ ɓalaŋ avu haŋhaya.

⁴⁸Yi huruk huruk ti miliwis, i guɓ durus a mbuŋ, Bumbulvuŋ Buymisemuŋ ngi buy ɗu Abrahama, yi gaŋ sise, asi naŋ mijigino ya kuy kuy a jiviɗe, ɓa yi so zuɓa zuŋ ngi jamba ngi buy ɗu da mangal naŋ.

⁴⁹Wurenna so na, da ki wuɗam gi mezle le, yo kum teŋteŋ avu buy ɗu na, ɓikiy di. Da kanah ta kwana, ɓikiy di, ɓa yi zuɓ jiviɗ ɗu ng'ar li mekelem.»

⁵⁰Labaŋ ati Betuwel a mbiɗakaŋ di: «Ɓi hana a so ti vu Bumbulvuŋ, ndr'anta ti ɓi mezle malla malambaˀ ngi ɓuw di ta.

⁵¹Rebeka n'ani a mbuŋ ɗike, zuɓaŋ, aru di. Anja a tiri ngwas ngi mangal ngi buy ɗike, kaɓa Bumbulvuŋ miɓa na.»

⁵²Gawla ngi Abraham micina mingiɓi hana na, a huruk huruk a mbuŋ Bumbulvuŋ.

⁵³Dar a bo ti gwat muvuɗa ti ɓiri gazahay ati ngi ɓiri tapasl tapasl waɗ zanahay, a vula taŋ da Rebeka. A vula gwat mupuɗaw puɗaway da sukum ngi zuŋ ati mumuŋ ma.

⁵⁴Akẽh na, gawla ngi Abraham ati mizli ngi seˀeheye, a zumam, a sam, a hinam tup. Ngi miprik naŋ, taŋ mislikiɗam na, a ɓi: «Pulikiy jiviɗ ɓa i mi le ng'avu buy ɗu muduba.»

⁵⁵Sukum mizile ngi Rebeka ati mumuŋ naŋ a ɓam: «Anja zuŋ a zik neˀ ati ndra kwaɗay, gwat ngi hin kuruˀ purla, a dirba nah, a sa ru.»

⁵⁶Mbur tuwa, a mbiɗa taŋ di: «Ki murikiy mata. Bumbulvuŋ a kiɗiy may ngi mulak ɗu ya muzuɓo de le. Pulikiy jiviɗ ngi mi le ngi hay buy ɗu muduba.»

⁵⁷Taŋ a ɓakaŋ: «Zulukum zuŋ diili vuna, cufuɗukum di, da a ɓi mbrike na.»

⁵⁸A ziloko Rebeka, a cufuɗakaŋ: «Ki wuɗ ru le asi mbur hana kwa?» A mbiɗa taŋ di: «Haˀaw, i ru.»

⁵⁹Akẽh na, a pulaka Rebeka waɗ ngwas migil naŋ, a ram ati gawla ngi Abraham waɗ mizli ngi seˀeheye.

⁶⁰A ɗuwulaka mi da Rebeka, a ɓakaŋ: «Ka sukum ndra, sey ki tiri mumuŋ ngi mizli durmuk mbeˀmbeˀ. Anja dideˀ ɗikey a tiɓaka walahay avu mesene taŋhaya!»

⁶¹Dar Rebeka a slikiɗam ati beke naŋhaya. A ra jiɗam a duba zlogomohoy, a sipaka mbur tuwa. Gawla ngi Abraham, a zuɓa Rebeka, a cuh di.

⁶²Ngi pas madiɗ na, Izak ara mo ti mi vigiɗ ngi yam mazilaka Lahay-Roy. Naɓa naŋ kini tir vay Negev,

⁶³yo gweˀ ng'avi hiikuɗ na, a bi ti liˀi nga duba gala. A zuɓa hiri, keɗ na, zlogomohoy ara ndiloko.

⁶⁴Rebeka kwana, a zuɓa hiri, keɗ na, Izak, a hilo sar ti duba zlogomo,

⁶⁵a ɓa gawla ngi Abraham tuwa: «Mbur masawa nga ji ti ndra hirnga a duba gala na, i waka?» A mbiɗaŋ di: «I buy ɗu.» Rebeka a zuɓa lafaye naŋ, a sirta hiri sirit.

⁶⁶Gawla ngi Abraham tuwa, gwat naŋ miga gar na, a slufa da Izaka.

⁶⁷A dirba nah, Izak a ci ti rebeka ng'ar guɗuk naŋ, i guɗuk ngi mumuŋ naŋ Sara zleˀe. A zuɓa Rebeka, a tiri di ngwas naŋ. A wuɗaŋ, joˀ mevele a tisl ar ɓi ngi mumuŋ naŋ mumuc na.