Read South Giziga GEN 25 Bible Online

GEN 25 - South Giziga bible

GEN 25

¹Abraham a zuɓ ngwas mekelem, a zilaka Ketura.

²Ketura a yaŋ Zimran, Yokzan, Medan, Madiyan, Iselak waɗ Suwa.

³Yokzaŋ a yi Saba ati Dedaŋ. Ziri mizile ngi Dedaŋhay i Asurihey, Letusihey ati Leyomihey.

⁴Ziri mizile ngi Madiyanay i ti Efa, Efer, Hanok, Abida waɗ Elda. Hanayna i dideˀ ngi Keturahay cek.

⁵Abraham a pula zlili naŋ gar da Izak.

⁶Amma da ziri ngi mangasl naŋhay na, a vula taŋ zlili ti vul si. Ti naŋ mumuc t'aruŋ si na, a ɓula taŋ kileŋ avu mangal naŋ Izaka, kini ngir tisi pas ngi mipriki.

⁷Abrahama a gi vi skat ti kukur tarnaˀ nga zlum.

⁸Hutuŋ naŋ a tiki, a muc i midigila muzuy zuy, a gi gal le haɗi fineˀ gidaŋ. Joˀ a jum ng'avi dideˀ naŋ mumucahay.

⁹Ziri naŋhay, ti Izak ati Ismayel a dikaka angi butum ngi Makpela, misi ar guva ngi Efroŋ, mangal ngi Soˀar mbur Hiti, gweˀ a mbuŋ Mamre,

¹⁰angi guva Abraham mihiɗika zleˀe avu dideˀ ngi Hetey. A dikaka Abraham ati ngwas naŋ Sara a diga.

¹¹A dirba Abraham mumuco, Buymisemuŋ a ɗuwula mi le da Izaka. Izak a pa haya gweˀ a vi vigiɗ ngi yam ngi Lahay-Roy.

¹²Ismayel, mangal ngi Abrahama, ɓi ngi dideˀ naŋhay ani. Agar, zuŋ Ezipte miyaŋ di. Agar i beke ngi Sara.

¹³Slimiɗ ngi dideˀ ngi Ismayeley ani, vur mijingaˀ vur mijingaˀ: Nebayot i modogom ngi Ismayel, Kedar, Atbeyel, Mibisam,

¹⁴Misema, Duma, Masa,

¹⁵Hadat, Tema, Yetur, Nafik waɗ Keɗma.

¹⁶Dideˀ ngi Ismayeley mukuruˀ nga cuwo i taŋ, mbur gar i buy ngi sukwi taˀ ngi sukwi taˀ, a zilaka walahay taŋhay ati guɗukoy taŋ mipaka, ti slimiɗ taŋ tayna tehhe a muŋ.

¹⁷Ismayel a gi vi skat ti kukur makir nga tarnaˀ, hutuŋ naŋ a tiki, dar a jum ng'avi dideˀ naŋ mumucahay.

¹⁸Dideˀ ngi Ismayeley a cifam ar wala ngi ruwuy Havila ati Sur, Suro naŋ gweˀ avu Ezipte, angi jiviɗ nga Asur. Angi joˀ taŋ na, a wuɗam kiɗa vu ar wala taŋ sukumuŋhoy.

¹⁹Izak, mangal ngi Abraham, a dirba Abraham miya na, ɓi ngi dideˀ naŋhay ani,

²⁰Izak a gi vi kukur mufaɗa, a zuɓ ngwasa, i Rebeka zuŋ ngi Betuwel, mbur A ram, vay muŋ ngi Mezopotami. I sukum ngi Labaŋ.

²¹Rebeka i dirlay, Izak a tumbulo Bumbulvuŋ vurˀe. Bumbulvuŋ a puraŋ ircece le, ngwas naŋ Rebeka a gi hur.

²²Dambalaka ziri ara dumbuslam vu a kwacay naŋ vuna, dar a ɓi ti gidaŋ: «Mindilo avu ya i gwat mike?» Aru nga cufuɗa Bumbulvuŋ.

²³Bumbulvuŋ a mbiɗaŋ di: «I sukwi cuw misi a kwacay ɗike, i sukwi ngi mizli wal wal cuw masa boko tivi ka. Mekeleme a sa funa numuŋ ti gidaŋ, madiɗaŋ a sa gi gawla ngi meciɗeke.»

²⁴Hin naŋ mindila ɓa a yi muduba na, i ziri misahay misi a kwacaya.

²⁵Mubo dumbuŋ, naŋ gagaza, vu naŋ gar i ngwic ka garak ngi ginew, a zilaka Esaw.

²⁶A dirba nah, sukum naŋ a bawa, haŋ naŋ kpak kpak a vi mododok sar ngi Esaw, a zilaka Zakop. Ti taŋ miyaka taŋ na, naɓa Izaka naŋ ti vi kukur merkeɗe.

²⁷Ziri mizilehey tuwa, a gilam. Esaw a tiri gaw mawi haŋ kuy kuy wãˀ, i mbur mawuɗ ɓuh. Amma Zakopo, i mangal misi lesl, a ndir kulaˀ a hay.

²⁸Izak a hĩyã Esawa le, asi a wuɗ useˀ ngi gwat ngi ɓuh haɗa. Rebeka a hiyĩ nga naŋ i Zakop.

²⁹Ngi pas numuŋ ada na, Zakop ara di lar munguɗusla, gagaza. Esaw a so ti ɓuh, a gir le kupuyah,

³⁰a ɓa Zakopo na: «Puliy i sliɓi lar munguɗusla ɗik gagaza na neˀ takwa, asi i gir le kupuyah wãˀ.» Taŋ mizilaka Edom na vurˀe, a mbiɗeˀvra gagaza.

³¹Zakop a mbiɗaŋ di: «Puliy dana i hiɗika gi modogom ɗik na, ɓa i tiri modogom.»

³²Esaw a ɓi: «Ani i wuɗ i mucu, gi modogom vuna, a puliy gir ngi mike?»

³³Zakop a ɓaŋ: «Hudum wurenna a mbuŋ ɗu.» Esaw a hudum, a hiɗika gi modogom naŋ le da Zakopo.

³⁴Dar a vula ɗaf waɗ lar munguɗusla gagaza tuwa da Esawa. Esaw a zum, a si, a slikiɗ, a cuh. Esaw a pura gi modogomo hiris le.