Read South Giziga GEN 28 Bible Online

GEN 28 - South Giziga bible

GEN 28

¹Izak a zila Zakopo, a ɗuwulaŋ mi, a ɓaŋ: «Anja ki zuɓ ngwasa i zuŋ Kanaˀan ta.

²Amma slikiɗi, aru nga ruwuy vay muŋ ngi Mezopotami, a hay Betuwel, cine ngi munuku. Ki sa zuɓ ngwas a diga, a wuzla ziri ngi gumseˀ ɗik Labaŋ.

³Anja Buymisemuŋ misi gidaŋ wãˀa, a ɗuwuluw mi, a vuluw ziri haɗi, dideˀ ɗikey a sa jam haɗi, ɓa ki ɗuv walahayay taˀ taˀ mbeˀ mbeˀ.

⁴Anja a ɗuwuluw mi, da ka ati dideˀ ɗikeye, kaɓa naŋ miga da Abraham na ya, ɓa hirwuy mulak ka misi anga hana, a ndir da ka, i hirwuy Buymisemuŋ muvula da Abraham.»

⁵Izak a ɓa Zakopo ɓa aru nga Mezopotami vay muŋ ngi hay Labaŋ mangal ngi Betuwel, mbur A ram, sukum ngi Rebeka, mumuŋ ngi Zakop ati Esaw.

⁶Esaw a cine na, Izak a ɗuwula mi le da Zakopo, yo a slina le ɓa ara zuɓ ngwas a ruwuy Mezopotami vay ngi muŋ, yo ti naŋ maɗuwulaŋ mi na, a ɓaŋ na: «Ki zuɓ ngwas a wuzla ziri ngi Kanaˀanaya ta.»

⁷Zakop a cine mi da cine ati mumuŋ, aru nga ruwuy Mezopotami so.

⁸Izak anta hĩyã diili Kanaˀanay na ta na, Esaw a sla wala nah le muduba.

⁹A wuluk ɓa a zuɓ ngwas mekelem, a ru, ara luuma Ismayel mangal ngi Abrahama, a zuɓa zuŋ naŋ mazilaka Mahalat, sukum ngi Nebayot na.

¹⁰Akẽh na, Zakop a slikiɗ baɗ a Berseba, aru nga Haraŋ

¹¹Pas a diɗ di gurjik ar li numuŋ ada, a zuɓ ɗugur ngi kẽh pal, a tih di hirngaŋ, a hin wãˀ akẽh.

¹²Musuwun a gaŋ: A pura na, li ɗuva sar gaˀ gaˀ, zle a ruwuy hã sesẽŋ a muŋ, modro ngi Buymisemuŋhoy ara jiɗam, ara poko sar ti nga.

¹³A pura Bumbulvuŋ deŋ a cikeˀe, a ɓaŋ: «I ya Bumbulvuŋ Buymisemuŋ ngi dunuk Abraham, waɗ ngi Izak. Hirwuy ka mutup anga hana, i sa vuluw di da ka ati dideˀ ɗikey.

¹⁴Dideˀ ɗikey a sa tiram haɗi kaɓa murɓuk a ruwuy. Ki sa ndahaka hirwuyo ng'asi pas ngi pastaˀ, ng'asi pas ngi miprik, ngir ti vay muŋ waɗ ngir ti vay ruwuy. I sa ɗuwula mi da sukwi ngi mizli ngisi ruwuyoy gar tisi ka ati dideˀ ɗikeye.

¹⁵Pura ɗi! Y'ada ati ka, i sa jiginuw ar li ka masa ru ara gar, i sa mo ti ka nga ruwuy hana, vur y'anta sa puluw fuk ta, hã ɓi ya muɓuw di na, i ga gbaˀ.»

¹⁶Zakop mupuɗuk na, a ɓi: «Oy! Bumbulvuŋ naŋ da aka gisiŋ, amma i si na zleˀe ta!»

¹⁷A zluwun, a ɓi: «Kay! Li hana, i li ngi zluwuna vu, ingatara ta, i hay ngi Buymisemuŋ gisiŋ, yo i mizlingre ngi muŋ.»

¹⁸Zakop a slikiɗ ngi miprik prik, a zuɓa ɗugur naŋ mitih di hirnga tuwa, a nga kaˀ, a paŋ mal, ɓa a ndiri ɗugur mipal.

¹⁹A zila li nah Betel, a mbiɗeˀvra hay ngi Buymisemuŋ. Amma zleˀe na, a zilaka Luz.

²⁰Dar Zakop a hudum, a ɓi: «Da Buymisemuŋ naŋ da ati ya, da a jiginiy le ar mulak ɗu ya mazuɓa, da a vuliy gwat ngi zum le, waɗ zana ngi ki,

²¹yo da yi mo le zuy zuy ngi hay baha na, naɓa Bumbulvuŋ a sa tiri Buymisemuŋ ɗu.

²²Ɗugur ya minga kaˀ hana, a sa tiri hay ngi Buymisemuŋ, i sa vulaŋ mukuruˀ ngi gwat naŋ muvuliy di le gar.»