Read South Giziga GEN 3 Bible Online

GEN 3 - South Giziga bible

GEN 3

¹Naŋ kine, a wuzla gwat misi titiri ngi ɓuhoy, Bumbulvuŋ miga taŋ gar na, kawa, i misi wer fineˀ taŋ. A cufuɗa ngwasa: «Bumbulvuŋ Buymisemuŋ a ɓukum le gisiŋ: ‹Yi ngi widis gar misi ar guva na, ki zumaka ta, kini ta kwa?›»

²Ngwasa a mbiɗa da kawa: «I zumaka yi ngi widis ngir guvahaya zuy.

³Amma sey yi ngi widis ngi wuzla guva na, Bumbulvuŋ a ɓa ndra: ‹Ki zumaka ta, yo ki wusaka ta ma, vur kum mamicam.›»

⁴Kaw a ɓa ngwasa: «Kanah ta wãˀ, ko kum anta sa micam ta.

⁵Amma Buymisemuŋ a si na le, tapas kum misa zumaka le na, hiri kum a sa wun, joˀ kisa tiram kaɓa naŋ vuna ya, ki sinaka mezle ati malambaˀa.»

⁶Ngwas a pura yi ngi widis tuwa, naŋ mezle ngi zum, a gaŋ pura pura. A hĩyã le ɓa ngi luuma sin haɗa. A zuɓ yi ngi widis tuwa pal, a zumaŋ. Joˀ a vula zil misi a cikeˀe akẽh, a zuma ya.

⁷Akẽh si na, taŋ cuw taŋ hiri taŋhay a wunam, a puraka na, taŋ gulndiŋ gulndiŋ kine. A jam kalaf ngi uruf, a gam di zana ngi juw.

⁸Ngi pastaˀ, li zuyyo na, a cinaka ˀay ngi Bumbulvuŋ Buymisemuŋ maliˀi ar guva. Zil ati ngwas a ɗumom di a wuzla widis ngir guvahay tuwa.

⁹Bumbulvuŋ Buymisemuŋ a zila mbur zile, a ɓaŋ: «Ka amaka?»

¹⁰Zil a mbiɗaŋ di: «Ya micina ˀay ɗik ar guva na, i zluwun le, asi ya mugulndiŋ kine na, dar i ɗum.»

¹¹Bumbulvuŋ Buymisemuŋ a cufuɗaŋ: «Mubuguw di i wa, ka gulndiŋ kine ka? Aro na, ki zum yi ngi widis, ya mutukuw ngi zum naŋ na le kwani?»

¹²Zil a mbiɗaŋ di: «Ngwas ka mucufa a ciki ɗu tuwa, i naŋ muvuliy yi ngi widise, i zumaŋ.»

¹³Bumbulvuŋ Buymisemuŋ a ɓa ngwasa: «Ki gi di i gwat mi hana ka?» Ngwasa a mbiɗa: «I kaw migiy gilaw, dar yi zuma i ngi widise.»

¹⁴Bumbulvuŋ Buymisemuŋ a ɓa kawa: «Asi gwat ka miga hana na, i sa nisuw ka a wuzla ginewey ati gwat misi titiri ngi ɓuhoyo gar, kisa ru ti kwacay, kisa bugum murɓuk ar hin ngi ssifa ɗike.»

¹⁵I sa ga, ɓa ka ati ngwasa, ki gam mesene, ɓa dideˀ naŋhay ati dideˀ ɗikey a gam mesene. Naŋ a sa njirsluw hirnga, yo ka kwana, kisa humbuɗaŋ avu duɓuk sar.

¹⁶Buymisemuŋ a ɓa ngwasa ma: «I sa ga ɓa hur a guw bonoy haɗi. Ki sa ya ziri ɗikey ti bonoy. Ki sa hĩyã cifi ati zil ɗike, amma naŋ a sa wuw.»

¹⁷A ɓa Adamu na: «Ki tiɓi di i mi ngi ngwas ɗiki, dar ki zuma yi ngi widis, ya mitikuw ɓa ki zuma ta tuwa. Vurˀe, i nisa hirwuyo vur ka. Ar ar hin ngi siifa ɗik gar na, kisa luuma gwat ngi zumo ti bonoy.»

¹⁸Hirwuy a sa pus hadaw ati giziŋ malambaˀhay sirit. Ki sa zum laray mapusam lambaˀ.

¹⁹Ki sa luuma gwat ngi zumo ti liiriɓ ngi midibiɗ ɗiki, hã tapas ka masa mi nga ruwuyo a muŋ, hirwuy ka mubo ti vaˀa. Vur ki i murɓuk, joˀ kisa tiri murɓuk a muŋ.

²⁰Adamu mbur zil tuwa, a ca slimiɗ da ngwas naŋ Hawa, mbiɗeˀvra: ‹siifa›, asi naŋ i mumuŋ ngi mizli misi ti siifahay gar.

²¹Bumbulvuŋ Buymisemuŋ a ɗiya jibe ngi garak da Adamu ati ngwas naŋ, a ka taŋ di.

²²Dar Bumbulvuŋ Buymisemuŋ, a ɓi a kwacay naŋ: «Ani mbur a tiri le kaɓa mbur ngi wuzla ndra, a si na mezle ati malambaˀa le. Wurenna, anja i tikakaŋ, ɓa a tila haŋ, a ngila yi ngi widis ngi siifa na, a zuma, ɓa a ndir ti siifa hã ngi sete mata.»

²³Bumbulvuŋ Buymisemuŋ a ɓula mburo tir guva ngi Eden avra, ɓa ara huva hirwuy mindirakaŋ ti naŋ tuwaŋ.

²⁴A dirba naŋ muɓula mbur avra na, Buymisemuŋ a pi kerubeŋhey tisi pas ngi miprik ngi guva ngi Edene, ɓa ngi jigina jiviɗ maru ng'avi widis ngi siifa. Kerubeŋheye, taŋ ti maslalam misi vu plingiɗ plingiɗ ka wucuɗ ngi vuŋ.