Read South Giziga GEN 30 Bible Online

GEN 30 - South Giziga bible

GEN 30

¹Rasel a pura na, naŋ anta yi ta, a zla a gi suloŋ ti sukum naŋ Leya. A ɓa Zakopo: «Anja i yi ya, da ki ngum ta na, yi mucu.

²Zakop a ji mevel angi Rasele, a ɓaŋ: «Ki gi ti ya kaɓa yi Buymisemuŋ vuna sukwa? Mutukuw ɓa ki yi ta na i naŋ.»

³Rasel a ɓaŋ: «Beke ɗu Bila ani, aru ng'ava, ɓa a yiy ziri, i sa gila taŋ.»

⁴A vulaŋ beke naŋ Bila ngi ngwasa, joˀ Zakop a hin di.

⁵Bila a gi hur, a ya mangal mizile da Zakopo.

⁶Rasel a ɓi: «Buymisemuŋ a giy kiita ɗu le jeŋŋe! A tiɓa mi ɗu le ya, a vuliy yi mangal mizile.» Vurˀe, a zila Daŋ.

⁷Bila beke ngi Rasel tuwa, a gi hur ma, a ya mangal mucuw naŋ da Zakopo ma.

⁸Dar Rasel a ɓi: «Yi gi kiɗa vu mi neˀ ta wãˀ le ati sukum ɗu, yi paŋ hirnga le.» Joˀ a zila Neftali.

⁹Leya a pura na, a cica yi le, a zuɓa Zilpa, beke naŋ, a vula da Zakopo, a gi di ngwasa.

¹⁰Zilpa beke ngi Leya tuwa, a ya mangal mizile da Zakopo.

¹¹Leya a ɓi: «Jiŋ ɗu!» A zila Gat.

¹²Akẽh ma na, Zilpa a ya mangal mekelem da Zakopo ma.

¹³Leya a ɓi: «Yawwa, ya ar wuya! Vur ziri mongosohoy a ɓikiy le, ya ar wuya! Joˀ a zila Aser.»

¹⁴Ti hin ngi sifi ngi alkamari na, Ruben aru ng'ar guva, a lumo mandragor [3], a so di da mumuŋ naŋ Leya. Rasel a ɓa Leya na: «Inga vuliy ngi mandragor mangal ɗik muso di na neˀ ta kwa.»

¹⁵Leya a ɓaŋ: «Ka mitiɓa zil ɗu na, muk ti ka ta kwa? Ɓa hã ki tiɓa mandragor ngi mangal ɗu ma sukwa?» Rasel a mbiɗaŋ di: «Da kine na, anja Zakop ara hin ti ka duvuɗ dana, ar deɗe ngi mandragor ngi mangal ɗike.»

¹⁶Ngi pastaˀa, ti Zakop mamo tir guva na, Leya a bi, ara ji di hirnga, dar a ɓaŋ: «Ki sa hin a hay ɗu, asi i hiɗikuw le ti mandragor ngi mangal ɗu.» Joˀ Zakop a hin di ngi duvuɗ nah.

¹⁷Buymisemuŋ a tiɓa ɓi ngi Leya le, a gi hur, a yi mangal mizile muzlum naŋ da Zakopo.

¹⁸Akẽh na, Leya a ɓi: «Ya muvula beke ɗu da zil ɗu tuwa, Buymisemuŋ a vuliy migire le minjeˀe.» Dar a zila Isakar.

¹⁹Leya tuwa, a gi hur ma, a yi mangal mizile mimerkeɗ naŋ da Zakopo.

²⁰Leya a ɓi: «Buymisemuŋ a vuliy gwat mezle le ngataraŋ. Wurenna zil ɗu a sa ɗuviy hirnga muduba, asi i yaŋ ziri mizilehey le merkeɗe.» Dar a zila mangala Zabuloŋ.

²¹A dirba nah, a yi zuŋ mongosoŋ a zila Dina.

²²Akẽh na, Buymisemuŋ a wuluk angi Rasele, a pulaŋ jiviɗ ngi yi.

²³A gi hur, a yi mangal mizile, a ɓi: «Bumbulvuŋ a cukiy meseme le!»

²⁴Dar a zila Zozef, a wuɗ a ɓi: «Anja Bumbulvuŋ a vuliy mangal mekelem ava ma!»

²⁵Ti Rasel miya Zozef cak si na, Zakop a ɓa Labaŋ na: «Puliy jiviɗ i cuh le ngi hay ɗu, a hirwuy ɗu.

²⁶Vuliy ziri ɗuwoy ati ngwas ɗuwoy, ya miguw slra asi taŋ na, ɓa i sa cuh le. Na, ki si na slra ya miguw di na le gar kuy kuy ta kwa?»

²⁷Labaŋ a ɓaŋ: «Ambuh ta kwa, inga ciniy di. Daˀas a njikiy di na: Bumbulvuŋ a giy mezle le asi ka.

²⁸Ɓiy ɓi ngi migir ɗike, i sa wurkuw di.»

²⁹Zakop a ɓaŋ: «Na ka vuna ti haŋ ɗike, ki si na slra ya muguw di na le, yo ginew ɗikey misikam avu ya na, ki si na le takwa?

³⁰Ti ya muso t'aruŋ na, zlili ɗike naŋ neˀkini lambaˀ, amma ya mico sar kulaˀ a hay ɗik na, a sikam avu ya, hã a zumuw hirnga, yo Bumbulvuŋ a guw mezle le aseˀe ma. Wurenna, yi sa gi slra vur hay ɗu ti vuna ya ska?»

³¹Labaŋ a cufuɗaŋ: «I sa vuluw mi ani ska?» Zakop a mbiɗan di: «Da ki tiɓa ɓi ɗu ya mawuɗ i ɓuw di na le na, yi sa mo nga jigina tumuŋ ɗikeye, yo i sa ja haŋ taŋ a muŋ.

³²Dana, i sa ci nga wuzla tumuŋ ati ˀaw ɗikey gar, tumuŋ minjeɗeɗehey, muzlop zlopoy ati titirahay gar na, i sa wina taŋ baˀ pal, waɗ ˀaw minjeɗeɗehey ati mizlop zlopoy gar, wuruk ɗu i nah so.

³³Ti prik, ka masa so nga pura wuruk ɗu na, kisa si na yi mbur mijeŋŋe, ˀaw minjeɗeɗe malla muzlop zlop ta gar, yo tumuŋ misi ngwic titra ta gar a wuzla taŋ na, naɓa i hulo taŋ ti hul.

³⁴Labaŋ a ɓaŋ: «I ngum le! Anja a gi kanah.»

³⁵Amma kalla tapasa, Labaŋ a gwaha bazuway muguzulõh guzulõh, minjeɗeɗe ati muzlop zlopoyo, ˀaw mongoso minjeɗeɗe ati muzlop zlopoy gar, waɗ tumuŋ titra malla babara zlop zlopoy na, a vula taŋ da ziri naŋhay.

³⁶Dar a zuɓ jiviɗ, a gi hin makir ar li ru ar wala taŋ ati Zakopo. Zakop ara jigina is ngi tumuŋ ngi Labaŋhaya.

³⁷A ngum ganday ngi mekwerek mutukuzohoy kwer kwer makir. A gaˀa dubaˀ taŋhay neˀneˀ, ɓa a tiram njeɗeɗe babara.

³⁸A pa ganday minjeɗeɗehey tuwa sek angi suwã, ti mihiri ngi ginewey. Asi da taŋ mira soko ng'asi yam na, a cufam.

³⁹Ginewey mucufam le a mihiri ngi gandayaya na, a ya ka ziri guzulõh guzulõh, njeɗeɗe malla zlop zlopo.

⁴⁰Tumuŋ Zakop muwuna taŋ baˀ pal tuwa, a mbuɗo hiri taŋ ng'avu muguzulõh guzulõh ati titrahay misi angi gezleŋ ngi Labaŋ gar. Naŋ kine a ɗuf taŋ gezleŋ nga naŋhay taˀtaˀ, ko a jumo taŋ ati gezleŋ ngi Labaŋhaya ta.

⁴¹Ginew mizliɓ zliɓey mira cufam gar na, Zakop a pa gandayay tuwa sek a mihiri taŋ, angi suwã, ɓa a cufam ti mihiri ngi gandaya.

⁴²Da i ginew hĩhĩyahay na, a pa gandaya ta. Mbak ginew hĩhĩyahay i ngi Labaŋhay, yo mizliɓ zliɓey kwana i ngi Zakopoy.

⁴³Zakop a gi zlili le haɗi, naŋ da ti gezleŋ ngi tumuŋ ati ˀaway taˀtaˀ mbeˀ mbeˀ, ti beke mongoso ati mizilehey, zlogomohoy ati zunguhoy haɗi.