Read South Giziga GEN 32 Bible Online

GEN 32 - South Giziga bible

GEN 32

¹Li naŋ muwun na, Labaŋ a slikiɗ prik prik, a mbiɗa mi da ziri mongoso naŋhay ati dideˀ naŋhaya, a ɗuwula taŋ mi, dar a mi ngi hay naŋ.

²Zakop ara zuɓa jiviɗ naŋ, modro ngi Buymisemuŋhoy a soko jam di hirnga.

³Naŋ mupura taŋ keɗ na, a ɓi: «Walahay guɗuk ngi Buymisemuŋ.» Dar a zila li nah Mahanayim.

⁴Zakop a slin mizli a mbuŋ, ng'avu sukum naŋ Esaw angi hirwuy Seˀir, angi walahay guɗuk, ar prok ngi Edom.

⁵A pula taŋ jiviɗ, a ɓa taŋ na: «Ki sa ra ɓaka buy ɗu Esawa na: ‹Gawla ɗik Zakop a ɓi na: Yi cifi le a hay Labaŋ, yi zik le hã wurenna.

⁶Y'ada ti slahay ati zunguhoy, tumuŋhoy ati ˀaway, beke mizile ati mongosohoy. Yi slin ɓa a ɓukuw ɓi nah da ka buy ɗu Esawa, ɓa ki tiɓiy kuy kuy.›»

⁷Misliney a moko ng'avu Zakopo, a ɓakaŋ: «I ram le ng'avu sukum ɗik Esawa. Naŋ vuna ara so nga ji hirnga ti ka, naŋ ti mizli mizilehey skat skat mufaɗ aseˀe.»

⁸A muɗa didak le da Zakopo haɗi teˀe. A ngica mizli naŋhaya taˀ taˀ cuw, waɗ tumuŋhoy ati ˀawaya, slahay ati zlogomohoyo,

⁹asi a ɓi ti kwacay naŋ na: «Da Esaw a zla mingac numuŋ, a kiɗa taŋ le na, mingac mekeleme, a sa lih.»

¹⁰A dirba nah, Zakop a dir dibiɗ: «Aw Buymisemuŋ ngi dideˀ ɗu Abraham ati ngi baha Izak, ka Bumbulvuŋ miɓiy: Mi nga hirwuy ɗik, nga wuzla muy ɗikey, i sa guw mezle tuwa na,

¹¹ɓa ki giy mezle ati kaslsla ɗik, ka migiy di da ya gawla ɗik na, yi ndila ta! Asi ya mutuwuɗo mizaw Zurdeŋ na, ti ganday kaw a haŋ tewle, ani wurenna, y'ani ti mizli ngay taˀtaˀcuw.

¹²Ambuh, lihiy tisi haŋ ngi sukum ɗu Esawa. Asi yi ra zluwun di, i zluwun vur naŋ maso kiɗa ndra, ya, ngwasay ati ziri.

¹³Ka ki ɓiy zleˀe na: I sa guw mezle, yo i sa ga ɓa dideˀ ɗikey a sikam haɗi, kaɓa muyuŋ a mi mubuliy, a sluf ta, taŋ haɗi teˀe.»

¹⁴Zakop a hin ngi duvuɗ nah ar li nah. A hil asi ginew naŋhay, naŋ misi ti naŋ tuwa, ɓa a slin taŋ ngatara da sukum naŋ Esaw.

¹⁵ˀAw madiyahay skat skat cuw, bazuwayay kukur cuw, madiya tumuŋhoy skat skat cuw waɗ zlengerekey kukur cuw,

¹⁶madiya zlogomo misi ziri asi taŋ kukur makir jom ti ziri taŋhaya, madiya slahay kukur mufaɗ waɗ gusoŋhoy kuruˀu, zungu madiyahay kukur cuw waɗ gawla zunguhoy kuruˀu.

¹⁷A vula gineweye gar da gawla naŋhaya ti ngay ti ngay, a ɓa taŋ: «Cohom a mbuŋ, pulam li zar zar ar wala ngi ginewey mitaˀ taˀ na gar.»

¹⁸Dar a ɓa gawla mudumbuŋ: «Da sukum ɗu Esaw a sa ji hirnga le tika, yo da a sa cufuɗuw le: Ki gawla ngi waka? Ki ru a maka? Gezleŋ ngi ginewey mi taˀ a mbuŋ ɗik na, i ngi waka na? Ki sa mbiɗaŋ di:

¹⁹I ngi gawla ɗik Zakop, hana i gwat naŋ maslinuw di da ka buy naŋ Esaw, naŋ vuna, n'ani sawa a dirba ndra a diga.»

²⁰A ɓa gawla mucuw naŋ ati mimakir taŋ waɗ mizli masoko asi gezleŋ ngi ginewey mitaˀ taˀ gar na, kanah ma. A ɓa taŋ: «Da kum misa jam hirnga le ti buy ɗu Esawa na, kisa ɓakaŋ ti jiviɗ mupurla kahana.

²¹Yo kisa ɓakaŋ ma na: Gawla ɗik Zakop vuna kwana, n'ani sawa a dirba ndra a diga.» Vur Zakop a ɓi kwacay naŋ na: «Yi sa tislaŋ mevel ti gwat ngatara, ya maslinaŋ di a mbuŋ hana, a dirba nah, i sa ru deŋ a mbuŋ naŋ ma, asinta, da a sa tiɓiy kuy kuy kwani.»

²²Ginewey a ram a mbuŋ, amma naŋ a hin ngi duvuɗ nah ar li pi sar taŋ.

²³Ngi duvuɗ nah vuna, zakop a slikiɗ, a hila ngwas naŋhaya cuw taŋ, bekeheye cuw taŋ, ziri naŋhay mukuruˀ ngaŋ kaˀa, a tuwuɗ taŋ tir li tuwuɗ ngi mizaw Yabok.

²⁴A dirba naŋ mutuwuɗ taŋ ati gwat naŋhay gar na,

²⁵Zakop a ndir pal naŋ. Joˀ a zlumburam vu ati mbur hã li a wuɗ a wun gweˀe.

²⁶Mbur tuwa, a pura na, anta sa tikaŋ ˀay gu ta, dar a kiɗa Zakopo ar ngizlaŋ, hã ngizlaŋ a purut ti taŋ maputukulom vu a ruwuyo.

²⁷A ɓa zakopo na: «Puliy i cuh, asi li ara wunawa.» Zakop a mbiɗaŋ di: «da ki ɗuwuliy mi ɗuwal le ta na, y'anta sa puluw, ki cuh ta.»

²⁸A cufuɗaŋ: «A zilukuw mbrike?» A mbiɗaŋ di: «A zilikiy Zakop.»

²⁹Mbur tuwa, a ɓaŋ: «Anta sa zilukuw Zakop mata, amma Israyel, asi ki kiɗam vu le ati Buymisemuŋ waɗ ati mizli, na ki cifi bugawla le.»

³⁰Zakop a cufuɗaŋ: «Ambuh, inga bigiy slimiɗ ɗike takwa?» A ɓaŋ: «Na ki wuɗa slimiɗ ɗu ngi gi mike?» Joˀ a ɗuwulaŋ mi daˀ ar nah vuna si.

³¹Zakop a zila li nah Penuwel, a mbiɗeˀvra: mihiri ngi Bumbulvuŋ - Asi a ɓi: «I pura Buymisemuŋ le hiri taˀ ava, ti nah gar kwana, y'ada ti siifa.»

³²Ti naŋ mutuwuɗo Penuwel na, naɓa pas ara bawa. Aru kiciɗek kiciɗek ti ngizlaŋ naŋ mupurut tuwa.

³³Vurˀe, Israyelehey anta zumam meficek ngir tuwal mizlar avu tesl ngir ngizlaŋ na ta, hã dana aruŋ. Asi a kiɗaka Zakopo ar meficek mizlar avu tesl ngir ngizlaŋ vuna.