Read South Giziga GEN 33 Bible Online

GEN 33 - South Giziga bible

GEN 33

¹Zakop a zuɓa hiri, keɗ na, Esaw ara ndilawa ti mizli skat skat mufaɗ aseˀe. A wunka ziri da ti Leya, Rasel waɗ beke mucuwoy tuwa.

²A pa bekehey ati ziri taŋhay sek a mbuŋ, mi ɓaˀ asi taŋ kwana, i Leya ati ziri naŋhay waɗ Rasel ati Zozef.

³Zakop ti hirnga naŋ a ki ɓaˀ a mbuŋ taŋ, a guɓ durus durus is tarnaˀ hã ara ndila sukum naŋ.

⁴Esaw a kil nga ji di hirnga, a luw vikiciw ng'asi ˀay naŋ, a jaŋ kuɓuy, a tuwam cuw taŋ.

⁵Ti Esaw mizuɓa hiri, keɗ na, ngwasay ati ziri, a cufuɗaŋ: «Makusoko kahana i waniy ka?» Zakop a mbiɗaŋ di: «I ziri Buymisemvuŋ muvula taŋ da gawla ɗiki.»

⁶Bekehey a kirohoko ati ziri taŋhaya, a hurukom huruk huruk a mbuŋ naŋ.

⁷Leya a kirahawa ati ziri naŋhaya ya, a hurukom huruk huruk. Dar Zozef a kirohoko ati Rasel, a hurukom huruk huruk a.

⁸Esaw a ɓaŋ: «Gezleŋ ngi ginewey, ya miji taŋ hirnga na, kisa gi taŋ mike?» Zakop a mbiɗaŋ di: «Yi wuɗ zleˀe ɓa i lum gi mezle avu ka buy ɗu.»

⁹Esaw a ɓaŋ: «Nga yahay ada lot lot haɗi sukum ɗu, anja gwat ngi ɗik a ndir da ka!»

¹⁰Zakop a ɓaŋ: «Ambuh, kanah ta! Da ki jiy a kwacay mata na, tiɓa gwat ya mavuluw di na. Naŋ kine, yi pura mihiri ɗike kaɓa mapuram mihiri ngi Buymisemuŋ, ki giy mezle le haɗi wãˀ.

¹¹Tiɓa gwat ya muslunuw di na so, asi mike na, Buymisemuŋ a giy mezle le, gwatay ada cek a vi ya.» Zakop a hurdum di hirdam, hã a tiɓaŋ.

¹²Esaw a ɓaŋ: «Slikuɗukum, a kum le, y'ada ati ka.»

¹³Zakop a mbiɗaŋ di: «Buy ɗu, ki si na le, ziri taŋ luwuy luwuy aruŋ, yo y'ada ti tumuŋ ati slahay misi ti ziri masam ɗuwa, sey i ki slimiɗ ar taŋ. Da ani i tikaka taŋ ˀay le, ɓa i ram angi hin purla si na, naɓa ginewey gar a sa micam.

¹⁴Ambuh buy ɗu, ki a mbuŋ. Ya gawla ɗike kwana, i ki ɓaˀ asi ka, zayãˀ zayãˀ asi gwat ɗuwoy misi a mbuŋ, yo weˀe avu ru ngi ziri, hã i sa ndil avu ka buy ɗu a ruwuy Seˀir»

¹⁵Esaw a ɓaŋ: «Yi wuɗ i puluw mizli mikisoko ya na cah da ka.» Zakop a mbiɗaŋ di: «Kay! Ngi gi mi maka? Ki giy mezle le si ma na buy ɗu, naŋ muk ti ya si.»

¹⁶Kalla tapasa, Esaw a zuɓ jiviɗ kini ngir ti Seˀire.

¹⁷Zakopo kwana, aru nga Sukkot. A ndira hay a diga, waɗ gezleŋ muhurɗuk hurɗukoy, cap cap da gineweye. Vurˀe, a zila li hana Sukkot, mbiɗeˀvra: gezleŋ cap cap hurɗuk.

¹⁸Zakop mimawa baɗ ti ruwuy Mezopotami vay ngi muŋ na, a ndil zuy zuy a Sikem, walahay madiɗaŋ, angi hirwuy Kanaˀana, a ɗiya guɗuko gweˀ avu walahaya.

¹⁹A hiɗik guva puɗwulaˀ, suloy skat [4], avu dideˀ ngi Hamoroy, mbur mipa Sikem, a ɗiya guɗuk naŋ a diga.

²⁰A ɗiyi li gi mikuli anga ma, a zila «El, Buymisemuŋ ngi Israyel.»