Read South Giziga GEN 35 Bible Online

GEN 35 - South Giziga bible

GEN 35

¹Ngi pas mekelem ada na, Buymisemuŋ a ɓa Zakopo: «Slikiɗ, aru nga Betel, ara cifi ar li ya mubuguw vu ti ka makil ti sukum ɗik Esaw tuwa, ɗiyiy li gi mikuli a diga.»

²Zakop a ɓa mizli ngi hay naŋhay ati mizli ngi seˀeheye gar: «kuli ngi mizli mulakay misi a wuzla kum na, bam taŋ avra. Bunaka malambaˀ kumoyo, yo mbiɗaka zana kumoyo.

³Slikiɗukum, akum nga Betel, a diga, i sa ɗiy li gi mikuli da Buymisemuŋ mijiniy ti ya misi ar bonoy na. A ndir le ati ya ar li ya muru gar.»

⁴Kuli mulakay misi asi haŋ taŋ waɗ gwat ngi slimiɗ taŋhaya, a vulaka taŋ da Zakopo. Dar Zakop ara dika taŋ asi widis madiɗa ada gweˀ a Sikem.

⁵A dirba taŋ mislikiɗam ti kẽh na, Buymisemuŋ a ya zluwun cak cak da mizli ngir walahay mugun hirnga taŋ gar. Ko mbur mizli ɓi ngi sipa ziri ngi Zakopoy anta.

⁶Zakop ati mizli ngi seˀehey gar a ndilam a Luz, angi hirwuy Kanaˀan, mbiɗeˀvra, Betel.

⁷A ɗiy li gi mikuli a diga, a zila li nah na, «Buymisemuŋ ngi Betel» asi Buymisemuŋ mubugaŋ vu ti naŋ makil ti sukum naŋ Esaw na a diga.

⁸Debora, ngwas migila Rebeka, a mucu. A dikaka tir vay ruwuy ngi Betel, asi widis madiɗa ka miter, Zakop a zila «widis madiɗa ka miter mutuwam aseˀe.»

⁹Ti Zakop mamawa ti ruwuy Mezopotami na, Buymisemuŋ a bigaŋ vu ma, a ɗuwulaŋ mi.

¹⁰A ɓaŋ: «Slimiɗ ɗik i Zakop, anta sa zilukuw Zakop mata, amma a sa zilukuw Israyel.» Dar Buymisemuŋ a caŋ slimiɗe Israyel so.

¹¹Buymisemuŋ a ɓaŋ: «Yi Buymisemuŋ misi gidaŋ wãˀ. Yi ziri, anja dideˀ ɗikey a sikam haɗi: sukwi malla ko sukwi ngi mizli haɗi, a sa boko tivi ka, yo buy madiɗahay a sa boko ti kwacay ɗiki.

¹²Hirwuy ya muvula da Abraham ati Izak na, i vuluw di le da ka, a dirba ɗik nga mbuŋ kwana, i sa vula da dideˀ ɗikey.»

¹³Akẽh na, Buymisemuŋ a slikiɗ kileŋ avu Zakopo, kileŋ avi li naŋ miɓaŋ ɓi anga tuwa.

¹⁴Zakop a ngi ɗugur kaˀ angi li Buymisemuŋ miɓaŋ ɓi anga tuwa. A pusla ɗugur tuwa ti mbaazla, a pi mal a hirnga naŋ ma.

¹⁵Zakop a ca slimiɗ da li Buymisemuŋ miɓam ɓi ati naŋ tuwa, Betel. Mbiɗeˀvra hay ngi Buymisemuŋ.

¹⁶Zakop ati mizli ngi hay naŋhay, a pulaka Betele. Rasel a yi, naɓa taŋ zar avu Efrata aruŋ. A yi ti tuwaˀ haɗi teˀe.

¹⁷Naŋ mayi ti tuwaˀ tuwaˀ na, ngwas miyi ngwasay a ɓaŋ: «Ki zluwun ta, i mangal mizile ma.»

¹⁸Ti musuwun mawuɗ a sli gweˀ na, Rasel a ca slimiɗ da mangala Ben-Oni, mbiɗeˀvra mangal ngir bonoy. Amma cine a zila Benjameŋ, mbiɗeˀvra mangal misi tir vay hazum.

¹⁹Rasel a muc, a dikaka a ciki jiviɗ ngi Efrata, mbiɗeˀvra, Beteleyem.

²⁰Zakop a ngi ɗugur kaˀ a hirnga zivi naŋ. A zilaka: ‹Ɗugur ngi mizivi ngi Rasel› hã dana aruŋ.

²¹Israyel a pula li nah, ara ɗiya guɗuk naŋ ti duba Migdal-Eder.

²²Dambalaka, ti Israyel misi ti hay naŋ ar li nah na, Ruben a ra hin ti Bila, mangasl ngi cine, Israyel a cine ɓi nah le. Zakopo naŋ ti ziri mizilehey kuruˀ nga cuw.

²³Ziri mizile ngi Leyahay i ti: Ruben, modogom ngi Zakop, Simeyoŋ, Levi, Zuda, Isakar, waɗ Zabuloŋ.

²⁴Ziri mizile ngi Raseley i ti: Zozef ati Benjameŋ.

²⁵Ziri mizile ngi Bila, beke ngi Rasele i ti: Daŋ ati Neftali.

²⁶Ziri mizile ngi Zilpa, beke ngi Leya i ti: Gat ati Aser. Tayna i ziri ngi Zakopoy miya taŋ asi ruwuy Mezopotami.

²⁷Zakop a ndil a hay cine naŋ Izak a Mamre, a Kiriyat- Arba, i Hebroŋ misi Abraham ati Izak micifam zleˀe anga na.

²⁸Ti Izak migi vi skat ti kukur dangafaɗ na,

²⁹a mucu. A jum ng'avi mizli naŋhay, a gi gal le, a zum ɗaf le kuy kuy. Esaw ati Zakop ziri naŋhay a dikakaŋ.