Read South Giziga GEN 38 Bible Online

GEN 38 - South Giziga bible

GEN 38

¹Hirak ti nah na, Zuda a slikiɗ baɗ avu sukum naŋhaya, aru ngi hay mbur ada a Adulam, a zilaka Hira.

²Zuda a pur zuŋ ngi mbur Kanaˀan a diga, a zilaka Suwa. A zuɓa, a ɗuvaŋ.

³Ngwas tuwa, a gi hur, a yi mangal mizile, Zuda a zila Er.

⁴A gi hur ma, a yi mangal mizile tuwa ma, mumuŋ a zila Onaŋ.

⁵A dirba nah, a gi hur ma, a yi mangal mizile tuwa ma ni, mumuŋ a zila Sela. Naŋ miya Sela na, naɓa Zuda aro a Kezip zleˀe.

⁶Er mangal naŋ modogomo, Zuda a zuɓaŋ ngwas a zilaka Tamar.

⁷Er, mangal modogom ngi Zuda, a cira hiri da Bumbulvuŋ ta, a ga ɓa Er a mucu.

⁸Dar Zuda a ɓa Onaŋ na: «Aru ng'avu ngwas ngi vagay sukum ɗike, ngila kaɓa mangilam ngwas ngi sukumuŋ, ɓa ki yi ar deɗe ngi vagay sukum ɗike.»

⁹Amma Onaŋ a si na le, a sa yi di i tizer nga naŋ ta, da naŋ mira hin ti ngwas ngi sukumuŋ na, a pa vu naŋ nga hirwuy, ɓa a ya tizer ngi sukum naŋ ta.

¹⁰Gwat ngi gi naŋ hana, a cira hiri da Bumbulvuŋ ta, a ga ɓa naŋ vuna kwana, a muc aya.

¹¹Dar Zuda a ɓa dideˀ naŋ Tamara: «Cifi wudiga a hay bunuku, hã mangal ɗu Sela a gil kwaɗay.» Naŋ kine, a ɓi zleˀe ti kwacay naŋ na: «Anja mangal ɗu hana, ara muc kaɓa sukum naŋhay na mata!» Dar Tamar a ru, ara cifi a hay cine.

¹²A zikam, a zikam na, zuŋ ngi Suwa, ngwas ngi Zuda a mucu. Hin ngi vagay mikiɗ mi na, Zuda a ram nga Timna ati ngama naŋ Hira mbur Adulam, ngi hay mizli misli ngwic ngi tumuŋ naŋhay.

¹³A ɓaka ɓi nah da Tamara: «Pura, dideˀ ɗik ara ru nga Timna, a sli ngwic ngi tumuŋ naŋhay.»

¹⁴A cuko zana ngi wudiga avra, a sirta vu sirit sirit ti lafaye, ko mbur a sinaŋ mata, dar ara cifi a mizlingre ngi walahay Enayim, a ciki jiviɗ ngi Timna. Asi a pura na, Sela a gil le ngbaŋ, amma ko a vulakaŋ di ɓa a gi di ngwasa ta.

¹⁵Zuda a pura Tamara, a wa kaɓa i burvula, asi a sirta hiri le tuwaŋ.

¹⁶A ngizli ng'ava a ciki jiviɗe, a ɓaŋ: «Haya! Puliy ɓa i hin ti ka!» Asi i dideˀ naŋ na, Zuda a si na ta. Tamar a mbiɗan di: «Ki sa vuliy mi ɓa ki hin ti ya vunaka?»

¹⁷Zuda a ɓaŋ: «I sa slinuw ti ˀaw minjaslsla ngir gezleŋ ɗu.» Tamar a ɓaŋ: «Haˀaw, sey ki jikiy gwat jak le ngi kutuko mislin ɗike.»

¹⁸A cufuɗaŋ: «I jukuw gwat mi ska?» A mbiɗaŋ di: «Gwat ngi ɗuva slimiɗ ɗike jom ti zeweɗ naŋ gar waɗ ganday mikaw a haŋ ɗik na.» Zuda a vulaŋ taŋ, a hin di, a gaŋ hur.

¹⁹Tamar a slikiɗ, a cuh, a cuko zana misirit sirit tuwa, avra. A ka zana ngi wudiga naŋ a muŋ.

²⁰Zuda a slino ngama naŋ, mbur Adulam ti ˀaw minjaslsla tuwa, ɓa a tuɓo gwat naŋ mijika taŋ da ngwas tuwa ya, ko ngama naŋ a luuma ngwasa ta.

²¹Joˀ a cufuɗa mizli ngi kẽheye: «Burvula macifi zleˀe a jiviɗ ngi Nayim na, naŋ amaka?» A mbiɗakaŋ di: «i puram burvula ɗaˀ aka ta.»

²²Hira a mo ng'avu Zuda, a ɓaŋ: «I luuma ta, yo mizli ngi digahay a ɓam ma na, a puram burvula ɗaˀ a diga ta.»

²³Zuda a ɓi ma: «Anja a ndir ti gwataya. Anja mizli a singiram ar ndra ta, ani yi slinaŋ ti zuŋ ˀaw minjaslsla le, yo ka kwana, ki luuma ta.»

²⁴A gi kiya makir a dirba naŋ na, mbur a sawa, a ɓa Zuda: «Dideˀ ɗik Tamar a gi sulome le, mukuy ta vuna ma na, a gi hur le ti sulome naŋ vuna!» Zuda a ɓi: «Bam di nga duba gala, ɗuvakaŋ vu ɓa a wur titiri.»

²⁵Ti taŋ mabam di na, Tamar a slin ng'avi dideˀ naŋ, ɓa a ɓakaŋ: «Migiy huro i buy ngi gwat hanayna.» Dar a ɓi ma: «Gwat ngi ɗuva slimiɗ jom ati zeweɗ naŋ waɗ ganday hana, i ngi wahay ka, si na so!»

²⁶Zuda a si na taŋ le, a ɓi: «Tamara naŋ jeŋŋe a finiy le, asi yi vulaŋ da mangal ɗu Sela ta.» A dirba nah Zuda a hin di ɗaˀ mata wãˀ.

²⁷Tapas Tamar mayi muduba na, dambalaka i ziri misahay misi a kwacaya.

²⁸Pal a bo ti haŋ. Ngwas miyi ngwasay, a jaŋ, a juwaŋ gugumay gagaza avu haŋ, a ɓi: «Hana a bo dumbuŋ.»

²⁹Mangal tuwa, a mi ti haŋ muŋ, misa bawa i sukum naŋ. Ngwas miyi ngwasay a ɓi: «Kaɓa ki slino li mekelem ti slin mbrike?» A cakaŋ slimiɗe Peres, mbiɗeˀvra: «li mislina»

³⁰A dirba nah, sukum naŋ misi gugumay gagaza a vu haŋ tuwa, a bawa ya. A cakaŋ slimiɗe Zera.