Read South Giziga GEN 39 Bible Online

GEN 39 - South Giziga bible

GEN 39

¹Ismayeley miram ti Zozef nga Ezipte tuwa, a hiɗikaka da Potifar mbur ngisi mevel ngi buy madiɗa ngi Ezipte, i madiɗa ngi soje mijigina hay ngi buyoy.

²Bumbulvuŋ naŋ da ati Zozefe, a ga gwata gar kasl kasl. A cifi a hay buy naŋ, mbur Ezipte vuna si.

³Buy naŋ tuwa, a pura na, Bumbulvuŋ ara ga mezle da Zozefe. Gwat Zozef mira ga gar na, Buymisemuŋ a jinaŋ, ɓa a gi kasl kasla.

⁴Potifar a hĩyã Zozefe teˀe, a vulaŋ slra nga naŋ. A vulaŋ madiɗa ngi wa mizli ngi hay naŋhay, yo a vulaŋ zlili naŋ gar asi haŋ naŋ.

⁵Dambalaka, zle ti Potifar mucufaŋ madiɗa ngi hay naŋ, yo naŋ mu vulaŋ zlili naŋ gar asi haŋ naŋ tuwa na, Bumbulvuŋ ara ɗuwula mi da mbur Ezipte asi Zozefe. Ɗuwula mi ngi Bumbulvuŋ a ndih ar zlili naŋhay gar, ngi hayay ati ngi ɓuhoy gar.

⁶Dar a pula zlili naŋhay gar asi haŋ ngi Zozefe, yo Zozef misi a cikeˀe tuwa si na, Potifar anta gi gwat mekelem neˀ le mata, sey ɗaf nga mi tewle. Zozef i gawla mezle haɗi, hiri a ɗuf ava ta.

⁷A dirba gwat tayna migam na, ngwas ngi Potifar a zla pura kuy ngi Zozefe, a ɓaŋ: «So hin ti ya!»

⁸Amma Zozef a ngum ta, a ɓa ngwas ngi buy naŋ: «Cina, buy ɗu a cifiy le acikeˀe, yo anta a gi gwat neˀ a hay aka mata, a pula zlili naŋhay le gar asi haŋ ɗu.

⁹A hay aka vuna ma na, naŋ anta dum hirnga ɗu ta, yo a sli himaˀ ti gwat avu ya ko neˀ ta, sey ka tewle, asi ki ngwas naŋ. Ɓa i ra ga gwat malambaˀ mifineˀ gidaŋ kahana, yo ɓa i gi mungra avu Bumbulvuŋ mbri mbrike?»

¹⁰Vur hin gar na, ara ɓa Zozefe ɓa a hin di, amma ko Zozef a ngum ta.

¹¹Ngi pas numuŋ ada na, Zozef a ci ngi haya ɓa a ga slra naŋ, ko mbur loŋ tekeɗe anta a haya ta.

¹²Ngwas tuwa, a jaŋ avu zana, a ɓaŋ: «So hin ti ya!» Zozef a pulaŋ zana kacap avu haŋ, a kil, a bi ng'avra.

¹³Ti naŋ mupura Zozefe a pulaŋ zana le kacap avu haŋ, a kil le ng'avra tuwa na,

¹⁴a zilo migi slra ngi hay naŋhay, a ɓa taŋ: «Puraka ayɗi! A soko ndra ti mbur Heber ɓa a gi ti ndra dungur. A so ng'avi ya ɓa a hin ti ya, joˀ yi zil vu ti gidaŋ.

¹⁵Ti naŋ micina cin, i zuɓa ˀay le a muŋ, i ra zil vu si na, a pula zana kacap a ciki ɗu, a kil, a bi ng'avra.»

¹⁶Ngwas tuwa, a ka zana ngi Zozef tuwa ɓaˀ a cikeˀe, hã zil naŋ a mo ngi haya.

¹⁷A sipaŋ ɓi mupurla, a ɓaŋ: «Mbur Heber, beke ka muso ndra di tuwa, a so ng'avi ya, ɓa a gi ti ya dungur.

¹⁸Naŋ micina cin, i zuɓa ˀay le muŋ, i ra zil vu na, a pula zana naŋ a ciki ɗu, a kil ng'avra.»

¹⁹Ti Potifar micina ɓi ngwas naŋ miɓaŋ: Pura beke ɗik a gi ti y'ani kahana kahana tuwa na, a zuɓ himaˀ fõh fõh.

²⁰A ɓi ɓa a jaka Zozefe, a kaka ng'ar dangay, ar li gica dangay ngi buyoy. Zozef tuwa, a ro ar dangay a diga.

²¹Bumbulvuŋ naŋ da ati naŋ, a gaŋ mezle, hã buy miwa danga yay a hĩyãŋ haɗi.

²²Buy miwa dangay hana, a pula dangayay gar asi haŋ ngi Zozef, gwat magaka a diga gar na, i Zozef mapula taŋ jiviɗe.

²³Buy ngi dangayaya, slra naŋ mupula asi haŋ ngi Zozef na, anta a ki slimiɗ ara mata si, asi Bumbulvuŋ naŋ da ati zozefe. Gwat naŋ mira ga gar na, Bumbulvuŋ a jinaŋ ɓa a ga kasl kasla.