Read South Giziga GEN 4 Bible Online

GEN 4 - South Giziga bible

GEN 4

¹Adamu a jumom ati ngwas naŋ. Hawa a gi hur, a yi Kayẽ, a ɓi: «I yi mbur le mbele mbele Bumbulvuŋ.»

²A ya Abel sukum ngi Kayẽ ma. Abel i mijigina tumuŋhoy, yo Kayẽ kwana i muhufo.

³Ngi hin mekelem ada na, Kayẽ a so ti gwat ngi migam naŋ ngi vul da Buymisemuŋ.

⁴Abele kwana, a so ti modogom ngi ginew ngir gezleŋ naŋhay, a kiɗa taŋ, li kukuɗo naŋhaya, dar a gi taŋ mikuli da Bumbulvuŋ. Buymisemuŋ a hĩyã Abele le jom ati gwat ngi vul naŋ.

⁵Amma a hĩyã Kayẽ ati gwat ngi vul naŋ ta. Kayẽ a ji mevel haɗi, a juw mi.

⁶Bumbulvuŋ a ɓa Kayẽ: «Ki ji mevel, yo ki juw mi vur mike?

⁷Da ki gi di i gwat mikaslsla zleˀe na, anja ka hirnga paɗ a muŋ ayɗi. Ani ki gi di i gwat mikaslsla ta, vurˀe mungra a ra kutukuw a mizlingre kaɓa ngoŋngoŋ, a wuɗ a juw, amma sey i ka matikaŋ ˀaya.»

⁸Kayẽ a ɓa sukum naŋ Abele na: «Akum» nga duba gala, ti taŋ mindilam a duba gala na, Kayẽ a jiɗ bir ar sukum naŋ Abele, a kiɗa vagay.

⁹Bumbulvuŋ a cufuɗa Kayẽ: «Sukum ɗik Abele naŋ amaka?» Kayẽ a mbiɗaŋ di: «I si na ta, yi mijigina sukumɗuzleˀe kwa?»

¹⁰Bumbulvuŋ a mbiɗaŋ di ma: «Ki gi di mi hanaka? Pumbus ngi sukum ɗik macufuɗ pula cuwal naŋ baɗ a ruwuyo na, cine.

¹¹Wurenna, hirwuy i minisa le vur ka, asi naŋ muwuna mi ngi tiɓa pumbus ngi sukum ɗik mipi asi haŋ ɗik na.

¹²Ko ti ka misa huv le kwana, hirwuy anta sa guw gwat mata. Ki sa tiri mbur ngir sar, yo maliˀi kiŋkiŋ lambaˀ asi ruwuy.»

¹³Kayẽ a ɓa Bumbulvuŋ: «Bonoy ɗu naŋ dudok haɗi, a jijir ta.

¹⁴Ani ki ɓuliy le dana ti ngi hirwuy mezle ngi huvo, i sa ndir muɗumo a mihiri ɗike. I sa liˀi kiŋkiŋ lambaˀa. Ko wa misa lumiy le gar na, a sa kiɗiy vagay.»

¹⁵Amma Bumbulvuŋ a mbiɗaŋ di: «Da kine na! mbur mikiɗa Kayẽ le vagay na, a sa pulaka cuwal naŋ is tarnaˀ.» Bumbulvuŋ a ɗuva lammba da Kayẽ, ɓa ko wa misa zlir di le gar na, anta sa kiɗa vagay mata.

¹⁶Dar Kayẽ a cuh kileŋ a mihiri ngi Buymisemuŋ, ara cifi a hirwuy Nodi, kini tisi pas ngi miprik ngi guva ngi Eden.

¹⁷Akẽh na, Kayẽ a jumom ati ngwas naŋ. A gi hur, a yi Henok. Kayẽ a pi walahay madiɗaŋ, a zila walahay nah Henok ti slimiɗ ngi mangal naŋ.

¹⁸Henok a yi Irat. Irat a yi Mehuyaˀel. Mehuyaˀel a yi Metusaˀel, Metusaˀel a yi Lamek.

¹⁹Lamek a zuɓ ngwasa cuw, mudumbuŋ a zilaka Ada, mucuw naŋ kwana i Sila.

²⁰Ada a yi Yabal, mizli misi ginewey macifam asi guɗukoy na, a yi Yabalay vuna.

²¹Sukum naŋ a zilaka Yubal, mikiɗa gujuvuroy ati mifi bozlorohoy gar na, a yi Yubalay vuna.

²²Sila kwana, a yi Tubal Kayẽ, i gudi, sukwi ngi gwat mazumam yaɓyaɓ gar na, i naŋ mavuɗa taŋ ti ɓiri gaza ati titra. Tubal- Kayẽ, sukumuŋ mongoso, i Naˀama.

²³Lamek a ɓa ngwas naŋhaya: «Ada, Sila, cinaka mingiɓi ɗu! Kum ngwas ngi Lamekey, jikam slimiɗe! Da a kiɗikiy le na, i kiɗ mbur pal vagay. Da a gikiy waˀa le na, i kiɗ zuŋ meciɗek pal vagay.

²⁴Da a kiɗam mizli le tarnaˀngi pula cuwal ngi Kayẽ na, a sa kiɗam kukur tarnaˀ nga tarnaˀ ngi pula cuwal ɗu.»

²⁵Adamu a jumom ati ngwas naŋ ma, a yi mangal mizile. Hawa a zila Sete, asi a ɓi na: «Buymisemuŋ a vuliy mangal mekelem le ar deɗe ngi Abel, Kayẽ mikiɗa vagay tuwa.»

²⁶Sete kwana, a yi mangal mizile, a zila Enos. Ti nah na, mizli a zlaka tumbulo Buymisemuŋ, a zilakaŋ, Bumbulvuŋ.