Read South Giziga GEN 40 Bible Online

GEN 40 - South Giziga bible

GEN 40

¹A dirba gwat tayna migam na, gawla ngi buy Eziptehey, madiɗahay cuw, a gam mungra ava. I buy ngi migi slra ngi gwat ngi sihey ati buy ngi migi slra ngi ɗafay.

²Buy madiɗa ngi Ezipte a ji mevel haɗi angi gawla naŋ madiɗa mucuw tayna, buy ngi migi slra ngi gwat ngi sihey ati buy ngi midi ɗafaya.

³Dar a pa taŋ ng'ar dangay, a hay buy ngi soje mijigina hay ngi buyoy, a wazlaray, ar li migicaka Zozef ara tuwa.

⁴Buy ngi soje mijigina hay ngi buyo, a vula taŋ Zozef ɓa a gi gawla taŋ, yo a zikam le neˀ ar dangaya.

⁵Ngi duvuɗ mekelem ada na, madiɗa ngi migi gwat ngi sihey ati madiɗa ngi midi ɗaf ngi buy Eziptehey a musuwunam cuw taŋ ar dangaya. A musuwunam pal pal, ti mbiɗeˀvra taŋhaya pal pal.

⁶Ngi miprik naŋ na, Zozef a so ng'avi taŋ, a sa luuma taŋ ara ndurɓom hiri.

⁷Dar Zozef a cufuɗa taŋ asi taŋ bummoˀ ar dangay ar hay ngi buy taŋ, a ɓa taŋ: «Ki ndurɓom hiri mi dana ka?»

⁸A mbiɗakaŋ di: «I musuwunam le, na mbur mambiɗa ndra mbiɗeˀvra naŋ gu anta. Zozef a ɓa taŋ: Ma mbiɗa mbiɗeˀvra naŋ i Buymisemuŋ takwa? Slufikiy kum mumusuwunam vuna.

⁹Madiɗa ngi migi gwat ngi sihey a slufa musuwun naŋ da Zozefe, a ɓaŋ: «I musuwun na, widis mubam vu ati gudubun kaˀ a mbuŋ ɗu.

¹⁰Mihaŋ ava ɓaˀ ɓaˀ makir, a hil ɗangal, a fuyuk, a dirba nah, yi minaha ava locok locok.

¹¹Ya ti sikiɗ ngi buy madiɗa ngi Ezipte kaw a haŋ, i ngila yi ngi gudubun mulocok tuwa, i ɗuco ng'ar sikiɗ ngi buy madiɗa ngi Ezipte, dar i vulaŋ di a haŋ naŋ.»

¹²Zozef a ɓaŋ: Mbiɗeˀvra ngi musuwun ɗike n'ani. Mihaŋ miɓaˀ ɓaˀ makir na, i hin makir.

¹³A ndir hin makir, buy madiɗa ngi Ezipte a sa puluw ɓa ki mumul, a sa cufuw ar li ngi slra ɗik a muŋ, kisa vula gwat ngi si da naŋ buy madiɗa ngi Ezipte, kaɓa ka maga zleˀe ti ka misi i madiɗa ngi migi gwat ngi sihey na.

¹⁴Amma da ka misa cifi le kuy kuy na, wuluk ar ya, ɓa ɓi ɗu ti mezle a mbuŋ buy madiɗa ngi Ezipte, yo bi ti ya tir hay misenna.

¹⁵Asi mike na, a joko ya baɗ a ruwuy ngi Heberey, yo aka vuna ma na, yi gi gwat ɓa a cikiy ar dangaya ta.»

¹⁶Madiɗa ngi midi ɗafaya, a pura na, Zozef a mbiɗa mbiɗeˀvra ngi musuwuno le tir mezleŋ, a ɓaŋ na: «Yi musuwun le ya, gadagaray jirngasl jirngasl makir a hirnga ɗu, ti makala ti sukwi mbeˀ mbeˀ araŋ,

¹⁷Angi gadagar vay ngi muŋ na, makala ti sukwi mbeˀ mbeˀ, buy madiɗa ngi Ezipte mawuɗ ada angaŋ. Dar ɗiyuwoy ara ndam gwat misi ar gadagar misi a hirnga ɗu tuwaŋ.»

¹⁸Zozef a zla a ɓaŋ: mbiɗeˀvra ngi musuwun ɗike n'ani. Gadagar mimakir na, i hin makir.

¹⁹A ndir hin makir, buy madiɗa ngi Ezipte a sa bukuw hirnga. A sa luwuw law ar widis, ɗiyuwoy a sa ndaka useˀ ɗike.»

²⁰Dambalaka, hin mimakir tuwa na, i muguzlum ngi buy madiɗa ngi Ezipte micifi buy madiɗa. Adi ɗaf madiɗa da gawla naŋhay cek, a zilo madiɗa ngi migi gwat ngi sihey ati madiɗa ngi midi ɗafay nga mbuŋ taŋ.

²¹A mi ti madiɗa ngi migi gwat ngi siheye ng'ar li naŋ a muŋ, ɓa a vulaŋ gwat ngi si a muŋ.

²²A luwa madiɗa ngi midi ɗafaya law a muŋ, kaɓa Zozef miɓa tuwa.

²³Amma madiɗa ngi migi gwat ngi sihey tuwa, anta ɓa ɓi ngi Zozefe mata, a puyuk di hirnga le.