Read South Giziga GEN 43 Bible Online

GEN 43 - South Giziga bible

GEN 43

¹May ara bul vu asi ruwuy Kanaˀana.

²A dirba mizli ngi hay Zakopoy mitikaka daw taŋ musoko di ti hirwuy Ezipte tuwa na, cine taŋ a ɓa taŋ: «Mam, ara hiɗikoko ndra gwat ngi zumo neˀ ma.»

³Zuda a mbiɗaŋ di: «Mbur a ɓa ndra ɗaˀ ɗaˀ le: ‹Da sukum kumo naŋ anta asi kum ta na, i tuɓukum a mbuŋ ɗu aka ta wãˀ.›

⁴Da ki ngum le ɓa ki slina sukum ndra asi ndra na, i sa ra huɗukukuw gwat ngi zumo ɓula.

⁵Amma da ki ngum ta na, ndr'anta i sa ram ta, asi mbur vuna a ɓa ndra na: ‹da sukum kumo naŋ anta asi kum ta na, y'anta i sa tuɓukum a mbuŋ ɗu aka ta.›»

⁶Israyel a ɓi ma: «Ki zluɓaka le avu ya, ki ɓaka mbur nah, sukum kum mekelem ada ma na, vur mike?»

⁷A mbiɗakaŋ di: «Mbur nah a cufuɗa ndra pislek pislek, ndra vuna ati hay ndra, a ɓa ndra: ‹Cine kumo naŋ da ti siifa ruŋ kwa? Sukum kum mekelem ada ma kwa?› I tika ˀay avu ndra ɓa i mbiɗakaŋ di kaɓa naŋ macufuɗa ndra vuna. I sinaka le zleˀe, ɓa a sa ɓa ndra: ‹Soko ti sukum kumo makwa›»

⁸Dar Zuda a ɓa cine naŋ Izrayel na: «Pula mangala aru asi ya. Da i wuɗam le ɓa i micam ta, i ndiram ti siifa, ka, ndra ati ziri ndraˀahaya. Pula ndra, ndr'i ram.

⁹Zay ɓi na naŋ a hirnga ɗu, yo da yi muw di ta na, kisa cufuɗa ɓi naŋ a vi ya, da yi mo di nga mbuŋ ɗike ta na, naɓa i gi malambaˀ le ngi caˀ a mbuŋ ɗike.

¹⁰Da i murom kahana zleˀe ta na, anja ɓa i moko le sar mucuw naŋ si.»

¹¹Cine taŋ Izrayel a ɓa taŋ: «Da a gi le kine na, gaka gwata ni. Hilam gwat mezlehey ngisi hirwuy ndra ar gabal kumoy a haŋ, ngi ra vul da mbur vuna: wuɗam mukuturɓuy mazĩˀĩ ndum, mam neˀ, tebeɗ ngi widisey, mukuturɓuy mazilaka ladanum, zinga ngi muˀuzl waɗ zinga ngi ɗagwas.

¹²Wuɗam dala mekelem a haŋ waɗ dala mupukum taŋ ar kayawa kumoy a hirnga daw na, asinta a puyuk ti puyuk kwani.

¹³Zuɓaka sukum kumo, a ram, mam ng'avu mbur nana.

¹⁴Anja Bumbulvuŋ misi gidaŋ wãˀ, a ga ɓa mbur nah na a gukum mezleŋ, anja a pula sukum kum mekelem na, waɗ Benjameŋ, ɓa ki moko! I sa ndir ɗoɗok manja zuŋ, kaɓa y'anta ti ziri zleˀe ta mbrike?»

¹⁵Sukumuŋhoy tuwa, a zuɓaka gwat ng'avulo, dala misi zleˀe waɗ mekelem a haŋ ati Benjameŋ. A cohom, a ndilam a Ezipte, joˀ a ram nga mbuŋ Zozefe.

¹⁶Zozef mupura Benjameŋ keɗ asi taŋ na, a ɓa buy ngi mijigina gwat ngi hay naŋhaya: «Aru ti mizli tayna ngi hay, sli ˀay ngi gwat soŋ, gi gwat ngi zum. Asi i sa zumam bummoˀ ati mizli tayna ti wuzla papasa.»

¹⁷Mbur tuwa, a ga kaɓa Zozef miɓaŋ di na, a ci ti mizli tuwa ngi hay Zozefe.

¹⁸Taŋ micam ti taŋ ngi hay Zozef na, a ga taŋ zluwun le, a ɓam ar wala taŋ: «A coko ti ndra na, asi dala mimam ndra di ar kayawa ngi daw ndrahay, ti ndra musoko sar mudumbuŋ na. A coko ti ndra ati zungu ndraˀahaya, ɓa a ndilam vu sirtit ar ndra, a guzuvuram ndra, a gam ti ndra beke.»

¹⁹A kiraham nga mizlingreŋ, ng'avu buy ngi mijigina gwat ngi hay Zozefeye, a ɓakaŋ:

²⁰«Ambuh takwa buy ɗu! I soko le ɗaˀ nga hiɗika gwat ngi zum aka.

²¹Ti ndra mindilam ar li pi sar, i hinam na, i wunaka kayawa ngi daw ndraˀahaya, dala ngi mburo gar aro ɓaˀ a hirnga daw, a hur kayawa, i dala ndrahay vuna cummo, gujuˀo, i moko taŋ le a haŋ,

²²yo i soko ti dala mekelem le a haŋ, ngi hiɗika gwat ngi zumo. Mbur mipa ndra dala ndrahay ng'ar kayawa ndraˀahaya muŋ na, ko i sinaka buy naŋ ta.»

²³Mbur tuwa, a ɓa taŋ: «Cifam teˀteˀ, ki zluwunam ta. Mupukum zlili ng'ar kayawa kumoy na, i Bumbulvuŋ kum, Bumbulvuŋ ngi cine kum, amma dala ngi kumo yi tiɓa le.» Dar a pula taŋ Simeyoŋ.

²⁴Mbur tuwa, a ci ti taŋ ngi hay Zozefe. A so taŋ ti yam ngi buna sar, yo a vula gwat ngi zum da zungu taŋhaya.

²⁵A ɗiyaka gwat ngi vuloy tuwa cici, ngi kutuko Zozef masa sawa ti wuzla papasa, a wuɗ a sa zumam Akẽh na, a slaka wala nah le muduba.

²⁶Ti Zozef mumo ngi hay na, a vulakaŋ gwat taŋ misakaŋ taŋ, misi a vi taŋ a haya kẽh, joˀ, a hurukom a mbuŋ naŋ.

²⁷A cufuɗa taŋ: kum zuy zuyo ya? Yo a ɓa taŋ ma: «Midigila cine kum, kum miɓikiy ɓi naŋ zleˀe tuwa, naŋ da zuy zuyo ya? N'ada ti siifa aruŋ kwa?»

²⁸A mbiɗakaŋ di: «Cine ndra, gawla ɗike, naŋ kuy kuy, naŋ da ti siifa aruŋ.» A hurukom, a hurukom huruk huruk a mbuŋ naŋ.

²⁹Zozef a zuɓa hiri, keɗ na, Benjameŋ sukum naŋ, zuŋ ngi mumuŋ. A ɓi: «Hana i tuboˀ kum, kum miɓikiy ɓi naŋ tuwa kwa?» Joˀ a ɓi ma: «Anja Bumbulvuŋ a guw mezle mangal ɗu.»

³⁰Naŋ mupura sukum naŋ na, a jijikaŋ ngbaˀ ngbaˀ, a wus vu ngi pura li tuwuy. A ci nga viŋ naŋ, dar a tuwuy a diga.

³¹A buna hiri ceɗ ceɗ, a bawa muŋ. A ɓuso ɓus, a ɓi so na: «Soko ti ɗafa.»

³²A vulakaŋ ɗaf nga naŋ baˀ pal, waɗ ngi sukum naŋhaya pal taŋ ya. Mizli Eziptehey mazumam a hay naŋ, taŋ baˀ pal taŋ ya. Asi Eziptehey t'anta ti jiviɗ ngi zum ati Hebereye ta. Avi taŋ, i gi malambaˀ muwãˀ naŋ.

³³Sukum ngi Zozefey tuwa, a cifam a mbuŋ naŋ vur mijingaˀ vur mijingaˀ hã a vi tuboˀ taŋ. A puram vu a vi hiri a vi hiri, ngirkik ngirkik.

³⁴Zozef a ɓi ɓa a zuɓaka taŋ gwat ngi zum ngi mbuŋ naŋ. Amma ɗaf ngi Benjameŋ a wursluka ngi mekelemey gar is zlum. A saka mbaazla bummoˀ, hã a wam di.