Read South Giziga GEN 44 Bible Online

GEN 44 - South Giziga bible

GEN 44

¹Zozef a ɓa mbur miji kaw naŋ na: «Nahaka kayawa ngi mizli tayna ti daw, weˀe avu taŋ maram di gu, ka dala ngi mburo gar ɓaˀ a hirnga daw a hur kayawa.

²Ki sa ka sikiɗ ɗu ngi ɓiri bara waɗ dala ngi dawa ɓaˀ a hur gabal ngi tuboˀ taŋ, a hirnga dawa.» Mbur miji kaw naŋ tuwa, a ga kaɓa Zozef miɓaŋ di.

³Li muwun wehhe si na, a pulaka ziri ngi Zakopoy, a cohom ati zungu taŋhaya.

⁴A pulaka walahaya le, taŋ kileŋ wãˀ t'aruŋ, Zozef a ɓa mbur miji kaw naŋ: «Slikiɗi! Kil asi mizli tayna, ja taŋ is, ɓa taŋ: Ki maka mezle ti malambaˀ vur mike?

⁵Sikiɗ ngi si gwat ati ngi pura njol ngi buy ɗu anta avu kum aka takwa? ki gam hana i haŋ naŋ ta.»

⁶Mbur miji kaw, a ja taŋ is, a ɓa taŋ mingiɓi hana.

⁷Taŋ a mbiɗakaŋ di: «Buy ɗu, ki ɓa ɓi misi kahana mbri mbrike? Da ndra gawla ɗikey i gaka gwat misi kahana le na, naɓa i gam di i malambaˀ muwãˀ naŋ!

⁸Dala ndra mulumaka taŋ a hirnga daw a hur kayawa ndrahay na, i mukuw taŋ ti ruwuy Kanaˀana takwa? I huloko dala malla ɓiri tapasl tapasl a hay buy ɗike mbri mbrike?

⁹Gawla ɗik, mulumaka gwat nah le ava na, a kiɗaka vagay! Ndra vuna i tiram beke ngi buy ɗu.»

¹⁰Mbur tuwa, a ɓi: «Naŋ kuy, anja a gi ka kum miɓaka vuna si. Mbur ndra mulumaka sikiɗe le ava na, a sa tiri beke ɗu, yo kumo ki bam le ar ɓi nah.»

¹¹Mbur gar a pi sar ti kayawa ngi daw naŋ kutum, mbur gar a puska nga naŋ nga naŋ.

¹²Mbur miji kaw a tutuma kayawahaya cek, a zla avu ngi madiɗa, a sa kiɗa mi naŋ a vi kayawa ngi mecedek taŋ, a lumaka sikiɗ ar kayawa ngi Benjameŋ.

¹³A sinaka a gam kini ta, a ngiraka zana taŋhaya, mbur gar a zuɓa kayawa nga duba zungu naŋ, a mam ng'ar walahay a muŋ.

¹⁴Zuda ati sukum naŋhay a ndilam a hay Zozefe, naɓa Zozefe naŋ da a hay aruŋ, a hurukom a mbuŋ naŋ.

¹⁵Zozef a ɓa taŋ na: «Ki gam hana i gwat mike? Mbur misi ka ya, naŋ ti kileŋ a hirnga na, ki sinaka takwa?»

¹⁶Zuda a mbiɗaŋ di: «I mbuɗokuw di gu makwa buy? I ɓam mbrike? Ɓa i ɓam na: i gam gwat ta kini kwa? I Buymisemuŋ minjika malambaˀ ngi gawla ɗikeye. Ndra wurenna i beke ɗikey, ndra vuna ati mbur mulumaka sikiɗ ava na gar.»

¹⁷Zozef a ɓi: «Ndiɗaˀ, a tiɓaŋ ɓa yi ga kanah ta. Mbur mulumaka sikiɗ ava na, masa tiri beke ɗu i naŋ, amma kumo, mam zuy zuy ng'avi cine kumo.»

¹⁸Zuda a kirih ng'avu Zozefe, a ɓaŋ: «Ambuh takwa buy ɗu! Puliy ya gawla ɗik i ɓuw ɓi purla, ki cine manja ki ji mevel araŋ! Asi kum purla ati buy madiɗa ngi Ezipte.

¹⁹Dumbuŋ zleˀe na, ki cufuɗa ndra gawla ɗikeye: Cine kum ada kwa? Sukum kum mekelem ada kwa?

²⁰Ndr'i mbuɗokuw di: Midigila cine ndra ada, waɗ mangal mitaŋŋa naŋ miya ar midigila naŋ. Sukum naŋ a muc le, a ndir pal naŋ a haŋ mumuŋ, yo cine a wuɗaŋ haɗi.

²¹Dar ki ɓa ndra gawla ɗikeye: Sikiy ti mangal nah ɓa yi pura ti hiri ɗu.

²²I mbuɗow di na, buy: Mangal nah anta a pula cine gu ta, da a pulaŋ le na, cine a sa mucu.

²³Dar ki ɓa gawla ɗikeye: Da sukum kum meciɗek na, a sawa asi kum ta na, ko y'anta sa tuɓukum a mbuŋ ɗu aka mata ndiɗaˀ wãˀ.

²⁴Ndr'i mam ng'avi gawla ɗik cine ndra, i ɓakaŋ ɓi ɗike so buy.

²⁵Cine ndra a ɓi na: Mam, ara hiɗikoko ndra gwat ngi zum.

²⁶I mbiɗakaŋ di: I mam gu ta, sey da tuboˀ ndra na, naŋ da asi ndra far, naɓa i mam, da sukum ndra tuboˀo naŋ anta asi ndra ta na, anta sa tiɓam ndra a mbuŋ mbur nah mata.»

²⁷Dar cine ndra gawla ɗike, a ɓa ndra so na: Ki sinaka le, ngwas ɗu Rasel a yiy ziri mizilehey cuw tewle.

²⁸Pala naŋ anta, yi ɓi: ko mbri gwat ngi ɓuhoy a puwaka le, yi pura hiri nah ɗaˀ mata.

²⁹Ani ki wuɗam na, ɓa ki purtaka hana ma kwa? Da gwat ngi mendere a lumaŋ le na, malambaˀ kum a sa giy bonoy, hã a ziziy hutuŋ da ya mbur midigila.

³⁰Buy ɗu, da ya gawla ɗike, i ndil le wurenna a hay baha, manja mangal hana asi ndra na, pumbus taŋ a zliram le ati naŋ haɗa wãˀa.

³¹Naŋ mupura le, naŋ anta si na, a sa mucu. Naɓa malambaˀ ngi ndra gawla ɗikey, a ziza hutuŋ ngi midigila cine ndra gawla ɗike le.

³²Yo ma na, si na sin le, yi zuɓa zayɓi ngi mangal hana le a mbuŋ baha nga hirnga ɗu, yi ɓaŋ: Da yi mo di ta na, yi sa ndir ti malambaˀ caˀa a mbuŋ ɗike?

³³Ambuh! Puliy ya gawla ɗik i ndir yi beke ar li ngi mangala buy! Anja a mam ati sukum naŋhaya!

³⁴I sa ru mbri ng'avi baha manja mangal hana, aru asi ya ka? Bonoy baha masa sa na, anja yi pura ta.»