Read South Giziga GEN 45 Bible Online

GEN 45 - South Giziga bible

GEN 45

¹Zozefe, gwat magaŋ bonoy a mevele na, a ɓusa a mbuŋ mizli mi deŋ deŋ a cikeˀe na gu mata. A ɓi: «Bam ti mizli ɗuwoyo gar ng'avra.» Naŋ misa njika vu naŋ da sukum naŋhay na, ko mbur pal anta mata.

²A tuwuy kaɗam kaɗam, hã Eziptehey a cinam, ko a hay buy madiɗa ngi Ezipte kwana, ɓi nah a cin le.

³Zozef a ɓa sukum naŋhaya: «I ya Zozef, Baha naŋ da ti siifa aruŋ kwa?» Amma sukum naŋhay a mbiɗakaŋ di gu ta, asi ara jijikam haɗa a mbuŋ naŋ.

⁴Zozef a ɓa sukum naŋhaya: Kurohoko ng'avi ya. A kiraham ng'ava. A ɓa taŋ: «Yi Zozef sukum kum, kum mihiɗikiy ɓa a cohoko ti ya nga Ezipte tuwa.

⁵Amma wurenna, anja a muɗukum didak ta, ki likaka kum mihiɗikiy ng'aka na ta, asi i Buymisemuŋ mislino ya daf dumbuŋ ar kumo, ɓa i luhukum hutuŋ.

⁶Naŋ kine, may migi na, i vi mucuw naŋ asi ruwuyo, yo a ndir vi zlum aruŋ, huf anta, gi sifi ngi gwat anta.

⁷Buymisemuŋ mislino ya a mbuŋ kumo, ɓa i wukum vu ti gwat ngi zum asi ruwuyo, ɓa i luhukum hukum, ɓa mizli haɗa asi kumo, a laham avu maya.

⁸I kum mislinoko ya ng'aka ta, amma i Buymisemuŋ. A cikiy le kaɓa yi cine ngi buy madiɗa ngi Ezipte, buy ngi hay naŋ gar, yo a cifiy le miwi hirwuy Ezipte kurzluˀ gar.

⁹Wusam vu, mam ng'avi baha, ara ɓakaŋ: «Zozef mangal ɗike, a ɓuw na: Buymisemuŋ a cifiy le, yi buy miwi Ezipte kurzluˀ gar, ki zum vu ta, so ng'avi ya kutum.

¹⁰Ki sa cifi kini tir vay Goseŋ, gweˀ avu ya, ka ati ziri ɗikey waɗ dideˀ ɗikeye, tumuŋ ati ˀaw ɗikey, slahay ati gwat ɗikeye gar.

¹¹I sa vuluw gwat ngi zumo nga diga, ɓa ki ngir, ɓa gwat a kicuw ta, ka ati hay ɗik waɗ mizli ɗikey gar, asi may a ndir vi zlum aruŋ.»

¹²Zozef a ɓa taŋ ma: «Ki ra puraka ti hiri kum, sukum ɗu Benjameŋ kwana, ara pura ti hiri naŋ ya, maɓukum na, i ya ti hirnga ɗu.

¹³Yi mbur mupuɗaw haɗi a Ezipte, ara slufaka cek da baha, waɗ gwat kum mupuraka ti hiri kumo ma, wusam vu ɓa ki soko ti baha ng'aka.»

¹⁴A ja sukum naŋ Benjameŋ gizliliw asi ˀaya ti tuwuy, joˀ Benjameŋ a tuwuy aya.

¹⁵A ja sukum naŋhaya gar kuɓuy kuɓuy ti tuwuy, dar sukum naŋhay, a zlaka ɓi ɓi ati naŋ.

¹⁶Ɓi ngi Zozef a cin sesẽŋ a hay buy madiɗa ngi Ezipte, a ɓam: «Sukum naŋhay a ndiloko le!» Buy madiɗa ngi Ezipte ati gawla naŋhay a puraka kuy haɗi.

¹⁷Joˀ buy madiɗa ngi Ezipte a ɓa Zozefe na: «Ɓa sukum ɗikeye, ɓa a juwaka zungu taŋhaya, a ram nga ruwuy Kanaˀana.

¹⁸Yo zuɓoko cine kumo ati mizli ngi hay kumoyo, soko ng'avi ya aka, yi sa vulukum li mezleŋ asi ruwuy Ezipte, kisa zumaka gwat mimezle ngi raŋ.»

¹⁹Ka kwana, ɓa taŋ na: «Hilam mota ngi pilisey angi hirwuy Ezipte aka, ngi hilo ziri kumoy ati ngwas kumoy, ara zuɓoko cine kumo, moko,

²⁰anja ki likaka gwat kum masa puloko di a diga ta, asi gwat mimezle ngisi ruwuy Ezipte gar na, a sa ndir da kum.»

²¹Ziri ngi Zakopoy a gaka kaɓa miɓaka taŋ di: Zozef a vula taŋ mota ngi piliseye kaɓa buy madiɗa ngi Ezipte mupulaŋ jiviɗ nah, waɗ gwat ngi zum a jiviɗe.

²²A vula taŋ zana pal pal ngi sa mbiɗa ngi vu vu taŋhaya, amma a vula Benjameŋ suloy skat makir waɗ zana zlum.

²³Da cine kwana, vur mulak naŋ masa zuɓo di na, a slinaŋ ti gwat mimezle ngisi ruwuy Ezipte, gawla zungu kuruˀ, waɗ madiya zungu kuruˀ ti daw, ɗaf waɗ gwat ngi zum mekelemey ma.

²⁴Dar a pula jiviɗ da sukum naŋhaya, a ɓa taŋ: «Ki tiram a jiviɗe ta.»

²⁵A slikiɗam baɗ a Ezipte, ara ndilam avu cine taŋ Zakop a Kanaˀana,

²⁶a ɓakaŋ: «Zozef tuwa naŋ da ar siifa, miwa Ezipte gar i naŋ!» Amma a ca Zakopo neˀ ta, asi a tiɓa ɓi taŋ ta.

²⁷Dar a slufakaŋ ɓi ngi Zozef miɓa taŋ di na gar. Keɗ ma na, mota ngi pilisey, Zozef mislina taŋ ngi hil naŋ na ma, dar a wunaŋ lesl akẽh.

²⁸Mangal ɗu Zozefe naŋ ti siifa na, muk si, i wuɗ i ru, i sa muc tikeˀe na, i pura le.