Read South Giziga GEN 46 Bible Online

GEN 46 - South Giziga bible

GEN 46

¹Zakop a zuɓ jiviɗ ti gwat naŋ misi ti naŋ gar. Naŋ mindil a Berseba na, a gi mikuli da Buymisemuŋ ngi cine naŋ Izaka.

²Ngi duvuɗo, Buymisemuŋ a biga vu da Zakop ar musuwun, a zilaŋ «Zakop, Zakop.» Zakop a zilaŋ mi: «Y'ani.»

³Buymisemuŋ a ɓaŋ na: «I ya Buymisemuŋ ngi bunuku. Ki zluwun ngi ru nga Ezipte ta, i sa tiri ti ka sukwi madiɗa a diga.

⁴Ya, i sa ru ati ka nga Ezipte, yo masa mo ti ka ti Ezipte i ya ma. Ka masa muc na, masa tiɗuw haŋ a hiri, i Zozefe.»

⁵Zakop a pula Berseba. Zir naŋhay a zuɓaka cine taŋ Zakopo, ziri taŋhay waɗ ngwas taŋhaya ti mota ngi pilisey buy madiɗa ngi Ezipte mislino taŋ ngi hil taŋ tuwaŋ.

⁶A ram ti ginew taŋhay ati zlili taŋ mulumaka taŋ angi hirwuy Kanaˀan gar. Ti Zakop a ndilam a Ezipte ati mizli ngi hay naŋhaya gar,

⁷ziri naŋ mizilehey ati dideˀ naŋ mizilehey, ziri naŋ mongosohoy ati dideˀ naŋ mongosohoy. Aru ti mizli muboko ti vaˀa gar nga Ezipte.

⁸Israyeley musoko nga Ezipte na, slimiɗ taŋhay ani: i ti Zakop ati ziri naŋhay. Modogom ngi Zakop, i Ruben.

⁹Ziri ngi Rubeney i ti: Hanok, Pallu, Hesroŋ waɗ Karmi.

¹⁰Ziri ngi Simeyoŋhoy i ti: Yemuyel, Yakin, Sohay waɗ Sawul, mangal ngi zuŋ Kanaˀan.

¹¹Ziri ngi Levihey i ti: Gersoŋ, Kehat waɗ Merari.

¹²Ziri ngi Zudahay i ti: Sela, Peres waɗ Zera. Er ati Onaŋ a micam a ruwuy Kanaˀan. Ziri ngi Perizihey i ti: Hesroŋ ati Hamul.

¹³Ziri ngi Isakaray i ti: Tola, Puva, Yasup waɗ Simroŋ.

¹⁴Ziri ngi Zabuloŋhoy i ti: Seret, Eloŋ waɗ Yaleˀel.

¹⁵Hanayna i ziri ngi Leyahay miya taŋ ti Zakop angi hirwuy Mezopotami, waɗ Dina zuŋ naŋ mongoso. Ziri naŋ mizilehey ati mongosohoy a gam jom gar na, mizli kukur makir ti makir.

¹⁶Ziri ngi Gatay i ti: Sifiyoŋ, Hagi, Suni, Esboŋ, Eri, Arodi waɗ Areli.

¹⁷Ziri ngi Aserey i ti: Yimma, Iseva, Isevi ati Beriya waɗ Sera sukum taŋ mongoso. Ziri ngi Beriyahay i ti: Heber ati malkiyel.

¹⁸Hanayna, i ziri ati dideˀ ngi Zilpahay, Zilpa i beke ngi Leya, cine naŋ Labaŋ muvulaŋ di, ɓa a yi ziri da Zakop: Taŋ kuruˀ nga merkeɗe.

¹⁹Ziri ngi Rasel, ngwas ngi Zakopo i ti: Zozef ati Benjameŋ.

²⁰Asnat ngwas ngi Zozef, zuŋ ngi Potifera, masay ngir walahay On, a ya ziri mizileheye le cuw da Zozef angi hirwuy Ezipte, i ti: Manase ati Efrayim.

²¹Benjameŋhey i ti: Bela, Beker, Asebel, Gera, Nahamaŋ, Ehi, Rok, Hupim, Mupim waɗ Arde.

²²Hanayna i dideˀ ati ziri Raseley miya taŋ ti Zakop, a gam jom gar na, mizli kuruˀ nga mufaɗa.

²³Mangal ngi Daŋ i Husim.

²⁴Ziri ngi Neftalihey i ti: Yasiyel, Guni, Yeser waɗ Silem.

²⁵Hanayna i dideˀ ati ziri ngi Bilahay, Bila i beke ngi Rasel, cine naŋ Labaŋ muvulaŋ di ɓa a yi ziri da Zakop. Taŋ jom gar na, mizli tarnaˀa.

²⁶Mizli ngi hay Zakopoy, mikwanay naŋhay miram nga Ezipte ati naŋ na, a gam jom gar na, mizli kukur merkeɗ nga merkeɗ, mbak ngwas ngi ziri naŋhaya le.

²⁷Ziri mizilehey Zozef miya taŋ a Ezipte kwana, taŋ cuw. Mizli ngi hay Zakopoy miram nga Ezipte, a gam jom gar na, mizli kukur tarnaˀ.

²⁸Akẽh na, Zakop a slina Zuda a mbuŋ naŋ ng'avi Zozefe, ɓa aru dumbuŋ nga hirwy Goseŋ. Ti taŋ mindilam a Goseŋ na,

²⁹Zozef a juwa mota ngi pilis naŋ, aru nga Goseŋ, nga pura cine naŋ. Naŋ mupura keɗ si na, a ja kuɓuy, naŋ da ti naŋ kuɓuy, a tuwuy, a tuwuy.

³⁰Zakop a ɓaŋ na: «Wurenna, a dirba ya mupura hiri ɗik muduba na, ko da i muc kwa na jam, asi k'ada ti siifa aruŋ.»

³¹Zozef a ɓa sukum naŋhay ati mizli ngi hay cineheye na: «I ra ɓa ɗaˀ le da buy madiɗa ngi Ezipte, i ra ɓaŋ na: «Sukum ɗuwoy ati mizli ngi hay bahahay misi zleˀe angi hirwuy Kanaˀana, a soko le ng'avi ya.

³²I mizli mijiginey, taŋ zlezle ti ginew taŋhaya taˀa. A soko ti tumuŋhoy, ˀaway ati sla taŋhay a haŋ, waɗ gwat taŋhay gar.

³³Yo da buy madiɗa ngi Ezipte misa zulukum le, da a cufuɗukum le: «Slra kum i mike» na,

³⁴kisa ɓakaŋ: Ndra gawla ɗikey i mijigina ginewey diga ti zuŋ hã wurenna, ndr'i mijiginey kaɓa dideˀ ndrahay zleˀe. Naɓa kisa cifam a Goseŋ, asi mijigina ginew gar na, Eziptehey a hirsakaŋ.»