Read South Giziga GEN 48 Bible Online

GEN 48 - South Giziga bible

GEN 48

¹A dirba gwat tayna migam na, a ɓaka Zozefe: «Bunuko naŋ gu ta.» Zozef a hila ziri naŋ mizilehey mucuw tuwa, Manase ati Efrayime, aru taŋ a haŋ.

²A faka ɓi nah da Zakop, a ɓakaŋ: «Pura mangal ɗik Zozefe, ara sawa nga puruw.» Zakop a tum vu, a slikiɗ joˀ ti a mi arngawo naŋ.

³A ɓa Zozefe na: «Buymisemuŋ, misi gidaŋ wãˀa, a bigiy vu le a Luz, a hirwuy Kanaˀana. A ɗuwuliy mi le,

⁴a ɓiy na: ‹I sa ga ɓa ki yi haɗi, ki sikam, ɓa i ɗuv ti ka sukwi ngi mizli taˀ taˀ mbeˀ mbeˀ. I sa vula hirwuy hana da dideˀ ɗikey, ɓa a ndir wãˀ da taŋ a dirba ɗike.›»

⁵Yo wurenna, ziri ɗik mizilehey mucuw, muyukuw taŋ a Ezipte aka, ti ya muso t'aruŋ na, taŋ i ziri ɗuwoy. Efrayim ati Manase a sa ndiram da ya, kaɓa ti Ruben ati Simeyoŋ na ya.

⁶Amma ziri ka masa ya taŋ a dirba taŋ na, a sa ndiram da ka, yo a sa lumam gwat ngi zuma haya tisi sukum taŋ madiɗahay.

⁷Naŋ kine, ti ya masawa ti Mezopotami na, Rasel a muc avu ya, a jiviɗ ngi Kanaˀan, gweˀ ngi ndila Efrata. I dika a ciki jiviɗ ngi Efrata a diga. A zilaka Efrata wurenna Betelyem.

⁸Ti Zakop mupura ziri ngi Zozefeye keɗ na, a cufuɗaŋ: «Hanayna i waniy ka?»

⁹Zozef a mbiɗa da cine: «I ziri Buymisemuŋ muvuliy taŋ a Ezipte aka.» Israyel a mbiɗaŋ di: «Kirihiy taŋ ng'avi ya aka ɓa i ɗuwula taŋ mi.»

¹⁰Zakop a gi gal le, naŋ anta pur gu mata. Zozef mikirahaŋ ziri tuwa na, a ja taŋ gumbuˀ gumbuˀ, gidaŋ gidaŋ.

¹¹Dar a ɓa Zozefe: «Yi wuluk zleˀe ɗaˀ ɓa ngi pura hiri ɗike ta, ani Buymisemuŋ a ga le ɓa hã i pura ziri ɗikeye ma!»

¹²Zozef a hila taŋ tir sar ngi cine avra, a huruk huruk a mbuŋ naŋ.

¹³Zozef a ja ziri naŋhay tuwa kaw kaw avu haŋ, Efrayime tir hazum naŋ, avu Zakopo naŋ tir gula naŋ, yo Manase naŋ tir gula naŋ, avu Zakopo naŋ tir hazum naŋ. A kirahaŋ taŋ.

¹⁴Zakop a murɗo haŋ, a kiluwa taŋ kilaw, a buca haŋ hazumo nga hirnga Efrayim mangal meciɗeke, waɗ haŋ gula bac nga hirnga Manase, Manase i modogom ngbaŋ.

¹⁵A ɗuwula mi da Zozefe, a ɓaŋ: «I ra ga ambuh da Buymisemuŋ ngi dideˀ ɗu Abraham ati ngi baha ɗu Izak mindiram a mbuŋ naŋ na, Buymisemuŋ i mijigin ɗu diga taŋ miyikiy hã dana.

¹⁶Modro ngi Buymisemuŋ milihiy avu mungrahay gar na, anja a ɗuwula mi da ziri mizile hanana, anja slimiɗ ɗu a zil, slimiɗ ngi dideˀ ɗu Abraham ati ngi baha Izak, a zilam mbele ziri hanayna, yo anja a jam kweslekwesle asi ruwuy hana.»

¹⁷Zozef a pura na, cine a buca haŋ hazumo nga hirnga Efrayim, a ciraŋ hiri ta. A ja haŋ ngi cine misi a hirnga Efrayim tuwa, ɓa a mbiɗa nga hirnga Manase.

¹⁸A ɓa cine: «Kanah ta baha, modogomo i hana. Buca haŋ hazumo nga hirnga naŋ.»

¹⁹Amma cine a ngum ta, a ɓaŋ: «I si na le mangal ɗu. Yi wuɗ anja naŋ vuna kwana, a ɗuv sukwi ngi mizli taˀ, a gi madiɗa ya. Na dambalaka sukum naŋ meciɗek na, a sa gi madiɗa fineˀ naŋ, dideˀ naŋhay a sa ɗuvam sukwi ngi mizli taˀtaˀ mbeˀ mbeˀe.»

²⁰A ɗuwula taŋ mi tapasa, a ɓa taŋ: «Israyeley a sa ɗuwulam mi ti slimiɗ kumo, a ɓam: Anja Buymisemuŋ a gi ti ka, kaɓa naŋ migi ti Efrayim ati Manase!» Zakop a vula slimiɗ ngi Efrayime dumbuŋ angi Manase.

²¹Zakop a ɓa Zozefe: «Yi wuɗ i mucu, amma Buymisemuŋ a sa ndir ati kum, yo a sa mo ti kum nga hirwuy ngi dideˀ kumoy a muŋ.

²²Ya, yi vuluw hirwuy Sikem, hirwuy mifineˀ ngi sukum ɗikey mazumaka, hirwuy ya mitiɓa avu Amorihey ti maslalam waɗ gulum.»