Read South Giziga GEN 50 Bible Online

GEN 50 - South Giziga bible

GEN 50

¹Zozef a diɗ ng'ar vagay ngi cine, a bunaŋ ti tuwuy, yo a jaŋ kusom.

²Dar a ɓa mizli naŋhay misina slalakaya, ɓa a fukuɗaka vagay ngi cine ti urdi. Misina slalakay a fukuɗaka vagay ngi Zakopo.

³A gam hin kukur mufaɗ kaslsla mafukuɗam di vagay ngi mbur. Eziptehey a tuwakaŋ hin kukur tarnaˀa.

⁴Hin ngi vagay tuwa mikiɗ mi muduba na, Zozef a ɓa mizli ngi hay buy madiɗa ngi Ezipteheye: «Da kum ada ki wuɗikiy na, ambuh kum, ara ɓaka buy madiɗa ngi Ezipte na:

⁵‹Baha a hudumiy le zleˀe, a ɓiy: Y'ani i wuɗ i mucu. Ki sa ra dikikiy ar vigiɗ ya mila da ya, a hirwuy Kanaˀan. Yi wuɗ wurenna, i ra dika baha, a dirba nah, i sa mawa.›»

⁶Buy Ezipte a mbiɗaŋ di: «A ra dika bunuko kaɓa naŋ muhudumuw na.»

⁷Joˀ Zozef aru nga dika cine. Gawla ngi buy Eziptehey gar, mizli micawwa ngi hay naŋhay ati mizli micawwa ngi ruwuy Ezipte gar, a ram bummoˀ ati naŋ,

⁸waɗ mizli ngi hay Zozefey gar, sukum naŋhay ati mizli ngi hay cineheye. A pulam a ruwuy Goseŋ sey ziri taŋhay, tumuŋhoy, ˀaway waɗ slahay.

⁹Misi mota ngi pilisey waɗ misi pilisey a ram aseˀeŋ. I zigiduw taˀ kuy kuy wãˀ.

¹⁰A ndilam ar papala, a Mǝlaŋ ngi ruwuy Goreŋ-Ataɗ, ti dubazaw Zurdeŋ. A gaka mezegwel ngi dika vu hiliɓ hiliɓ, a zli ta wãˀ. Zozef a tuwa vagay ngi cine hin tarnaˀ.

¹¹Mizli Kanaˀanay misi angi hirwuy nah, taŋ micinaka tuwuy taŋ ar papala angi hirwuy Goreŋ-Atat na, a ɓam: «Vagay hana, ara ga bonoy kuyta wãˀ da Ezipteheye!» A caka slimiɗ da li ngi dubazaw Zurdeŋ nah: ‹Abel- Misrayim›, a mbiɗiˀvra ‹tuwuy ngi Ezipte!›

¹²Ziri ngi Zakopoy, a gaka gwata kaɓa cine taŋ miɓa taŋ di.

¹³A zuɓaka vagay ngi cine taŋ nga hirwuy Kanaˀan, a dikakaŋ angi butum ngir guva ngi Makpela, Abraham mi hiɗika avu Efroŋ mbur Hiti, ɓa a ndir i vigiɗ nga naŋ wãˀ ngi dika vu, naŋ gweˀ avu Mamre.

¹⁴Zozefe, a dirba naŋ midika cine na, a mawa nga Ezipte, naŋ ati sukum naŋhay waɗ mizli miram bummoˀ ati naŋ nga dika cine.

¹⁵Sukum ngi Zozefey a puraka na, cine taŋ a muc le, a ɓam ar wala taŋ na: «Da ani Zozefe a ɓi le a gi ti ndra mesene, yo ɓa a pula cuwal ngi malambaˀ ndra migakaŋ di na, mbrike?»

¹⁶A slinam ng'avi Zozefe, a ɓakaŋ: «Ti bunuk mawuɗ a muc na, a ɓi:

¹⁷‹Ki sa ɓaka Zozefe na: ambuh, malambaˀ ati mungra sukum ɗikey mugukuw di gar na, pula teˀe.›» A gukuw malambaˀ le gisiŋ ɓula, amma wurenna ambuh ndr'i gawla ngi Buymisemuŋhoy, Buymisemuŋ ngi bunuku, pula mungra taŋ mugukuw di na teˀe. Ti taŋ maɓakaŋ kahana na, Zozef a tuwuy.

¹⁸Dar sukum naŋhay a ram ti haŋ taŋ, a hurukom a mbuŋ naŋ, a ɓakaŋ: «Ndr'ani, ndra beke ɗikeye!»

¹⁹Zozef a mbiɗa taŋ di: «Ki zluwunam neˀ ta, yi ci ar li ngi Buymisemuŋ gu kwa?

²⁰Kumo, ki wuɗam le zleˀe, ɓa ki gikiy malambaˀa, amma Buymisemuŋ a mbiɗa, a tiri di ɓi mezleŋ: a wuɗ na, ɓa ngi laha siifa ngi mizli haɗi, kaɓa kum mapuraka dana ani na.

²¹Zle dana na, ki zluwunam ta, i sa vulukum gwat ɓa ki ngiram di, kum ati ziri kumoyo.» A vula taŋ gidaŋ ti mingiɓi ngisi mevel taŋ.

²²Zozef a cifi ti hay naŋ a Ezipte, naŋ ati mizli ngi hay cineheye. Zozef a gi vi skat ti kuruˀu.

²³A pura ziri ngi Efrayimeye, dideˀ dideˀ hã makir. Wãˀ naŋ ma na, ziri ngi Makirey, mangal ngi Manase, a yam hã a cifa taŋ ar sar naŋ.

²⁴Ngi pas mekeleme, Zozef a ɓa sukum naŋhaya na: «Yi wuɗ i mucu. Buymisemuŋ a sa cik vu ar kumo, a sa bi ti kum tisi ruwuy misenna, nga ruwuy naŋ miɓa ɗaˀ le da Abraham, da Izak waɗ Zakop na.»

²⁵Dar Zozef a ɓa taŋ, ɓa a hudumom a mbuŋ naŋ: «Tapas Buymisemuŋ masa cik vu a hirnga kum na, kisa ram ti tesl ɗuwoy a haŋ.»

²⁶Zozef a muc ti vi skat ti kuruˀu. A fukuɗaka vagay naŋ ti urdi, a kaka ar akoti ngi dika vu angi hirwuy Ezipte.