Read South Giziga GEN 7 Bible Online

GEN 7 - South Giziga bible

GEN 7

¹Bumbulvuŋ a ɓa Nowe na: «Ci ng'ar palalama, ka ati mizli ngi hay ɗikey gar. Asi yi pura na, a wuzla mizli migwenehey na, mijeŋŋe a mbuŋ ɗu, i ka pal ɗiki.

²A wuzla gwat misãmihey gar ngi gi mikuli da ya Buymisemuŋ, hil vur sukwi gar na, cuw cuw tarnaˀ, mizile zlaɓ ati mongoso, zlaɓ ati mongoso. Amma a wuzla gwat misããmihey magam taŋ mikuli ta na, hil cuw cuw vur sukwi taŋ, mizile zlaɓ ati mongoso, zlaɓ ati mongoso tewle.

³Ɗiyuwoy kwana, hil zlaɓ ati mongoso, zlaɓ ati mongoso vur sukwi gar cuw cuw tarnaˀ, mizile zlaɓ ati mongoso, zlaɓ ati mongoso, ɓa sukwi taŋ a ji nga mbuŋ nga mbuŋ asi ruwuy gar.

⁴Asi a ndir hin tarnaˀ, ɓa i sa go vuŋ a ruwuyo, a sa zik papas papas kukur mufaɗ, duvuɗ duvuɗ kukur mufaɗ, gwat misi titirihey ya miga taŋ gar na, i sa ngizla taŋ leɗeɗ gar asi ruwuyo.»

⁵Ɓi Bumbulvuŋ miɓa ɗaˀ le da Nowe ɓa a ga gar na, a ga le kasl kasl kanah.

⁶Ti mekepel madiɗa misirta hirwuy gar na, naɓa Nowe naŋ ti vi skat skat merkeɗe.

⁷Nowe a cam palalam ati ziri naŋhay, ngwas naŋ waɗ ngwas ngi ziri naŋhay, ɓa a laham a wuzla mekepel madiɗa na.

⁸Gwat misãmihey ngi gi mikuli ati ngi gi mikuli ta, ɗiyuwoy waɗ gwat memeɗe mikirnini ngisi ruwuyoy gar na,

⁹a soko gar ng'avi Nowe a hur palalama cuw cuw, mizile zlaɓ ati mongoso, mizile zlaɓ ati mongoso, kaɓa Buymisemuŋ miɓa ɗaˀ le.

¹⁰Angi hin tarnaˀ na, mekepel madiɗa a sirta hirwuyo le gar.

¹¹Ti Nowe mindila vi skat skat merkeɗ, hin kuruˀ nga tarnaˀ ngi kiya mucuw naŋ na, miviɗiviɗi ngi yam mijileŋhey a nduzom, mifiliw ngir birngiŋ ngi muŋhoy a wunam biɗiŋ biɗiŋ.

¹²Vuŋ a gi a ruwuyo hã a zik papas papas kukur mufaɗ, yo duvuɗ duvuɗ kukur mufaɗ.

¹³Nowe micam ng'ar palalam ati ziri naŋhay na, i tapas nah vuna. Taŋ: Sem, Kam, Zafet waɗ ngwas naŋ ati ngwas ngi ziri naŋhay makir taŋ,

¹⁴waɗ sukwi ngi gwat misi titiri ngi ɓuhoy ati ginewey, gwat memeɗehey mikirnini a ruwuy, sukwi ngi ɗiyuwoy gar, gwat maslikiɗ ati gwat misi zlara gar.

¹⁵Gwat misi titiri mamusuwunamay gar a soko zlaɓ cuw zlaɓ cuw ng'avi Nowe a hur palalama.

¹⁶Sukwi ngi gwat misããmi gar, a cam palalama, mizile zlaɓ ati mongoso, mizile zlaɓ ati mongoso, kaɓa Buymisemuŋ miɓa ɗaˀ le da Nowe tuwa. Dar Bumbulvuŋ a gica miviŋ ngi palalam a hirnga Nowe.

¹⁷Mekepel madiɗa a zuɓ asi ruwuyo, a zik hin kukur mufaɗa. Yam a zuɓ, a slikiɗa palalama njiraŋ avu hirwuyo, aro capap a hirnga yama.

¹⁸Yam ara sik haɗi haɗi ti vendeke na si, ciɗak ciɗak asi ruwuyo, palalam ara liˀi sikikiki a hirnga yama.

¹⁹Yama ara zuɓ ti gidaŋ asi ruwuyo, a sirta muwã madiɗahaya sirit sirit wãˀ, si gazlavay kurzluˀ gar.

²⁰Yam a nda hirnga ngi muwãhaya yik yik fineˀ metir tarnaˀa.

²¹Gwat misi titiri mikirnini asi ruwuyo, a ngizlam leɗeɗ gar: ɗiyuwoy, ginewey, gwat misi titiri ngi ɓuhoy, gwat mislireɓ slireɓ malaˀam a ruwuy, waɗ mizli ma.

²²Gwat misi titiri mamusuwunamay a ruwuy mingbaŋngbaŋ gar na, a micam.

²³Bumbulvuŋ mingizla gwat misi titiri ngi ruwuyoy gar na, naŋ kahana. Zle avu mizli titrahay, gwat madiɗa misãmihey, mislireɓ slireɓey hã avu ɗiyuwoy. A ngizlam leɗeɗ wãˀ asi ruwuyo. Sey Nowe pal naŋ mindir waɗ mizli misi ati naŋhay bummoˀ a hur palalama.

²⁴Yam a ndir fin fin asi ruwuyo, a zik hin skat ti kukur zlum.