Read South Giziga GEN 9 Bible Online

GEN 9 - South Giziga bible

GEN 9

¹Buymisemuŋ a ɗuwula mi da Nowe ati ziri naŋ mizileheye: «Yam ziri, sikam, nahaka hirwuyo.

²Zle dana, gwat misi titiri ngisi ruwuy gar ati ɗiyuwoy gar na, a sa zluwunam ti kum. Gwat miwenewene ngi ruwuyoy gar, ati kilifey gar na, zle wurenna i pula taŋ asi haŋ kum.

³Gwat miwenewene misi titirihey gar, i gwat ngi zum kum, i vulukum taŋ gar kaɓa ya muvulukum gwat mutukuzohoy zleˀe na, i vulukum taŋ le gar.

⁴Amma gwat purla ani, ki zumaka ˀuse misi pumbus naŋ kine aruŋ ta, asi siifa naŋ ar pumbusu.

⁵Naŋ kine ya, pumbus kum i siifa kum, i sa cufuɗa zayɓi nah avu gwat misãmi, i sa cufuɗa zayɓi nah avu mburu. Ko wa gar mikiɗ mbur le vagay na, i sa cufuɗa siifa naŋ avu mbur mikiɗ naŋ vuna.

⁶Ko wa mipi pumbus ngi mbur le na, i mbur masa paŋ pumbus naŋ ya, asi ya Buymisemuŋ i ga mburo ɓaˀ i ya.

⁷Kumo so na, yam ziri, sikam haɗi, pam suɓulak asi ruwuyo, nahakaŋ.»

⁸Dar Buymisemuŋ a ɓa Nowe ati ziri naŋhaya na:

⁹«Ani i sa jumˀay ati kum waɗ ati dideˀ kumoy a dirba kumo,

¹⁰yo waɗ ati gwat misi titirihey misi ati kum gar, mbiɗeˀvra: ɗiyuwoy, ginewey ati gwat misãmi ngi ɓuhoy gar misi ati kum, gwatay gar muboko ati kum ti hur palalama.

¹¹I sa jumˀay ati kum ani: gwat misi titiri masa zizi ti mekepel madiɗa anta mata wãˀ, mekepel madiɗa anta sa gi ngi ngizla gwat ngisi ruwuyo mata.»

¹²Joˀ Buymisemuŋ a ɓi ma: «Kum ati gwat misi titirihey gar waɗ mizli gar masa ya ka taŋ nga mbuŋ na, gwat mabiga jumoˀay ɗu ati kum ani:

¹³I ɗuva lek ɗu le ar birngiŋ, i kwalay mogodonok hana masa biga jumoˀay ɗu ati hirwuyo.

¹⁴Ya misa ga gazlavay le lip lip a muŋ gar, yo da kwalay mogodonok mubo le gar na,

¹⁵i ro keŋŋe ti jumoˀay ɗu ati kum waɗ ati gwat misi titiri ko wanaka gar, naɓa yam anta sa zuɓ mekepel ngi ngizla gwat misi titiriheye mata wãˀ.

¹⁶I sa pura kwalay mogodonok masa bawa ar birngiŋ a muŋ, i sa wulka jumoˀay ɗu hã ngi set ati sukwi ngi gwat misi titirihey gar misi asi ruwuyo.»

¹⁷Joˀ Buymisemuŋ a mahiri naŋ da Nowe, a ɓaŋ: «Kwalay mogodonok i gwat masa biga jumoˀay ɗu ati gwat misi titiri gar misi asi ruwuyo.»

¹⁸Sem, Kam ati Zafet, i ziri ngi Nowehey muboko tir palalam. Kama, i cine ngi Kanaˀan.

¹⁹Mizli mihaɗi asi ruwuy na, a boko tivi ziri ngi Nowe mimakir hanayna.

²⁰Nowe i mbur mizla huf cikiɗeffe, a gi guva ngi gudubun.

²¹A si mbaazla ngi gudubun nah tuwa, a wi, a cuko zana, a ndir gulndiŋ kine, asi guɗuk naŋ.

²²Kam, cine ngi Kanaˀan, mupura cine mugulndiŋ kine tuwa na, ara ɓa da sukum naŋhay mucuw misi avra na.

²³Sem ati Zafete, a zuɓaka godo ngi Nowe vuna, a njiraka njar ar gagalaˀay taŋ cuw taŋ, a ram di murdirba murdirba, ara sirtaka da cine taŋ mugulndiŋ kine tuwa. Taŋ hiri taˀtaˀ ngir tumbuŋ taŋ, vur taŋ mapuraka cine taŋ mugulndiŋ kine na.

²⁴Ti Nowe mupuɗuk, mbaazla a wuyuh le muduba na, a cine ɓi ngi gwat mangal naŋ mijingaˀ ngi madiɗa migaŋ di tuwa le.

²⁵A zla a ɓi: «Kanaˀan, anja Buymisemuŋ a nisaŋ! Anja a tiri avu sukum naŋhaya, i beke ngi dirba wãˀ ngi sukum naŋhay!»

²⁶Joˀ a ɓi ma: «Sise da Bumbulvuŋ, Buymisemuŋ ngi Sem! Kanaˀan, anja ki tiri gawla ngi Sem!

²⁷Anja Buymisemuŋ a ga Zafete zloh, anja a cifi a hay Sem, Kanaˀan a gi gawla taŋ!»

²⁸A dirba mekepel madiɗa muzuɓ na, Nowe a gi vi skat skat makir ti kukur zlum ma.

²⁹Nowe a muc, naɓa naŋ ti vi skat skat ngoltir ti kukur zlum.