Read South Giziga 2SA 1 Bible Online

2SA 1 - South Giziga bible

2SA 1

¹Ti Davit muso cifi a Sikilak, a dirba naŋ mikiɗa Amalekey na, naɓa Sawul a muc le si. Davit a cifi a diga, a gi hin cuw.

²Ngi hin mimakir naŋ na, mbur gawla a so zle ar li Sawul mipi sar a diga, a ndilawa. Zana ngi vu vuhoy i mingirahay le ngar ngar, yo hirnga, muyuŋ limbirim. Naŋ mindilo ndil a ciki Davite na, a diɗ durus, a huruk huruk a mbuŋ Davite.

³Davit a cufuɗaŋ: «Ki so ti damaka?» Gawla a mbiɗaŋ di: «I loho tir li pi sar ngi Israyeley.»

⁴Davit a ɓaŋ: «Ɓi a cuh mbri a diga ka? Inga slufiy di.» Gawla tuwa, a ɓaŋ: «Soje Israyeley a kilam le tir li kiɗa vu. A kiɗam le haɗi asi soje ndraˀahaya. Ko Sawul ati mangal naŋ Zonataŋ kwana, a micam le.»

⁵Davit a cufuɗa gawla muso faŋ ɓi nah tuwa: «Sawul ati mangal naŋ Zonataŋ a micam le na, ki si na mbri mbrike?»

⁶Gawla tuwa, a mbiɗaŋ di: «Ya a muwã Gilboˀa gurjik kine, keɗ na, Sawulo, naŋ dilak ti ziwit naŋ. Mesene naŋ misi mota ngi vurumoy ati misi pilisey ngasl ngasl gweˀ a cikeˀe.

⁷A mbuɗo hiri pulaˀ na, a puriy. A ziliy ng'avaŋ, yo yi zilaŋ mi: ‹Y'ani!›

⁸A ɓiy na: ‹I ka waka?› Yi mbiɗaŋ di: ‹Yi mbur Amalek.›

⁹A ɓiy na: ‹Gurjoho nga ciki ɗu aka. Da ki ngum na, tikiy is wãˀ si, ko da y'ada musuwun a ruŋ kwana, lesl inga ya ta wãˀa.›

¹⁰Yi girjih nga a cikeˀe so, joˀ yi tikaŋ is wãˀ, vur mike na, a tikakaŋ ˀay le, yi si na le, naŋ anta sa ndir ti siifa ta. Naŋ kanah kumani, loppol ngi hirnga naŋ ati ɓalaŋ ngi hirbazla naŋ na, yi suw t'ani.»

¹¹Akẽh Davit a ja zana naŋhaya, a ngira taŋ. Mizli naŋhaya gar kwana, a gaka kanah ya.

¹²A tuwam, a gam dalyam, hã pastaˀa. Naŋ kahana taŋ mutuwaka vagay ngi Sawul, ngi Zonataŋ, ngi Israyeley waɗ ngi mizli ngi Bumbulvuŋhay mumicam ar vurumo.

¹³A dirba nah ma na, Davit a ɓa gawla muso faŋ ɓi ngi Sawul tuwa: «Ki so ti damaka?» Gawla a ɓaŋ: «Yi mangal ngi mbur Amalek, mbur moholoy misi ar walahay kum na.»

¹⁴Davit a ɓaŋ na: «Buymisemuŋ muwuna buyo le na, ki zuɓa haŋ mbri mbri, ki kiɗaŋ, ki zluwun ta naka?»

¹⁵Davit a zilo pal a wuzla gawla soje naŋhaya, a ɓaŋ: «Aru, kiɗa vagay.» Gawla soje ngi Davit a kiɗa mbur tuwa vagay.

¹⁶Davit a ɓa mbur Amalek tuwa: «Anja pumbus ɗik a mbiɗi nga hirnga ɗiki, asi ki ga kiita le da hirnga ɗik vuna tehhe a muŋ ti ka miɓi: ‹Buy Bumbulvuŋ muwunaŋ na, mi tikaŋ is wãˀ i ya.›»

¹⁷Akẽh na, Davit a zli dimis ngi tuwa Sawul waɗ mangal naŋ Zonataŋ.

¹⁸A zilaka «Dimis ngi lek.» I mutoho le ar ɗerewol ngi mbur mijeŋŋe. Ɓa ngi dubuna da ziri Zudahay. A zla, a ɓi anihĩ:

¹⁹Israyel, gambara ɗikey migi vurumoyo, a kiɗaka taŋ le, bugawla ɗikey a micam le ɓaˀ ɓaˀ a muwãˀ.

²⁰Ki tilam di mi ar walahay Gata ta, ki ɓaka haɗa haɗa a jiviɗ ngi Askaloŋhoyo ta. Vur ngwas Filistihey mamulom, anja ngwas ngi manja ci mizaway, a jiɗam mececẽleŋ ta.

²¹Muwã Gilboˀahaya, anja wulngar malla vuŋ a gi ar kumo ta, anja guva migi gwat a sirtukum mata. Asi mbaray ngi bugawlahay a jupam le ti ndileɓ, mbaray ngi Sawul anta sa gakaŋ mala mata ndiɗaˀ wãˀ.

²²A mbuŋ mesene ngi kiɗey, a mbuŋ mizli mazliram hiri ti ndra ta migidaŋhay ngi kiɗa vu, lek ngi Zonataŋ a didirik murdirba ta, maslalam ngi Sawul a mi ng'ar haya sufaˀ sufaˀ.

²³Sawul ati Zonataŋ, i yemehey, ti taŋ misi ar siifa, ko ar muc gar kwana, a wuɗkam ta. Taŋ wirwir fineˀ kurom, taŋ gidaŋ fineˀ moboroy.

²⁴Ngwas Israyeley, tuwaka Sawulo, Sawul makukum zana gagaza pilngiɗ pilngiɗ zleˀe, yo magukum gwat ngi wuyahay zleˀe, magukum gwat ngi wuya ngi ɓiri tapasl tapasl avu zana kumoy zleˀe tuwa.

²⁵Bugawlahay a ndilam le gizliv a wuzla kiɗa vu, Zonataŋ, a muc le ɓaˀ a muwã.

²⁶Zonataŋ, sukum ɗu, ɓi ɗik ara giriy haɗa a mevele. Yi wuɗ ka zleˀe haɗa. Gi ngama ndra ati ka na, naŋ kuy haɗa, hã a funa wuɗa ngwasa le.

²⁷Bugawlahay a ndilam le, gwat ngi vurumoy a zizam le.