Read South Giziga 2SA 11 Bible Online

2SA 11 - South Giziga bible

2SA 11

¹Ngi vi naŋ mekelem, hirak ti buyoy mabam nga gi vurum na, Davit a slina Zoˀap ati gawla naŋhay gar waɗ Israyeley gar. A kiɗam asi mizli Amoŋhoyo sunok sunok, yo a ndahaka walahay madiɗa Rabba. Davite, naŋ a cifi a Zeruzalem.

²Ngi pastaˀ naŋ mekelem ada na, Davit a slikiɗ tir li hin naŋ. Aru, ara liˀi a hirngi hay naŋ madiɗa. Naŋ misi a hirngi hay tuwa na, a puro ngwas ada, ara bun. Ngwas nah vuna, naŋ kuy teˀe.

³Davit a ɓi ɓa a cufuɗa ɓi ngi ngwas nah vuna, mizli a ɓakaŋ: «I Bat-Seba, zuŋ ngi Eliyam, ngwas ngi Uri, mbur Hiti.»

⁴Akẽh na, Davit a slin gawlahay, ɓa ara zuɓakaŋ di. Bat-Seba a so ngi hay Davite, joˀ Davit a hin di. Naɓa Bat-Seba a ga mezegwel ngi buna ngufo le wureˀ aruŋ. A dirba nah Bat-Seba a mi ngi hay naŋ a muŋ.

⁵Akẽh na, Bat-Seba tuwa, a gi hur. A slin ng'avu Davite, a ɓaŋ: «Yi gi hur le.»

⁶Davit a mur mata, a slin ng'avu Zoˀap, madiɗa ngi sojeheye, ɓa a ɓakaŋ: «Davit a ɓi: Sliniy Uri, mbur Hiti» na. Joˀ Zoˀap a slin ti Uri da Davite so.

⁷Uri a ndil a ciki buyo. Davit a cufuɗa jam ngi vu ngi Zoˀap ati ngi mizli, waɗ ɓi ngi vurumo.

⁸A dirba nah, Davit a ɓa Uri tuwa: «Aru ngi hay, ara fi himiɗ avu ngwas ɗike.» Uri a bi ti hay buyo, buy a slinaŋ ti gwatay ngataraŋ.

⁹Uri tuwa, ko aru ngi hay naŋ ta, amma a hinam ati gawla ngi buy naŋhaya gar a mizlingre buyo!

¹⁰Mizli a soko, a ɓaka buy Davite: «Uri tuwa, aru ngi hay naŋ ta.» Dar Davit a ɓa Uri tuwa: «Ki so ti mulak ta kwa? Ki ru ngi hay ɗike ta vur mike?»

¹¹Uri a mbiɗa da Davite: «Akoti ngi Buymisemuŋ, Israyeley waɗ Zudahaya, taŋ a roko ar guɗukoy. Buy ɗu Zoˀap ati gawla naŋhaya, ara hinam a ɓuh. Ya so na, ɓa yi ru ngi hay ɗu, i zum gwat, i si gwat, yo ɓa i hin ti ngwas ɗu sukwa! Hadam y'anta i ga kanah ta ndiɗaˀ.»

¹²Akẽh na, Davit a ɓa Uri tuwa: «Cifi dana aka ɗagay so, ɓa tiprik na, yi sa slinuw.» Tapasa Uri a cifi a Zeruzaleme waɗ ngi li naŋ muwuno ma.

¹³Davit a zilaŋ nga zuma gwat. Uri a zum, a si a mihiri ngi buyo. Davit a wa Uri wãˀ ti mbaazla. Ngi pastaˀa, Uri a bi, ara hin ar arngawo naŋ, waɗ gawla ngi buy naŋhaya, ko aru ngi hay naŋ ta.

¹⁴Ngi li naŋ muwun na, Davit a tuh letir da Zoˀap, a slin di Uri vuna.

¹⁵Davit a toho letire, a ɓi anga ani: «Cicaka Uri ar cinjih mudumbuŋ, ar li kiɗa vu mira bul vu wãˀ. A dirba nah, kiraham, pulakaŋ pal naŋ, ɓa mesene ndrahay a sa kiɗaka vagay.»

¹⁶Walahay, sojehey mindahaka hirnga naŋ zlar tuwa, Zoˀap ara jiginaŋ. Li naŋ misina i soje mesene gambarahay majiginaka na, a zuɓa Uri, a cica a diga.

¹⁷Mizli ngir walahay a boko, a zlaka kiɗa vu ati Zoˀapa. Vagay a ki le haɗa a wuzla mizli, yo waɗ a wuzla gawla ngi Daviteye. Yo Uri, mbur Hiti tuwa, a lum muc le ya.

¹⁸Gwatay mucohom ar kiɗa vu nah gar na, Zoˀap a slin ɓa ara ɓaka ɓi nah da Davite.

¹⁹Zoˀap a ɓa mbur naŋ mislinaŋ ani: «Ti ka misa sipa ɓi ngi kiɗa vu na le gar da buyo, a kiɗ mi le na,

²⁰buy a sa zla a zuɓ himaˀ, a sa ɓuw: ‹Ki kiraham gweˀ ng'avu walahaya zleˀe vur mi, ɓa ngi kiɗa vu ka? Mizli a sa muloko kum tir hirnga moholo na, ki sinaka zleˀe ta kwa?

²¹Abimelek, mangal ngi Yerubaˀal a Tebes na, mikiɗa vagay i waka? I ngwas mihizigo di ti ngurvuŋ ti hirnga moholo, hã a muc ta kwa? Ki kiraham gweˀ ng'avu moholo zleˀe vur mike?› Ka kisa mbiɗaŋ di: ‹Gawla ɗik Uri, mbur Hiti na kwana, a muc le aya.›»

²²Mislin a ru, ɓi Zoˀap miɓaŋ di gar na, ara sipa ɓi nah da Davite.

²³Mislin a ɓa Davite «Mizli tayna taŋ gidaŋ fineˀ ndra. A boko fuyõ ng'ar ndra a duba gala. Amma ndra, i nahaka taŋ hiri nah, i mam taŋ sesẽŋ a mizlingre ngi walahay taŋ.

²⁴Akẽh na, misi luvutoy a muloko gawla ɗikeye tir moholo. Vagay a ki le a wuzla gawla ɗikeye buy, yo gawla ɗik Uri, mbur Hiti na kwana, a lum muc le ya.»

²⁵Akẽh na, Davit a ɓa mbur mislin tuwa: «Ki sa ra ɓa Zoˀap ani: ‹Anja ɓi hana a giraŋ haɗa fineˀ gidaŋ ta. Ar li gi vurumo si na, muc ada tika tika gar si. Vula gidaŋ da vurum ɗike ti ɗuva dibiɗ taˀ ng'ar walahaya, sey da ka muzuma le.›»

²⁶Bat-Seba, ngwas ngi Uri micina a kiɗaka zil naŋ le vagay na, dar a tuwa zil naŋ.

²⁷Bat-Seba, ti hin ngi tuwa zil naŋ mikiɗ mi na, Davit a slin ara zuɓakaŋ di, a zuɓa ngi hay naŋ. Bat-Seba a tiri ngwas naŋ, a yaŋ mangal mizile. Amma gwat Davit miga na, Bumbulvuŋ a hĩyã ta.