Read South Giziga 2SA 13 Bible Online

2SA 13 - South Giziga bible

2SA 13

¹A dirba nah na, ɓi migi ani: Absalom, mangal ngi Davite, sukum naŋ mongoso ada. Naŋ kuy haɗa teˀe. A zilaka Tamar. Amnoŋ, mangal mekelem ngi Davite, ara wuɗa Tamara ngi hin di.

²Amnoŋ, wuluk ngi Tamar, sukum naŋ mongoso ngi wazlaraya, hã akaŋ jiji. Tamar i diili mungbuˀo kine, vurˀe, ɓa Amnoŋ a luuma a hin di na, tuwaˀ haɗa.

³Amnoŋ, ngama naŋ ada, a zilaka Yonadap, mangal ngi Samma, sukum ngi Davit. Yonadap i mbur misi wer teˀe.

⁴Yonadap a ɓa Amnoŋ tuwa: «Yarma, miprik gar na, vu ɗik anta pusuk pusak le ta vur mike? Maguw i mike, ɓiy di sini?» Amnoŋ a mbiɗaŋ di: «I ra wuɗ Tamar, sukum mongoso ngi sukum ɗu Absalom na.»

⁵Yonadap a mbiɗaŋ di: «Hin tup ar arngawo ɗike, kaɓa gwat ara juw. Da tapas bunuk misa so le ɓa a puruw na, kisa ɓaŋ na: ‹Pula sukum ɗu mongoso Tamar na, ɓa a sawa a vuliy gwat ngi zum. Anja a so gi gwat ngi zum a mihiri ɗu, i ra pura, yo anja i naŋ vuna masiy di ti haŋ naŋ ɓa yi sa zumaŋ.›»

⁶Amnoŋ a hin tup, a gi kaɓa gwat ara jaŋ. Buy muso nga puraŋ na, joˀ Amnoŋ a ɓaŋ: «Inga pula jiviɗ da sukum ɗu Tamara, a so giy helelem mikefer kefer cuw daˀ a mihiri ɗu aka. Anja ɓa a sa siy taŋ i zuma takwa!»

⁷Akẽh na, Davit a slin ɓa ara ɓaka Tamar a hay naŋ: «Aru ngi hay sukum ɗik Amnoŋ, ɓa ki gaŋ gwat ngi zum.»

⁸Dar Tamar aru ngi hay sukum naŋ Amnoŋ so. Amnoŋ a ro tup. Akẽh na, a wuɗ hapa, a huluɓaŋ, a ga taŋ laŋ laŋ daˀ a mihiri naŋ, dar a da taŋ.

⁹Yo Tamar a zuɓa magayaka tir vu waɗ a paŋ taŋ sek a mbuŋ, ɓa a zuma taŋ, amma a ngum zuma taŋ ta. Amnoŋ a ɓi: «Bam ti mizli gar ng'avra.» Mizli misi a cikeˀehey gar na, a bam ng'avra.

¹⁰Amnoŋ tuwa, a ɓa Tamara: «A riy ti ɗafa nga viŋ, vuliy di ta haŋ ɗike, ɓa yi sa zuma far.» Tamar a hila gwat ngi zum, naŋ migaŋ taŋ tuwa, aru di nga viŋ sukum naŋ Amnoŋ.

¹¹Tamar a zuɓa ɓa a vulaŋ di a zumaŋ. Akẽh na, Amnoŋ a ja Tamar tuwa, a ɓaŋ: «Sawa sukum ɗu, hin avu ya ar arngawo.»

¹²Tamar a mbiɗaŋ di: «Kay, kanah ta sukum ɗu, ki jiy ti gidaŋ ta, asi gwat hana, anta gi asi hirwuy Israyele ta. Ki ga gwat ngi mesem hana ta.

¹³Ya, ɓa yi sa ra bi ti mesem ɗu amaka? Yo ka kwana, a sa purukuw ki mbur migi gwat ngi mesem mukuy ta le wãˀ asi hirwuy Israyele. Ɓa buyo sini. N'anta sa tikuw ngi zuɓ ɗu ta.»

¹⁴Amma Amnoŋ a ngum cinaŋ di ta. A tikaŋ ˀay, a ja ti gidaŋ, a hin di.

¹⁵Dar Amnoŋ a zla a gi mesene haɗa ti Tamara. Kanah, a gi di mesene haɗa, hã fineˀ naŋ muwuɗaŋ zleˀe na. Amnoŋ a ɓaŋ: «Slikiɗ, cuh.»

¹⁶Tamar a mbiɗaŋ di: «Kay kanah ta, ka maɓuliy ti ɓul na, i slra malambaˀ madiɗa kuyta wãˀ fineˀ malambaˀ ka migiy di mudumbuŋ na.» Amma Amnoŋ a ngum cinaŋ di ta.

¹⁷Amnoŋ a zilo gawla naŋ, a ɓaŋ: «Anja a ɓulaka zuŋ hana ti hay ɗu, giciy miviŋ kilak ti dirba naŋ.»

¹⁸Tamara, naŋ ti zana hirnga silmir ɓaˀ avu vu, asi maˀãyay, ziri ngi buyoyo, ti taŋ mungbuˀ ngbuˀ kine aruŋ na, a kam di i zana silmir misi kanah. Gawla ngi Amnoŋ tuwa, a bi di ng'avra, a gica miviŋ ti dirba naŋ kiɗasla.

¹⁹Tamar a hil fucu, a pa a hirnga, a ngira zana naŋ hirnga misilmir tuwa, a pa haŋ sek a hirnga, aru bal ti widi.

²⁰Sukum naŋ Absalom a ɓaŋ: «Sukum ɗik Amnoŋ a hiryuw le kwa? Wurenna, cifi teˀteˀ sukum ɗu. Amnoŋ i sukum ɗik mizileŋ. Ki wulka ɓi nah haɗa ta.» Tamar a ndir fuk a hay sukum naŋ Absalomo.

²¹Ɓi hana gar na, Davit a cine le, a jaŋ mevel haɗa.

²²Ko Absalom anta kiɗ slir neˀ ati sukum naŋ Amnoŋ mata, asi Absalom a jaŋ le a kwacay haɗa teˀe, vur Amnoŋ mija sukum naŋ mongoso Tamar na.

²³Vi cuw a dirba nah na, ara slam ngwic ngi tumuŋhoy a hay Absalom a Baˀal-Hasor, gweˀ avu li mazilaka Efrayim. Absalom a zila ziri buyoyo gar ngi hay naŋ.

²⁴Absalom a so avu buyo, a ɓaŋ: «Ani, ara slam ngwic ngi tumuŋhoy a hay ɗu, ya gawla ɗike. Ambuh ta kwa buy, ka ati gawla ɗikeye, zliv ki soko ngi hay ɗu, ya gawla ɗike kwa mbrike?»

²⁵Buy a ɓa Absalomo: «Kanah ta mangal ɗu, ambuh, ndr'anta i ram gar ndra ta. Anja i ra vulukuw gir haɗa ta.» Absalom a hurdum ɓa a ram na si, amma buy a ngum ɓa aru ta, a ɗuwula mi da Absalomo.

²⁶Absalom a ɓa buyo: «Na kwana, pula jiviɗ da sukum ɗu Amnoŋ ɓa a kisa ndra ta ma kwa.» Buy a mbiɗaŋ di: «Amnoŋ a kisukum vur mike?»

²⁷Absalom ara hurdum na si. Joˀ buy a pula Amnoŋ ati ziri naŋ mizile mekelemeye gar, a ram bummoˀ.

²⁸A dirba nah, Absalom a ɗuva mingiɓi da gawla naŋhaya, a ɓa taŋ: «Da Amnoŋ ara cin ndum tisi mbaazla muvõy võy na, yo da ya misa ɓukum le, kiɗaka Amnoŋ na, kisa kiɗaka vagay si, ko ki ra zluwunam ta. Muɗuvukum mingiɓi i ya ta kwa. Tusom mevel, yo bigaka, kum i mizli migidaŋ gidaŋhay.»

²⁹Gawla ngi Absalomoy a gaka gwat da Amnoŋ kaɓa Absalom muɗuva taŋ mingiɓi nah. Akẽh na, ziri buyoyo gar a slikiɗam, ko wa gar a jiɗ ar zungu naŋ zungu naŋ, a kilam.

³⁰Zir i buyoyo muroko a jiviɗ aruŋ si na, ɓi nah ara ndila Davite le si. A ɓakaŋ: «Absalom a kiɗa ziri buyoyo le gar vagay vagay, ko pal mindir anta.»

³¹Buy a slikiɗ, a ngira zanahaya, dar a hin a ruwuy. Gawla naŋhaya gar a roko deŋ deŋ yom akẽh, zana mingirahay le puluwar puluwar.

³²Yonadap, mangal ngi Samma, sukum ngi Davite, a zla a ɓi: «Anja kumani ɗu a ɓi a kiɗaka ziri gawla ngi buyoyo le gar kini ta. A kiɗam vagaya i Amnoŋ pal naŋ. Absalom a ɓa le ɗaˀ zleˀe, ti Amnoŋ mija Tamar sukum naŋ mongoso na.

³³Buy ɗu kumani, anja ki wuluk kaɓa a kiɗaka ziri ɗikeye le gar vagay vagay ta. Kay, a kiɗam vagaya i Amnoŋ pal naŋ.»

³⁴Yo Absalom a kil le. Gawla mijigina li ada zleˀe. A zuɓa hiri paɗ, keɗ na, zigiduw haɗi ara boko pitis pitis ti dirba naŋ, a didak muwã.

³⁵Yonadap tuwa, a ɓa buyo: «Ziri, t'ani ndiloko a diga. Ɓi mucuh gar na, naŋ kaɓa ya gawla ɗik muɓuw di na.»

³⁶Naŋ kine, ɓa hã a kiɗa mingiɓi tikeˀe na, ziri buyoy a ndiloko le. Dar a zlaka tuwuy, ˀay paɗ a muŋ. Buy ati gawla naŋhaya, taŋ tuwa kwana, a zlaka a tuwam haɗa haɗa ya.

³⁷Absalom mikil na, ara ɗum a hay Talmay, mangal ngi Amihuɗ, buy ngi Gesur. A gi vi makir a diga. Angi vi makir tayna, Davit a tuwa mangal naŋ.

³⁸Absalom mikil tuwa na, ara ɗum a Gesur, a gi vi makir a diga.

³⁹Buy Davite mikiɗa mi ngi tuwa Amnoŋ na, a zla a wulka Absalomo maso.